ၵူၼ်းၵဵင်းတုင် လႆၵၼ်ၵႂႃႇသမ်းယႃႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 သတ်ႉၼႅၼ်ႈၼႃႁႅင်း ၵူၼ်းမိူင်းပိုၼ်ႉတီႈမႆႈၸႂ် ၵူဝ် ၸိူဝ်ႉမႅင်းၽႄႈလၢမ်းတိတ်းၸပ်းၵၼ်ၼမ်ၶိုၼ်ႈမႃး ။
မိူဝ်ႈၼႆႉ ဝၼ်းတီႈ 2/8/2021 ၵူၼ်းမိူင်းပိုၼ်ႉတီႈ ၸႄႈဝဵင်းၵဵင်းတုင် ဢွၼ်ၵၼ် လင်ႇလႆ ၵႂႃႇသမ်းယႃႈယႃႁႄႉၵင်ႈ ၸိူဝ်ႉ မႅင်း တၢင်းပဵၼ်ၶူဝ်ႊဝိတ်ႉ 19 တီႈႁူင်းႁေႃး ၵၢင်ဝဵင်း (မြို့တော်ခန်းမ) ၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း ၵူၼ်းမိူင်း သတ်ႉၼႅၼ်ႈၼႃယူႇၸမ်ၵၼ်ၼမ်ႁႅင်းသေ ႁဵတ်းႁႂ်ႈၵူၼ်းမိူင်းမႆႈၸႂ် ပႃးထႅင်ႈၵူဝ်ၸိူဝ်ႉမႅင်းၼႆႉ ၵႂႃႇၽႄႈလၢမ်းတိတ်းၸပ်း ၵၼ်ၼမ်ၶိုၼ်ႈမႃး ၼႆယဝ်ႉ။
ၽူႈတူင်ႉၼိုင်ၼႂ်းတူင်ႇဝူင်းၵူၼ်း ၸႄႈဝဵင်းၵဵင်းတုင် ၵေႃႉၼိုင်ႈ လၢတ်ႈတီႈၽူႈတွႆႇ ႁွၵ်ႈဝႃႈ – “မိူဝ်ႈၼႆႉ ယၢမ်းၵၢင်ၼႂ် ယူႇ တီႈ ႁဝ်းၶႃႈ လႆႈႁၼ် ၵူၼ်းမိူင်းႁဝ်း ၼႅတ်ႈဢွၼ်ၵၼ်ၵႂႃႇႁိမ်ထူဝ်းယႃႁႄႉၵင်ႈၶူဝ်ႊဝိတ်ႉ 19 ဢၼ်ႁွင်ႉဝႃႈ Sinopharm ၵၼ်ၼၼ်ႉ ၵူၼ်းပေႃးတဵမ်သတ်ႉတိတ်းၵၼ်လူင်ဝႆႉ ဢမ်ႇယၢၼ်ၵႆၵၼ် တိတ်းတိူဝ်ႉၵၼ် လူင်ဝႆႉၶႃႈဢေႃႈ။ သင်ဝႃႈ ၼႂ်း ၵူၼ်းၵႂႃႇသမ်းယႃၼၼ်ႉ မီးၵူၼ်းၸိူဝ်ႉမႅင်းၵႂႃႇ ၵေႃႉသွင်ၵေႃႉလူး တေႁဵတ်းႁိုဝ် ဢမ်ႇၸပ်းၵၼ်ၵႂႃႇမူတ်းယဝ်ႉႁိုဝ်ၼၼ်ႉ မိူၼ်တင်းဝႃႈ ပွႆႇၸိူဝ်ႉမႅင်းသႂ်ႇၵၼ်ၵူၺ်းၶႃႈဢေႃႈ ယူႇတီႈႁဝ်းၶႃႈ ထတ်းသၢင်ႁၼ်တႄႉ”- ဝႃႈၼႆ။
