တၢင်းပဵၼ်ၶူဝ်ႊဝိတ်ႉ 19 ၽႄႈလၢမ်း ႁၢဝ်ႈႁႅင်းလႄႈ ၵၢတ်ႇလူင်တင်း ႁူင်းႁဵၼ်းလူင်ပွင်ၸိုင်ႈ တေပိၵ်ႉဢိုတ်းတေႃႇထိုင်လိူၼ် ၼႆႉသဵင်ႈ။

ႁၢင်လိူၼ်ၵျုၼ်ႊမႃး တေႃႇထိုင်ဝၼ်းတီႈ 22/7/2021 ၼႆႉ ၼႂ်းၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း ထတ်းႁၼ် ၵူၼ်းတိတ်းၸပ်း ၸိူဝ်ႉမႅင်း ၶူဝ်ႊဝိတ်ႉ 19 တင်းမူတ်း မီး 99 ၵေႃႉ ၼႂ်းၼၼ်ႉ လူင်းႁူင်း ယႃယဝ်ႉ 21 ၵေႃႉ ၵိုတ်း 78 ၵေႃႉ ။ ယွၼ်ႉတၢင်းပဵၼ်ၼႆႉ ၽႄႈလၢမ်း ႁၢဝ်ႈႁႅင်းလႄႈ ၵၢတ်ႇလူင်ၵဵင်းတုင် လႄႈ ႁူင်းႁဵၼ်းၵူႈၸၼ်ႉၸၼ်ႉ တေႃႇၸၼ်ႉၸွမ် တေပိၵ်ႉဢိုတ်းဝႆႉတေႃႇလိူၼ်ၼႆႉသဵင်ႈ။

ၵူၼ်းၶၢႆၶူဝ်း ၼႂ်းၵၢတ်ႇလူင်ႇ ၵဵင်းတုင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၵၢတ်ႇၼႆႉ တေပိၵ်ႉဢိုတ်း တေႃႇထိုင် လိူၼ် ၼႆႉသဵင်ႈၶႃႈ ယွၼ်ႉၵူၼ်းပဵၼ် တိူဝ်းၼမ်မႃးတိၵ်းတိၵ်းလႄႈ မိူဝ်ႈဝႃး ဝၼ်းလဵဝ်ၵူၺ်း မီးၵူၼ်းတိတ်းၸပ်း ၸိူဝ်ႉမႅင်း 15 ၵေႃႉ ၵမ်ႈလဵဝ်”- ဝႃႈၼႆ။

ယၢမ်းလဵဝ် ၼႂ်းၸႄႈဝဵင်းၵဵင်းတုင်ၼႆႉ မၢင်ဢိူင်ႇ/ပွၵ်ႉလႄႈ မၢင်ဝၢၼ်ႈၵေႃႈ Lockdown ဝႆႉ ဢမ်ႇပၼ် ၵူၼ်းၶဝ်ႈဢွၵ်ႇၵႂႃႇမႃး ၵူဝ်တၢင်းပဵၼ်ၶူဝ်ႊဝိတ်ႉ 19 ၽႄႈၸပ်းၵၼ် ။

ၵူၼ်းၼုမ်ႇ ၵဵင်းတုင် ၵေႃႉၼိုင်ႈၵေႃႈ လၢတ်ႈၼႄၽူႈတွႆႇႁွၵ်ႈဝႃႈ – “တီႈၵဵင်းတုင်ၼႆႉ လွင်ႈပိၵ်ႉဢိုတ်းဝၢၼ်ႈ ႁၢမ်ႈၵူၼ်းၶဝ်ႈ ဢွၵ်ႇၵႂႃႇမႃးၼႆႉ ၶႂ်ႈဝႃႈပိၵ်ႉဢိုတ်းၵၼ် ၵူႈဝၢၼ်ႈ ၵူႈဢိူင်ႇယဝ်ႉဢေႃႈ။ မိူဝ်ႈၼမ်ႉထူမ်ႈ ပူၼ်ႉမႃး ဝၼ်းသွင်ဝၼ်းၼႆႉ ႁဝ်းၶႃႈတေၵႂႃႇၸွႆႈႁိူၼ်းပီႈၼွင်ႉ ထႅင်ႈတၢင်ႇဝၢၼ်ႈၼႆ ၵႂႃႇဢမ်ႇလႆႈၶႃႈလူင် ဝၢၼ်ႈၶဝ်ပိၵ်ႉဢိုတ်းဝႆႉ ႁၢမ်ႈၵႂႃႇမႃး တၢင်းၶဝ်ႈ တၢင်းဢွၵ်ႇ ဝႆႉ ၵမ်းလဵဝ်ဢေႃႈ။ တိုၼ်းဢမ်ႇၸၢင်ႈ ၵႂႃႇၸွႆႈလႆႈၶႃႈ”- ဝႃႈၼႆ။

ယွၼ်ႉတၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းႁၢဝ်ႈႁႅင်းထႅင်ႈပွၵ်ႈၵမ်းသၢမ်ၼႆႉသေ ၵၢတ်ႇလူင် ဝဵင်းၵဵင်းတုင် ၵၢတ်ႇၼွင်ၵွၼ်ႇ လႄႈ ၵၢတ်ႇယၢင်းၶမ်း ၸိူဝ်းၼႆႉ တႄႇပိၵ်ႉဢိုတ်းမႃး တင်ႈတႄႇ ဝၼ်းတီႈ 13/7/2021 ၼၼ်ႉ တေပိၵ်ႉၵႂႃႇ တေႃႇထိုင်လိူၼ်ၼႆႉသဵင်ႈ။ ယဝ်ႉၵေႃႈ ႁူင်းႁဵၼ်းလူင်ပွင်ၸိုင်ႈမၢၼ်ႈ တေသိုပ်ႇပိၵ်ႉဢိုတ်းၵႂႃႇထႅင်ႈ တေႃႇထိုင် ဝၼ်း တီႈ 8/8/2021 ၼႆယဝ်ႉ။