ယၢမ်းလဵဝ် ၼႂ်းၸႄႈဝဵင်းလၢႆးၶႃႈ ၸိုင်ႈတႆးပွတ်းၸၢၼ်း မီးၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 တင်း မူတ်း 30 ၵေႃႉ ဝႃႈၼႆ။
မိူဝ်ႈၼႆႉ ဝၼ်းတီႈ 23/7/2021 ၸႄႈဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်း ၸၢၼ်း ႁၼ်ၵူၼ်းၸပ်းၶူဝ်ႊဝိတ်ႉ ထႅင်ႈၵေႃႉ႞ ယၢမ်းလဵဝ် မီးၵႂႃႇ 30 ၵေႃႉ လူႉတၢႆပႆႇမီး လႆႈၶႂၢင်ႉလူင်းႁူင်းယႃယဝ်ႉ ၵေႃႉၼိုင်ႈ ။ ၾၢႆႇၼိုင်ႈ တီႈလၢႆးၶႃႈၼႆႉ မီးၵူၼ်း ပၢႆႈၽေး သိုၵ်းဝႆႉ မွၵ်ႈ 600 ၵေႃႉၼႆႉ ဝႃႈၼႆ။
ၸၢႆးၵွင်ၶမ်း ၽူႈတႅၼ်းသၽႃးၸႄႈဝဵင်းလၢႆးၶႃႈ ဢၼ်ဢွင်ႇပေႉပၢင်လိူၵ်ႈ မိူဝ်ႈပီ 2020 ၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ – “တီႈလၢႆးၶႃႈႁဝ်းၶႃႈတႄႉ ၵူၼ်းပဵၼ်ၶူဝ်ႊဝိတ်ႉမီး 30 ၵေႃႉယဝ်ႉ။ ၼႂ်းလိူၼ်ၵျူႊလၢႆႊၼႆႉ ၵူတ်ႇထတ်းႁၼ် ၵူၼ်းပိုၼ်ႉတီႈဝၢၼ်ႈႁူဝ် လူမ်း ဢိူင်ႇတၢတ်ႇမွၵ်ႇ တိတ်းၸပ်းၸိူဝ်ႉမႅင်း 3 ၵေႃႉ။ ၼႂ်းဢိူင်ႇတၢတ်ႇမွၵ်ႇၼၼ်ႉသမ်ႉ မီး ၵူၼ်းပၢႆႈၽေးသိုၵ်းဝႆႉၶႃႈ ဢေႃႈၼၼ်ႉ လွင်ႈၵိၼ်ယႅမ်ႉၵေႃႈလႆႈမႆႈၸႂ် လွင်ႈတၢင်းပဵၼ်ၼႆႉၵေႃႈလႆႈမႆႈၸႂ်ႁႅင်းၶႃႈဢေႃႈတႃႇၵူၼ်းပၢႆႈၽေး။ ၵူၺ်းၵႃႈ ၵူၼ်းပဵၼ်ၼၼ်ႉတႄႉ လႆႈဢဝ်မႃးယူတ်းယႃဝႆႉတီႈႁူင်းယႃယဝ်ႉ။ ၵိုတ်းၵူၼ်းၸိူဝ်းယူႇၸမ် ၵူၼ်းပဵၼ်ၼၼ်ႉၵူၺ်း လႆႈ ၵၵ်းတူဝ် Home Quarantine ၵၼ်ဝႆႉ၊ ၼႂ်းၵူၼ်းပၢႆႈၽေးတႄႉပႆႇမီးတၢင်းပဵၼ်ၶႃႈ”- ဝႃႈၼႆ။
ယၢမ်းလဵဝ် ၼႂ်းၸႄႈဝဵင်းလၢႆးၶႃႈၼႆႉ ၵိုတ်းဝႆႉၵူၼ်းပၢႆႈၽေးသိုၵ်း တင်းမူတ်းမွၵ်ႈ 600 ၵေႃႉ ပဵၼ်ၵူၼ်းတၢင်းဝဵင်းၵေးသီး လႄႈ မိူင်းၵိုင် ၼႆယဝ်ႉ။