ယွၼ်ႉၼၼ်လႄႈ ၼင်ႇႁိုဝ် ၵူၼ်းမိူင်းၸိူဝ်းၵႂႃႇသမ်းယႃၵၼ်ၼၼ်ႉ တေဢမ်ႇလႆႈယူႇ တိတ်းၸပ်းၵၼ် တေလႆႈယူႇႁၢၼ်ႇ ၵၼ်မွၵ်ႇႁိုဝ် တေလႆႈၶပ်းထႅဝ်ၸိူင်ႉႁိုဝ် ၸဵမ်ၸိူဝ်းၼႆႉ ယူႇတီႈ ၾၢႆႇပၢႆးယူႇလီ လူင်ပွင်ၸိုင်ႈ တေလႆႈၸတ်းၵၢၼ် တမ်း ဝၢင်းပၼ် ၼင်ႇႁိုဝ် ၵူၼ်းမိူင်းၸိူဝ်းမႃးထူဝ်းယႃႁႄႉၵင်ႈၵၼ်ၼၼ်ႉ ပေႃးတေဢမ်ႇမီးလွင်ႈၵၼ် တိတ်းၸပ်း ၸိူဝ်းမႅင်ႉ တေႃႇၵၼ် တေလႆႈႁဵတ်းႁိုဝ်ၼႆ ၽူႈတူင်ႉၼိုင် ၼႂ်းတူင်ႇဝူင်း ၵဵင်းတုင် သိုပ်ႇလၢတ်ႈၼႄၼင်ႇၼႆ။
“ၵူၼ်းမိူင်းႁဝ်းသမ်ႉ လွင်ႈပၢႆးယူႇလီၼႆ တေလႆႈႁႄႉၵင်ႈၵၼ်ၸိူင်ႉႁိုဝ်ၼႆ ဢမ်ႇပေႃး ႁူႉလီၶႃႈ လူင်ပွင်ၸိုင်ႈၵေႃႈ ၾၢႆႇၼိုင်ႈ ဢမ်ႇၸႅၵ်ႇၼႄၶေႃႈမုလ်း ၵၢႆႊလၢႆႊၼႄ ဝႃႈတေလႆႈႁဵတ်းၸိူင်ႉႁိုဝ် ၵူၼ်းမိူင်းၵေႃႈ သမ်ႉၵူဝ်တၢႆ ႁိမ်ၵၼ်ၵႂႃႇထူဝ်း တၢင်းပဵၼ် ၼႆႉ တေတိတ်းၽႄႈၶိုၼ်ႈမႃးထႅင်ႈႁၢဝ်ႈႁႅင်းၵွၼ်ႇ ပေႃးပဵၼ်ၼႆႉတႄႉ”- ဝႃႈၼႆ။
ဢိင်ၼိူဝ် လွင်ႈၵၢၼ်သမ်းယႃႁႄႉၵင်ႈ တၢင်းပဵၼ်ၶူဝ်ႊဝိတ်ႉ 19 ၼႂ်းၸႄႈဝဵင်းၵဵင်းတုင်ၼႆႉသေ ၵူၼ်းမိူင်းပိုၼ်ႉတီႈ ၵမ်ႈ ၼမ် မႆႈၸႂ် လူဝ်ႇႁၢင်ႈႁႅၼ်း သိုဝ်ႉၶူဝ်းၶွင်ၵိၼ်ယႅမ်ႉၵဵပ်းဝႆႉတင်းၼမ်ၵူၺ်းယဝ်ႉ။ သင်ဝႃႈ ၵူၼ်းမိူင်း ဢမ်ႇၶၢမ်ႇယူႇ ၵႆၵၼ်သေ လူင်ပွင်ၸိုင်ႈ ဢမ်ႇၸတ်းၵၢၼ်ပၼ်လႆႈလီတႄႉ ၵူၼ်းပဵၼ်တိုၼ်းတေ တိူဝ်းလိူဝ်မႃးထႅင်ႈ ဢမ်ႇႁၢင်ႉ ၵူၼ်းပိုၼ်ႉတီႈ ၵဵင်း တုင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈၼင်ႇၼႆ။
“ၵူၼ်းမိူင်းႁဝ်းၵေႃႈ ၶဝ်ဢမ်ႇၸွမ်းပၵ်းပိူင်တၢင်းပဵၼ် လူင်ပွင်ၸိုင်ႈၵေႃႈ ဢမ်ႇလၢတ်ႈၼႄ တေလႆႈႁဵတ်းႁိုဝ် ဢမ်ႇၸီႉ ၸမ်ႈၼႄၵူၼ်းမိူင်း တေလႆႈႁဵတ်းႁိုဝ် မိူဝ်ႈၽွင်းၵႂႃႇသမ်းၶဵမ်ၼၼ်ႉ။ ဢမ်ႇၼၼ်ၵေႃႈ ပဵၼ်ၽႅၼ်ၵၢၼ် မဢလ တင်ႈၸႂ်ပွႆႇ တၢင်းပဵၼ်ၽႄႈလၢမ်း ပၼ်ၵူၼ်းမိူင်းႁိုဝ် ၼႂ်းၸႂ်ႁဝ်းၶႃႈတႄႉ ၶႂ်ႈထၢင်ႇၸိူင်ႉၼႆယဝ်ႉၶႃႈ။ မိူဝ်ႈလဵဝ်တႄႉ ႁိူၼ်းယေးၽႂ်မၼ်း လူဝ်ႇသိုဝ်ႉၶဝ်ႈၼမ်ႉတင်းၵိၼ်ၵဵပ်းၵၼ်ဝႆႉ ၵူၺ်းယဝ်ႉ ၼႂ်းလိူၼ်ၼႆႉ ဢမ်ႇၼၼ် လိူၼ်ၼႃႈၼႆႉ ငဝ်းလၢႆး တေဢမ်ႇပေႃးၶႂ်ႈ လီယဝ်ႉ ပေႃးႁဝ်းတူၺ်းငဝ်းလၢႆးဝၼ်းသွင်ဝၼ်းၼႆႉ တၢင်းပဵၼ်တေတိူဝ်းၶိုၼ်ႈမႃးၼပ်ႉ ႁူဝ်ႁဵင်းမၼ်းၵေႃႈ ၸၢင်ႈပဵၼ်လႆႈ ပေႃးၵူၼ်းမိူင်း ဢမ်ႇၶၢမ်ႇယူႇယၢၼ်ၵႆၵၼ် မိူဝ်ႈၽွင်းၵႂႃႇသမ်းယႃၼၼ်ႉတႄႉ”- ဝႃႈၼႆ။
ၼႂ်းၸႄႈဝဵင်းၵဵင်းတုင် တႄႇသမ်းယႃႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ပၼ်ၵူၼ်းမိူင်းမႃး မိူဝ်ႈဝၼ်းတီႈ ဝၼ်းတီႈ 30-31/7/2021 တီႈႁူင်းႁေႃး ၵၢင်ဝဵင်း၊ ဝၼ်းတီႈ 1/8/2021 တီႈႁူင်းႁေႃးၵၢင်ဝဵင်းလႄႈ ဢိူင်ႇလွႆမူၺ်၊ ဝၼ်းတီႈ 2/8/2021 သမ်ႉ တီႈႁူင်းႁေႃး ၵၢင်ဝဵင်း၊ ဝတ်ႉယၢင်းႁူၵ်းလႄႈ ဢိၵ်ႇထႅင်ႈလၢႆလၢႆတီႈ။ ဝၼ်းတီႈ 3/8/2021 သမ်ႉ ႁူင်းႁေႃး ၵၢင်ဝဵင်းလႄႈ ၸွမ်းသၼ်လွႆ 5 ဢိူင်ႇ ၸိူဝ်းၼႆႉ ဝႃႈၼႆ။
ယၢမ်းလဵဝ် ၼႂ်းၸႄႈဝဵင်းၵဵင်းတုင် မီးၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 တေႃႇထိုင်ဝၼ်းတီႈ 1/8/2021 ၼႆႉ မီးၵူၼ်း တိတ်းၸပ်း ၸိူဝ်ႉမႅင်း ၶူဝ်ႊဝိတ်ႉ 19 တင်းမူတ်း 206 ၵေႃႉ။ လူႉတၢႆ 2 ၵေႃႉ၊ လူင်းႁူင်းယႃယဝ်ႉ 66 ၵေႃႉ တိုၵ်ႉယူတ်းယႃဝႆႉ 138 ၵေႃႉ။ မိူဝ်ႈၼႆႉ ဝၼ်းတီႈ 2 ယၢမ်းၵၢင်ၼႂ်သမ်ႉ ၵူတ်ႇထတ်းႁၼ်ထႅင်ႈ 4 ၵေႃႉ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