ၵူၼ်းတိတ်းၸပ်း ၸိူဝ်ႉမႅင်း တၢင်းပဵၼ်ၶူဝ်ႊဝိတ်ႉ 19 ၼႂ်းၸႄႈဝဵင်းမူႇၸေႊၼႆႉ မီးၵႂႃႇယဝ်ႉ 600 ပၢႆ လူႉတၢႆယဝ်ႉ 27 ၵေႃႉ ။
တေႃႇထိုင်မႃး ဝၼ်းတီႈ 27/7/2021 ၼႆႉ ၼႂ်းၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇၼၼ်ႉ မီးၵူၼ်း တိတ်းၸပ်း ၸိူဝ်ႉမႅင်းၶူဝ်ႊဝိတ်ႉ 19 ၼမ်မႃးၵူႈဝၼ်းလႄႈ ပွၵ်ႉဝၢၼ်ႈဢၼ် ပိၵ်ႉဢိုတ်း ႁၢမ်ႈၵူၼ်းဝၢၼ်ႈၶဝ်ႈဢွၵ်ႇၼၼ်ႉတေႃႇထိုင်ယၢမ်းလဵဝ်ပႆႇပိုတ်ႇပၼ်ၶိုၼ်း။
ၽူႈတူင်ႉၼိုင် တူင်ႇဝူင်းၵူၼ်း ၸႄႈဝဵင်းမူႇၸေႊ ၵေႃႉၼိုင်ႈ လၢတ်ႈတီႈၽူႈတွႆႇ ႁွၵ်ႈ ဝႃႈ – “ယၢမ်းလဵဝ် တီႈမူႇၸေႊၼႆႉ ၶႃႈ ဝႃႈ stay at home မႃးႁင်းၽႂ်မၼ်းယူႇယဝ်ႉၶႃႈ။ မၢင်ဝၢၼ်ႈ မၢင်ပွၵ်ႉၵေႃႈ Lockdown ဝႆႉ ၵမ်းသိုဝ်ႈၶႃႈဢေႃႈ။ သဵၼ်ႈသၢႆမၢႆတႄႉ ဢၼ်ႁဝ်းၶႃႈ လႆႈႁူႉတႄႉ တေမီး 600 ပၢႆယဝ်ႉ လူႉတၢႆ 20 ပၢႆ ယဝ်ႉၵေႃႈ ဢၼ်လႆႈၶႂၢင်ႉလူင်းႁူင်းယႃ ၸိူဝ်းၼႆႉၵေႃႈမီးယူႇၶႃႈ ၵူၺ်းၵႃႈ မီးၵႃႈႁိုဝ်တႄႉ ဢမ်ႇႁူႉၶႃႈ”- ဝႃႈၼႆ။
ၼႂ်းၸႄႈဝဵင်းမူႇၸေႊ မၢင်ပွၵ်ႈ Lockdown မႃးၸမ်ၶၢဝ်းတၢင်း ၼိုင်ႈလိူၼ်၊ ထိုင်ယၢမ်းလဵဝ် ပႆႇပိုတ်ႇၶိုၼ်း။
ၵူၼ်း ပွၵ်ႉၸၢၼ်း မူႇၸေႊ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “တီႈပွၵ်ႉၸၢၼ်းႁဝ်းၶႃႈၼႆႉ Lockdown မႃး ၸမ်လိူၼ် ယဝ်ႉၶႃႈ တင်ႈတႄႇ ဝၼ်းတီႈ 4 လိူၼ်ၼႆႉမႃး။ တေႃႇထိုင်ယၢမ်းလဵဝ် ပႆႇပိုတ်ႇၶႃႈ။ ၵူၺ်းၵႃႈ ယၢပ်ႇၽိုတ်ႇလွင်ႈၵိၼ် ယႅမ်ႉ ၵၼ်ဢိတ်းၼိုင်ႈၶႃႈဢေႃႈ မၢင်ၵေႃႉ ဢၼ်သိုဝ်ႉၵဵပ်းဝႆႉ ၶွင်ၵိၼ်ယႅမ်ႉ ၸိူဝ်းၼၼ်ႉ မူတ်းယဝ်ႉႁိုဝ် ဢမ်ႇႁူႉ ၵူၺ်းၵႃႈ မီးပီႈ ၼွင်ႉတၢင်းဢိူင်ႇ 19 မၢၼ်ႈႁဝ်းၶႃႈ တေႃႉဢဝ်ၽၵ်းၶဵဝ် မွၵ်ႇမၢၵ်ႇႁၢၵ်ႈႁူဝ် မႃးတွၼ်ႈပၼ်ၶႃႈဢေႃႈ သင်ဢမ်ႇမီးပီႈ ၼွင်ႉ ႁဝ်းၶႃႈ မႃးတွၼ်ႈတႄႉ ၶႂ်ႈဝႃႈယၢပ်ႇၽိုတ်ႇလိူဝ်ႁႅင်းတႄႉၶႃႈဢေႃႈ”- ဝႃႈၼႆ။
