ယၢမ်းလဵဝ် ၼႂ်းၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း မီးၵူၼ်းတိတ်းၸပ်း ၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 တင်း မူတ်း 200 ပၢႆ လူႉတၢႆ 2 ၵေႃႉယဝ်ႉ ဝႃႈၼႆ။
မိူဝ်ႈၼႆႉ ဝၼ်းတီႈ 2/8/2021 ယၢမ်းၵၢင်ၼႂ် ၵူတ်ႇထတ်းႁၼ် ၵူၼ်းတိတ်းၸပ်း ၸိူဝ်ႉမႅင်းၶူဝ်ႊဝိတ်ႉ 19 ၼႂ်းၸႄႈဝဵင်း ၵဵင်းတုင် ထႅင်ႈ 4 ၵေႃႉ ၽူႈၸၢႆး ၵေႃႉၼိုင်ႈလႄႈ ၼၢင်းယိင်း 3 ၵေႃႉ ။
ၽူႈတူင်ႉၼိုင် ၼႂ်းတူင်ႇဝူင်းၵူၼ်း ၵဵင်းတုင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းပဵၼ်ၼႆႉ ၶႂ်ႈဝႃႈ ၽိူမ်ႉၶိုၼ်ႈၵူႈ ဝၼ်းယဝ်ႉၶႃႈ တီႈၵဵင်းတုင်ၼႆႉ။ ယၢမ်းလဵဝ် တီႈၵဵင်းတုင်တႄႉ ၵမ်ႈၼမ် ဢွၼ်ၵၼ်ၵၵ်းတူဝ်ၵၼ်ဝႆႉၶႃႈဢေႃႈ ႁၢၼ်ႉၶၢႆၶူဝ်း ၸိူဝ်းၼႆႉၵေႃႈ ပိၵ်ႉၵၼ်မႃးၼမ်ယဝ်ႉၶႃႈ”- ဝႃႈၼႆ။
မိူဝ်ႈဝႃး ဝၼ်းတီႈ 1/8/2021 တီႈၸႄႈဝဵင်းၵဵင်းတုင် မီးၵူၼ်းလူႉတၢႆ ယွၼ်ႉတၢင်းပဵၼ် ၶူဝ်ႊဝိတ်ႉ 19 ထႅင်ႈၵေႃႉၼိုင်ႈ ယၢမ်း လဵဝ် လႆႈလူႉတၢႆၵႂႃႇယဝ်ႉတင်းမူတ်း 2 ၵေႃႉ ဝႃႈၼႆ။
“မိူဝ်ႈဝႃးၼႆႉ လႆႈငိၼ်းဝႃႈ ပဵၼ်ၽူႈၵွၼ်းဝတ်ႉၼွင်သႅၼ် ဢိူင်ႇၵၢတ်ႇထၢႆႈ လွၼ်ႇၵႂႃႇ တူၼ်ၼိုင်ႈ ယွၼ်ႉတၢင်းပဵၼ်ၶူဝ်ႊဝိတ်ႉ 19 ၼႆၶႃႈဝႃႇ လွၼ်ႉမိူဝ်ႈဝႃးသေ ပူၼ်ႉၶၢပ်ႈတူဝ် မိူဝ်ႈဝႃးၵမ်းလဵဝ်ၶႃႈဢေႃႈ။ ယဝ်ႉၵေႃႈ ယၢမ်းလဵဝ် ဝၢၼ်ႈၼွင်သႅၼ်ၵေႃႈ လႆႈ Lockdown ဝႆႉ ၸူဝ်ႈၶၢဝ်း လႆႈငိၼ်းဝႃႈ မီးၵူၼ်းတိတ်းၸပ်းဝႆႉထႅင်ႈ ပဵၼ်လၢႆၵေႃႉ ၼႆၶႃႈ”- ၵူၼ်းၼုမ်ႇ ၵဵင်းတုင် သိုပ်ႇ လၢတ်ႈၼႄ ၼင်ႇၼႆ။
ယွၼ်ႉတၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းႁၢဝ်ႈႁႅင်းၼႆႉသေ မၢင်ဢိူင်ႇ မၢင်ဝၢၼ်ႈ ၼႂ်းၸႄႈဝဵင်းၵဵင်းတုင် ပိၵ်ႉဢိုတ်းဝၢၼ်ႈ ဢိူင်ႇဝႆႉၵမ်ႈၽွင်ႈ ယွၼ်ႉၵူဝ်တၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းႁၢဝ်ႈႁႅင်း ၼမ်ၶိုၼ်ႈတိတ်းၸပ်းၵၼ်ၼမ် ဝႃႈၼႆ။
ၼႂ်းၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်းၼႆႉ တႄႇဢဝ်မိူဝ်ႈၼႂ်းလိူၼ်ၵျုၼ်ႊ မႃးတေႃႇထိုင် ဝၼ်းတီႈ 1/8/2021 ၼႆႉ ၵူၼ်းတိတ်းၸပ်း ၸိူဝ်ႉမႅင်း တၢင်းပဵၼ် ၶူဝ်ႊဝိတ်ႉ 19 တင်းမူတ်းမီးၵႂႃႇ 206 ၵေႃႉ၊ လူႉတၢႆ 2 ၵေႃႉ၊ လူင်းႁူင်းယႃယဝ်ႉ 66 ၵေႃႉ တိုၵ်ႉယူတ်းယႃဝႆႉ 138 ၵေႃႉ။ မိူဝ်ႈဝၼ်းတီႈ 2/8/2021 သမ်ႉ မီးၵူၼ်းတိတ်းၸပ်း ၽိူမ်ႉၶိုၼ်ႈထႅင်ႈ 4 ၵေႃႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