တၢင်းပဵၼ်ၶူဝ်ႊဝိတ်ႉၶဝ်ႈမႃးႁွပ်ႈသၢမ် ၼႂ်းမိူင်းႁူမ်ႈတုမ် ႁိုင်မႃးၶၢဝ်းတၢင်း 2 လိူၼ်ပၢႆ  မိူဝ်ႈၼႆႉ ဝၼ်းတီႈ 2/8/2021 ယၢမ်းၵၢင်ၼႂ် တီႈဝဵင်းမိူင်းယၢင်း ၸႄႈတွၼ်ႈၵဵင်းတုင် ၸိုင်ႈတႆးပွတ်း ဢွၵ်ႇၶူင်း တႄႇထတ်းႁၼ် ၵူၼ်းမုင်ႉႁေႃႁိူၼ်း   လဵဝ်ၵၼ်   တိတ်းၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 တင်းမူတ်း 10 ၵေႃႉ ၊ ယၢမ်းလဵဝ်ပွၵ်ႉယွမ်ႇၼၼ်ႉထုၵ်ႇပိၵ်ႉႁၢမ်ႈ Lockdown ဝႆႉယဝ်ႉ။

ၸၢႆးလိူၼ်ၶမ်း ၽူႈၶဝ်ႈၸုမ်းၶွမ်ႊမတီႊၾၢႆႇၵႅတ်ႈၵင်ႈတၢင်းပဵၼ်ၶူဝ်ႊဝိတ်ႉ 19 ၸႄႈဝဵင်းမိူင်းယၢင်း လၢတ်ႈတီႈ ၽူႈတွႆႇႁွၵ်ႈ ဝႃႈ – “ၸႂ်ႈၶႃႈဢေႃႈ တီႈမိူင်းယၢင်းႁဝ်းၶႃႈ လႆႈၵူတ်ႇထတ်းႁၼ်ၸိူဝ်ႉမႅင်းၶူဝ်ႊဝိတ်ႉ 19  မိူဝ်ႈၼႆႉ ယၢမ်းၵၢင်ၼႂ် 10 ၵေႃႉ ပဵၼ် ၶွပ်ႈၶူဝ်း/ မုင်ႉႁေႃႁိူၼ်းလဵဝ် ၵၼ်မူတ်းမူတ်းၶႃႈ။ လႆႈဢဝ်ၶိူင်ႈ RDT Test Kit ၵူတ်ႇထတ်းသေ ဢွၵ်ႇမႃး Positive ၶႃႈ ဢေႃႈ”- ဝႃႈၼႆ။

ယၢမ်းလဵဝ် ၵူၼ်းပဵၼ်ၼႂ်းၶွပ်ႈၶူဝ်းလဵဝ်ၵၼ် တင်းမူတ်း 10 ၵေႃႉၼၼ်ႉ လႆႈသူင်ႇယူတ်းယႃတူဝ်ဝႆႉတီႈႁူင်းယႃလူင် ၸႄႈ ဝဵင်းမိူင်းယၢင်းယဝ်ႉ။ ၼွၵ်ႈလိူဝ်ၼၼ်ႉ ၵူၼ်းႁိမ်းႁွမ်းလႄႈ ဝၢၼ်ႈႁေႃႈၵၢင်တႄႉ ထုၵ်ႇ Lockdown ဝႆႉ ၸူဝ်ႈၶၢဝ်းယဝ်ႉ ဝႃႈၼႆ။

“ယၢမ်းလဵဝ် ႁဝ်းၶႃႈၵေႃႈ တိုၵ်ႉၸွပ်ႇထၢမ်တူၺ်းၵူၼ်းႁိမ်းႁွမ်းယူႇၸမ် ၵူၼ်းၼႂ်းၶွပ်ႈၶူဝ်း ၵူၼ်းပဵၼ်ၼၼ်ႉထႅင်ႈယူႇၶႃႈ။ ဝႃႈၵူၼ်းၼႂ်းမုင်ႉႁေႃႁိူၼ်းၵူၼ်းပဵၼ်ၼၼ်ႉ ယၢမ်ႈၵႂႃႇတၢင်းလႂ်ၽွင်ႈ ၼင်ႇႁိုဝ် ပေႃးတေႁူႉငဝ်ႈႁၢၵ်ႈမၼ်းသေ ပေႃးတေ ၸၢင်ႈၵႅတ်ႇၶႄႁႄႉၵင်ႈတၼ်းၶိုတ်းလႆႈၶႃႈ။ ႁဝ်းၶႃႈ ထၢမ်တီႈတူဝ်ၸဝ်ႈႁိူၼ်း ၵူၼ်းပဵၼ်ၼၼ်ႉတႄႉ လၢတ်ႈၼႄဝႃႈ ဢမ်ႇ မီးလွင်ႈဢွၵ်ႇတၢင်းၵႂႃႇတၢင်းလႂ်ၼႆၶႃႈဢေႃႈ”-  ၸၢႆးလိူၼ်ၶမ်း သိုပ်ႇလၢတ်ႈၼႄထႅင်ႈၼင်ႇၼႆ။

