ၵူၼ်းၵဵင်းတုင် လူႉတၢႆယွၼ်ႉတၢင်းပဵၼ်ၶူဝ်ႊဝိတ်ႉ 19 ပဵၼ်ၵေႃႉႁႅၵ်ႈ ၵူၼ်းတိတ်းၸပ်းမီးဝႆႉ 130 ပၢႆ။
မိူဝ်ႈၼႆႉ ဝၼ်းတီႈ 27/7/2021 ယၢမ်းၵၢင်ၼႂ် ၵူၼ်း တိတ်းၸပ်းၶူဝ်ႊဝိတ်ႉ 19 တီႈၵဵင်းတုင် လူႉတၢႆၵေႃႉၼိုင်ႈ ပဵၼ်ၽူႈၸၢႆး ဢႃယု 57 ပီ ။ ပဵၼ်ၵူၼ်းဝၢၼ်ႈၸွမ်မႂ်ႇ ပွၵ်ႉ 3 ၸႄႈ ဝဵင်းၵဵင်းတုင် ၊ ပဵၼ်ၵူၼ်းတၢႆ ယွၼ်ႉတၢင်းပဵၼ်ၶူဝ်ႊဝိတ်ႉ 19 ၵေႃႉႁႅၵ်ႈတႃႇၵဵင်းတုင်။
ၵူၼ်းၼုမ်ႇ ၵဵင်းတုင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ဢၼ်လႆႈလူႉတၢႆၵႂႃႇ မိူဝ်ႈၼႆႉ ပဵၼ်ၽူႈၸၢႆးၵူၼ်း ထဝ်ႈ ဢႃယု 57 ပီ ၵူၼ်းဝၢၼ်ႈၸွမ်မႂ်ႇ တေလႆႈဝႃႈ ပဵၼ်ၵေႃႉႁႅၵ်ႈၶႃႈယဝ်ႉ တီႈၵဵင်းတုင်ႁဝ်းၶႃႈ ဢၼ်လႆႈလူႉတၢႆ ယွၼ်ႉ တၢင်းပဵၼ်ၶူဝ်ႊဝိတ်ႉ 19 ၼႆႉ”- ဝႃႈၼႆ။
မိူဝ်ႈၼႆႉ ယၢမ်းၵၢင်ၼႂ် ၾၢႆႇပၢႆးယူႇလီဝဵင်းၵဵင်းတုင် ၵူတ်ႇထတ်းၵူၼ်းမိူင်း ဢၼ်ထၢင်ႇထိူမ်ပဵၼ်ၶူဝ်ႊဝိတ်ႉတင်းမူတ်း 39 ၵေႃႉ။ ၼႂ်းၼၼ်ႉ ႁၼ်ၵူၼ်းၸပ်းတၢင်းပဵၼ် 4 ၵေႃႉ ပဵၼ် ၽူႈၸၢႆး 2 ၵေႃႉလႄႈ ၼၢင်းယိင်း 2 ၵေႃႉ ။
“တၢင်းပဵၼ်ၶူဝ်ႊဝိတ်ႉၼႆႉ ၽႄႈၸပ်းၵၼ်ငၢႆႈဝႆးတႄႉတႄႉ မၼ်းပဵၼ်ၽႄးၸမ်တူဝ်ႁဝ်းၼႃႇလႄႈ ၶႂ်ႈႁႂ်ႈပီႈၼွင်ႉ ၵူၼ်းမိူင်း တႆးႁဝ်းလႄႈသင် ၼႂ်းၵဵင်းတုင်လႄႈသင် ယႃႇယူႇမဝ်ၵိၼ်မၢင် ႁႂ်ႈၾၢင်ႉၵၼ် မီးသတိၵပ်းတူဝ်ၽႂ်မၼ်းၵူႈမိူဝ်ႈ သေၵမ်း”- ၽူႈတူင်ႉၼိုင်ၼႂ်းတူင်ႇဝူင်းၵူၼ်း ၼႂ်းၸႄႈဝဵင်းၵဵင်းတုင် ၵေႃႉၼိုင်ႈလၢတ်ႈၼႄၼင်ႇၼႆ။
ယၢမ်းလဵဝ် ၼႂ်းၸႄႈဝဵင်းၵဵင်းတုင် ၵူၼ်းတိတ်းၸပ်း ၸိူဝ်ႉမႅင်းမီးၵႂႃႇ 136 ၵေႃႉ၊ လူႉ တၢႆ 1 ၵေႃႉ၊ လႆႈၶႂၢင်ႉလူင်းႁူင်းယႃယဝ်ႉ 50 ၵေႃႉ၊ တိုၵ်ႉသိုပ်ႇယူတ်းယႃတူဝ်ဝႆႉ 85 ၵေႃႉ ၼႆယဝ်ႉ။