ၵိင်ႇၽႄဝဵင်းမိူင်းငေႃႉ ဝဵင်ၵျွၵ်ႉမႄး ၵူတ်ႇထတ်းႁၼ် ၵူၼ်းတိတ်းၸပ်း ၶူဝ်ႊဝိတ်ႉ 19 ထႅင်ႈၵေႃႉၼိုင်ႈ တင်းမူတ်း ၵူတ်ႇ ထတ်းႁၼ် မီး 3 ၵေႃႉယဝ်ႉ တီႈၼၼ်ႈသမ်ႉ မီးဝႆႉ ၵူၼ်းပၢႆႈၽေးသိုၵ်းမႃးသွၼ်ႈဝႆႉ မွၵ်ႈ 500 ဝႃႈၼႆ။

မိူဝ်ႈဝႃးဝၼ်းတီႈ 22/7/2021 ၵိင်ႇၽႄၸႄႈဝဵင်းမိူင်းငေႃႉ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ၵူတ်ႇထတ်းႁၼ် ၵူၼ်း တိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 ၵေႃႉ႞ ပဵၼ်ၽူႈၸၢႆး လုၵ်ႉၸႄႈဝဵင်းမၢၼ်ႈမေႃႇမႃး မၼ်းၸၢႆးဢမ်ႇလႆႈသႅဝ်ဢၢႆသင်သေ ၵႂႃႇၵူတ်ႇထတ်းလႄႈထူပ်းႁၼ် ၸိူဝ်ႉမႅင်း ၼႆယဝ်ႉ။

ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈၵျွၵ်ႉမႄး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ပၢင်တိုၵ်းသိုၵ်းသိူဝ်ၵေႃႈ လႆႈၵူဝ်၊ တၢင်းပဵၼ်ၶူဝ်ႊဝိတ်ႉ 19 ၼႆႉၵေႃႈလႆႈၵူဝ်၊ ယၢမ်းလဵဝ်ၼႆႉသမ်ႉ ပဵၼ်ၶၢဝ်းၾူၼ်သေ တၢင်းပဵၼ်ၼၢဝ်ၼူၵ်ႉ/ ၼၢဝ် သၼ်ႇ ၸိူဝ်းၼႆႉၵေႃႈလႆႈၵူဝ်ပႃး။ တီႈၵူၼ်းပၢႆႈၽေးသိုၵ်း မီးၵူၼ်းပဵၼ်တၢင်းပဵၼ်ၼၢဝ် ဢမ်ႇယူႇလီ ၵူၼ်ႉၶိုၼ်ႈၸိူဝ်းၼႆႉ  ။ ယႃႈယႃ ၵေႃႈ လူဝ်ႇၶႃႈဢေႃႈ”- ဝႃႈၼႆ။

ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉတီႈမိူင်းငေႃႉၼႆႉ ပဵၼ်ၵူၼ်းၼႂ်းဢိူင်ႇတေႃႉသၢင်ႇပၢႆႈမႃး တင်ႈတႄႇႁူဝ်လိူၼ်ၵျူႊ လၢႆႊၼႆႉမႃး တေႃႇထိုင်ယၢမ်းလဵဝ် ပႆႇၸၢင်ႈပွၵ်ႈ ႁိူၼ်းယေးၵၼ် ဝႃႈၼႆ။

“ၵူၼ်းပၢႆႈၽေးတီႈမိူင်းငေႃႉၼႆႉ ၶႂ်ႈဝႃႈမီးၽၢၵ်ႇလိူၼ်ပၢႆယဝ်ႉ မၢင်ၵေႃႉ ပွၵ်ႈမိူဝ်းႁိူၼ်းၵၼ်ၵေႃႈမီးယူႇ ယွၼ်ႉတၢင်းႁိူၼ်း သမ်ႉ မီးၵူၼ်းထဝ်ႈ ဝူဝ်းၵႂၢႆးဝႆႉ ၸိူဝ်းၼႆႉ မႆႈၸႂ်သေ မိူဝ်းၵၼ်။ မၢင်ၵေႃႉၵေႃႈပၢႆႈမႃးယူႇၸွမ်းႁိူၼ်းပီႈၼွင်ႉၼႂ်းဝဵင်း။ မၢင် ၵေႃႈသမ်ႉ ဢွၵ်ႇတၢင်းၼွၵ်ႈၵႂႃႇမႃးတီႈၼိုင်ႈယဝ်ႉတီႈၼိုင်ႈလႄႈ လွင်ႈၼႆႉၵေႃႈ လီမႆႈၸႂ်ယူႇ သင်ပွၵ်ႈၶဝ်ႈမႃးၶိုၼ်း ၵူဝ် တိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 သေမႃးၼၼ်ႉၵူၺ်းယဝ်ႉ”- ၽူႈၸွႆႈထႅမ်ၵူၼ်းပၢႆႈၽေးသိုၵ်း သိုပ်ႇလၢတ်ႈၼႄၼင်ႇၼႆ။

ယၢမ်းလဵဝ် ၵိင်ႇၽႄၸႄႈဝဵင်းမိူင်းငေႃႉၼႆႉ ၵူတ်ႇထတ်းႁၼ်ဝႆႉ ၵူၼ်းတိတ်းၸပ်း ၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 တင်း မူတ်းမီးၵႂႃႇ 3 ၵေႃႉယဝ်ႉ။ ၵူၼ်းၸိူဝ်းၵဵဝ်ႇၶွင်ႈယူႇၸမ် ၵူၼ်းပဵၼ်ၸိူဝ်းၼၼ်ႉတႄႉ လႆႈထုၵ်ႇၵၵ်းတူဝ် Home Quarantine ၵၼ်ဝႆႉ ဝႃႈၼႆ။