တၢင်းပဵၼ်ၶူဝ်ႊဝိတ်ႉ 19 ပွၵ်ႈၵမ်းသၢမ်ၼႆႉ ၼႂ်းၸႄႈဝဵင်းမိူင်းယၢင်း ၸိုင်ႈတႆးပွတ်း ဢွၵ်ႇၶူင်း တိုၵ်ႉၵူတ်ႇထတ်း ႁၼ်ၵူၼ်း တိတ်းၸပ်းၸိူဝ်ႉမႅင်း 10 ၵေႃႉၼႆႉ တိုၵ်ႉပဵၼ်ပွၵ်ႈၵမ်းႁႅၵ်ႈ။ ၼွၵ်ႈလိူဝ်ၼၼ်ႉ ယူႇတီႈၽူႈမီးပုၼ်ႈၽွၼ်ႈ ၾၢႆႇၵႅတ်ႇၵင်ႈ တၢင်းပဵၼ် ၸႄႈဝဵင်းမိူင်းယၢင်းၵေႃႈ လႆႈႁၢင်ႈႁႅၼ်းဝႆႉ တႃႇၵူၼ်းၶဝ်ႈၵၵ်းတူဝ် Quarantine  ၵၼ်ဝႆႉ တီႈပၢင်လဵၼ်ႈမၢၵ်ႇ ၼင်ဝႆႉယူႇ ဝႃႈၼႆ။

“ဢၼ်ၶႂ်ႈၾၢၵ်ႇထိုင်ၵူၼ်းမိူင်းၼႂ်းပိုၼ်ႉတီႈႁဝ်းၶႃႈတႄႉ တေမီးယူႇ 2 လွင်ႈၶႃႈ။ လွင်ႈတၢင်းပဵၼ်ၶူဝ်ႊဝိတ်ႉ 19 ၼႆႉ ဢၼ် ဝႄႈလႆႈၵေႃႈတေမီး ဢၼ်ဢမ်ႇဝႄႈလႆႈၵေႃႈတေမီးလႄႈ ၵွပ်ႈၼႆ 1 ၼႆႉ ႁဝ်းၶႃႈ လူဝ်ႇပၼ်ႁႅင်းၸႂ် ၶတ်းၸႂ်ၸွႆႈထႅမ်ၵူၼ်း ပဵၼ်ၶဝ် ၼင်ႇႁိုဝ် ပေႃးတေၸဵဝ်းႁၢႆၸဵဝ်းၶႅၼ်းမႃး။ 2 သမ်ႉ ၵူၼ်းမိူင်းႁဝ်း ၸိူဝ်းပႆႇပဵၼ် တိတ်းၸပ်းၼၼ်ႉၵေႃႈ ၸွမ်းၼင်ႇ ပၵ်းပိူင်မၢႆမီႈမီးၼၼ်ႉ ႁႂ်ႈဢွၼ်ၵၼ်ႁဵတ်းၸွမ်းၵၼ် ႁႂ်ႈၾၢင်ႉသတိၵႂႃႇမႃး ယူႇသဝ်းၵိၼ်သၢင်ႈၵၼ်လီလီ ၸဵမ်ၸိူဝ်းၼႆႉ ၶႃႈ”-  ၸၢႆးလိူၼ်ၶမ်း တုၵ်းသူၼ်းထိုင် ၵူၼ်းပိုၼ်ႉတီႈ ၼင်ႇၼႆ။

ၸႄႈဝဵင်းမိူင်းယၢင်းၼႆႉ ၵူၼ်းဝၢၼ်ႈပွၵ်ႉယွမ်ႇလႄႈမီးလွင်ႈႁူမ်ႈမိုဝ်းၵၼ် ၽွမ်ႉၽဵင်ႇၵၼ်လႄႈ ႁႄႉၵင်ႈတၢင်းပဵၼ်လႆႈလီ။ ၵူၼ်းၼွၵ်ႈဝဵင်းဢမ်ႇလႆႈၶဝ်ႈၼႂ်းဝဵင်း၊ ၵူၼ်းတေၵႂႃႇသူၼ် ၵႂႃႇႁိူၵ်ႈယင်းလႆႈႁၢႆးငၢၼ်းတူဝ်ၵူႈဝၼ်း။

မိူင်းယၢင်းၼႆႉ ယူႇၼႂ်းၸႄႈတွၼ်ႈၵဵင်းတုင် ၸိုင်ႈတႆးပွတ်းဢွၵ်ႇၶူင်း ၊ ၸႄႈဝဵင်းမိူင်းၶၢၵ်ႇ ဢၼ်တိတ်း ၸပ်း ၸႄႈဝဵင်းမိူင်းယၢင်းၼၼ်ႉၵေႃႈ မီးၵူၼ်းတိတ်းၸပ်း ၸိူဝ်ႉမႅင်းၶူဝ်ႊဝိတ်ႉ 19 သွင်ၵေႃႉ  ဝႃႈၼႆ။

ယၢမ်းလဵဝ် ၼႂ်းၸႄႈဝဵင်းၵဵင်းတုင်သမ်ႉ မီးၵူၼ်းတိတ်းၸပ်း ၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 ပုင်ႈၶိုၼ်ႈ 206 ၵေႃႉ၊ လူႉတၢႆ 2 ၵေႃႉ၊ လူင်းႁူင်းယႃ 66 ၵေႃႉလႄႈ တိုၵ်ႉယူတ်းယႃတူဝ်ဝႆႉ 138 ၵေႃႉ တေႃႇထိုင်ဝၼ်းတီႈ 1/8/2021 ၼႆႉ ဝႃႈၼႆ။