တႄႇဢဝ် ၵၢင်လိူၼ်ၼႆႉမႃး ပီႈၼွင်ႉတၢင်းဢိူင်ႇ 19 မၢၼ်ႈ ႁူမ်ႈၵၼ်သေ တေႃႉဢဝ် ၶူဝ်းၼႂ်းသူၼ် ၽၵ်းၶဵဝ် မွၵ်ႇမၢၵ်ႇ ႁၢၵ်ႈႁူဝ် မႃးၸႃႇၵ ၸွႆႈထႅမ်ပၼ် ၵူၼ်းၼႂ်းၶူးၼႂ်းဝဵင်း ၼင်ႇႁိုဝ် ပေႃးတေဢမ်ႇလႆႈယၢပ်ႇၽိုတ်ႇလွင်ႈၵိၼ်ယႅမ်ႉၵၼ် ၸဵမ် ၸိူဝ်းၼႆႉ။
ၼွၵ်ႈလိူဝ်ၼၼ်ႉ တၢင်းၾင်ႇမိူင်းၶႄႇၵေႃႈ တႄႇဢဝ် မိူဝ်ႈဝႃးဝၼ်းတီႈ 27/7/2021 မႃးၼႆႉ ႁႅင်းၵၢၼ်မိူင်းႁူမ်ႈတုမ် ဢၼ် ၵႂႃႇႁဵတ်းၵၢၼ်ဝႆႉ တၢင်းမိူင်းၶႄႇၼၼ်ႉ ပၼ်ၶႂၢင်ႉပွၵ်ႈၶဝ်ႈမႃးၶိုၼ်းတၢင်းပွတ်းမူႇၸေႊၼႆႉ ဝႃႈၼႆ။
ၵူၼ်းၼုမ်ႇ မူႇၸေႊ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ တႄႇဢဝ် မိူဝ်ႈဝႃး ဝၼ်းတီႈ 27 ၼႆႉမႃး တၢင်း မိူင်းၶႄႇၶဝ် ပၼ်ၶႂၢင်ႉၵူၼ်းမိူင်းမၢၼ်ႈ ဢၼ်ၵႂႃႇႁဵတ်းၵၢၼ်ယူႇ ဝႆႉတၢင်းမိူင်းၶႄႇၼၼ်ႉ ပွၵ်ႈၶဝ်ႈမႃးၶိုၼ်း တီႈၽၵ်းတူလူင် သေ ဢွၼ်ၵၼ်ၶဝ်ႈၵၵ်းတူဝ်ဝႆႉတီႈသူၺ်ႇၼၢင်းတေႃႇ တေႃႇၼႃႈၽၵ်းတူလူင်ၼၼ်ႉၵမ်းလဵဝ်ၶႃႈယဝ်ႉ”- ဝႃႈၼႆ။
ၼႂ်းမိူင်းႁူမ်ႈတုမ်ၼႆႉ ဝၢႆးလင်သိုၵ်းယိုတ်းဢႃႇၼႃႇဝၢၼ်ႈမိူင်းမႃးၼႆႉ ဢမ်ႇမီးၽႂ်ၵူတ်ႇထတ်းပၼ်ၵူၼ်းမိူင်းလႄႈ ဢမ်ႇႁူႉလွင်ႈတၢင်းပဵၼ်ၶူဝ်ႊဝိတ်ႉ 19 လၢမ်းၽႄႈမွၵ်ႈႁိုဝ်။ ၵူၺ်းၵႃႈတင်ႈဢဝ်လိူၼ်ၵျုၼ်ႊၼႆႉမႃး ၵူၼ်းၸပ်းၶူဝ်ႊဝိတ်ႉ 19 ၶိုၼ်းလၢမ်းၽႄႈမႃး ၸွတ်ႇတူဝ်ႈၵူႈဝဵင်းၼႂ်းၸိုင်ႈတႆး။ယၢမ်းလဵဝ်မီးၵူၼ်းတိတ်းၸပ်း 9000 ပၢႆသေ လူႉတၢႆ မီး 300 ပၢႆယဝ်ႉ။
တၢင်းၾင်ႇမိူင်းၶႄႇၵေႃႈ ၼႂ်းႁူဝ်လိူၼ်ၵျုႊလၢႆႊၼႆႉ ၼႂ်းဝဵင်းၸေႊၵဝ်ႇ ၵူတ်ႇထတ်း ႁၼ်ၵူၼ်းတိတ်းၸပ်းၸိူဝ်ႉ မႅင်းၶူဝ်ႊ ဝိတ်ႉ 19 ထႅင်ႈလႄႈ တင်ႈဢဝ်ဝၼ်းတီႈ 7/7/2021 မႃး ၼႂ်းထုင်ႉလိုမ် ၼႃႈလိၼ်ၽွင်း ငမ်းတူဝ်ၵဝ်ႇ တႆးတႂ်ႈၶူင်း 5 ၸႄႈဝဵင်း မိူၼ်ၼင်ႇ မိူင်းမၢဝ်း၊ မိူင်းၶွၼ်၊ မိူင်းလႃႈ၊ မိူင်းတီး၊ မိူင်းဝၼ်း ၸိူဝ်းၼႆႉ ၵေႃႈၼင်ႇႁိုဝ်တၢင်းပဵၼ်တေဢမ်ႇတိတ်းၸပ်းၵၼ်ၼၼ်ႉ လႆႈႁၢမ်ႈၵူၼ်းမိူင်းၶဝ်ႈဢွၵ်ႇၵႂႃႇမႃးႁႃၵၼ်ဝႆႉယူႇလႆႈႁူႉၼင်ႇၼႆ။