ၸၢႆးလွႆၶမ်းပၢင်ႇ ၽူႈၸွႆႈထႅမ် ၵူၼ်းပၢႆၽေးသိုၵ်း ၼႂ်းၸိုင်ႈတႆးပွတ်းၸၢၼ်း လၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းပၢႆႈၽေး သိုၵ်း တီႈၸလၢႆးၶုမ်ႇ ၊ တၢတ်ႇမွၵ်ႇ – ႁူဝ်လူမ်း ၸိူဝ်းၼႆႉ ဢွၼ်ၵၼ်ပွၵ်ႈႁိူၼ်းယေးယဝ်ႉၶႃႈ။ ဢၼ်ၵိုတ်းယူႇယၢမ်းလဵဝ် တီႈပွၵ်ႉ 4 ဝဵင်းလၢႆးၶႃႈ ဝၢၼ်ႈထီႇလႄႈ ဝၢၼ်ႈၼမ်ႉလိူဝ်ႇ ၸိူဝ်းၼႆႉၵူၺ်း ၵူၼ်းပၢႆႈၽေး ဢၼ်ၵိုတ်းဝႆႉ ၸိူဝ်းၼႆႉတႄႉ ပဵၼ်ၵူၼ်းမိူင်းၵိုင်တင်း ၵေးသီး။ ပၢင်တိုၵ်းတႄႉ ယဵၼ်ယဝ်ႉသေတႃႉ ၵူၺ်းၵႃႈ ပႂ်ႉႁႂ်ႈငဝ်းလၢႆးမၼ်းၵတ်းယဵၼ်တႄႉတႄႉ ၸင်ႇတေ ပွၵ်ႈမိူဝ်းၶႃႈဢေႃႈ ပေႃးပွၵ်ႈမိူဝ်ႈယဝ်ႉ ပႆႇႁိုင် သဵင်ႈၵွင်ႈတႅၵ်ႇသေ တေလႆႈပၢႆႈမႃးၶိုၼ်း ၼႆႁဵတ်းၼႆလႈ ထႅင်ႈ ၾၢႆႇၼိုင်ႈၵေႃႈ တၢင်းပဵၼ်ၶူဝ်ႊဝိတ်ႉၼႆႉသေ တေပႆႇၸၢင်ႈပွၵ်ႈမိူဝ်းၵၼ် ပႂ်ႉတူၺ်းငဝ်းလၢႆးယူႇ”- ဝႃႈၼႆ။
ၵူၼ်းပၢႆႈၽေးသိုၵ်း ဢၼ်တိုၵ်ႉၵိုတ်းဝႆႉ တီႈလၢႆးၶႃႈၼႆႉ တီႈပွၵ်ႉ 4 မီး 21 ၵေႃႉ၊ တီႈၼမ်ႉလိူဝ်ႇ မီး မွၵ်ႈ 460 လႄႈ တီႈဝၢၼ်ႈ ထီႇသမ်ႉ မွၵ်ႈ 60 ၼႆယဝ်ႉ။
“ၵူၼ်းပိုၼ်ႉတီႈၵေႃႈလီ ၵူၼ်းပၢႆႈၽေးသိုၵ်းၵေႃႈလီ သင်ဝႃႈ မီးလွင်ႈထၢင်ႇထိူမ် မီးႁၢင်ႈၾၢင် ဢႆ တွင်ႉႁေႈ ၼၢဝ် ၸိူဝ်းၼႆႉ ထၢင်ႇထိူမ်ဢမ်ႇပေႃးယုမ်ႇတူဝ်ၸဝ်ႈၵဝ်ႇၼႆၸိုင် ႁႂ်ႈၵပ်းၸူးတီႈၾၢႆႇပၢႆးယူႇလီၵေႃႈလႆႈ ဢမ်ႇၼၼ် ပွင်ႇၸူးထိုင်ပူႇၵေႇ/ ၵၢင်ႉၵေႃႈလႆႈ ယၢမ်းလဵဝ် တီႈၼႂ်းလၢႆးၶႃႈၼႆႉ မီးၸုမ်းပရႁိတဝႆႉ ရူတ်ႉၵႃး ႁပ်ႉၽေးၵိုင်ႉၵၢင်ႉၸိူဝ်းၼႆႉၵေႃႈမီးဝႆႉ ပေႃးဝႃႈ တူဝ်ၸဝ်ႈၵဝ်ႇၶႂ်ႈထတ်းတူၺ်းတၢင်းပဵၼ် ဝႃႈပဵၼ်ဢမ်ႇပဵၼ်ဢၼ်ဝႃႈၼၼ်ႉ သင်ဝႃႈ ၵပ်းသိုပ်ႇမႃးၼႆ ယူႇတီႈၽူႈမီးပုၼ်ႈ ၽွၼ်းၶဝ် တေမိူဝ်းႁွင်ႉမႃးၵူတ်ႇထတ်းပၼ်ၶႃႈ”- ၸၢႆးၵွင်ၶမ်း သိုပ်ႇလၢတ်ႈၼႄထႅင်ႈၼင်ႇၼႆ။
ယၢမ်းလဵဝ် ၼႂ်းမိူင်းတႆးပတ်းပိုၼ်ႉ တႄႇဢဝ် လိူၼ်ၵျုၼ်ႊမႃးတေႃႇထိုင်လိူၼ်ၵျုႊလၢႆႊၼႆႉ ၵူၼ်းတိတ်းၸပ်း ၸိူဝ်ႉမႅင်းၶူဝ်ႊဝိတ်ႉ 19 တင်းမူတ်းမီးၵႂႃႇ 8,000 ပၢႆယဝ်ႉ လူႉတၢႆ ဢမ်ႇယွမ်း 200 ၵေႃႉၼႆႉယဝ်ႉ ဝႃႈၼႆ။
