မိူင်းတႆး ပွတ်းဢွၵ်ႇၶူင်း ၼႂ်းၸႄႈဝဵင်းမိူင်းပဵင်း ၼၼ်ႉ ၾၢႆႇပၢႆးယူႇလီ ၵူတ်ႇထတ်း ႁူပ်ႉႁၼ် ၵူၼ်းတိတ်းၸပ်း တၢင်းပဵၼ်ၶူဝ်ႊဝိတ်ႉ 19 တင်းမူတ်းမီး 96 ၵေႃႉ။
ဝၼ်းတီႈ 22/7/2021 ယၢမ်းဝၢႆးဝၼ်းၼႆႉ ၼႂ်းၸႄႈဝဵင်းမိူင်းပဵင်း ၸႄႈတွၼ်ႈၵဵင်းတုင် ၸိုင်ႈတႆးပွတ်းဢွၵ်ႇၶူင်း ၵူတ်ႇထတ်း ႁၼ်ထႅင်ႈၵေႃႉၼိုင်ႈ ယၢမ်းလဵဝ် တင်းမူတ်းမီးၵႂႃႇ 96 ၵေႃႉ။ ၼႂ်းၼၼ်ႉ ယႃၶႅၼ်းသေ လႆႈလူင်းႁူင်းယႃ 35 ၵေႃႉ ။
ၽူႈၸွႆႈထႅမ်တူင်ႇဝူင်းၵူၼ်း ၼႂ်းၸႄႈဝဵင်းမိူင်းပဵင်းၵေႃႉၼိုင်ႈ လၢတ်ႈတီႈၽူႈ တွႆႇ ႁွၵ်ႈဝႃႈ – “တေႃႇထိုင် ၼႂ်ၼႆႉ မီး 95 ၵေႃႉ။ ဝၢႆးဝၼ်းၼႆႉ ႁၼ်ထႅင်ႈၵေႃႉ ၼိုင်ႈ။ တေႃႈလဵဝ်မီးၵႂႃႇ 96 ၵေႃႉယဝ်ႉ။ ႁူဝ်ၶမ်ႈၼႆႉ တိုၵ်ႉၵူတ်ႇထတ်းၸဝ်ႈၵႃးဝႆႉထႅင်ႈယူႇ ယင်းတေတိူဝ်းမႃးထႅင်ႈႁိုဝ်ဢမ်ႇႁူႉ”- ဝႃႈၼႆ။
မိူင်းပဵင်းၼႆႉ ၶဝ်ႈပႃးၼႂ်းၸႄႈတွၼ်ႈၵဵင်းတုင်။ ၵူၼ်းၸပ်း ၶူဝ်ႊဝိတ်ႉ 19 တီႈဝဵင်းမိူင်းပဵင်း ၼမ်လိူဝ်ၵဵင်းဝႆႉ။
မိူဝ်ႈၼႆႉ ဝၼ်းတီႈ 22/7/2021 တီႈဝဵင်းၵဵင်းတုင် ၵူၼ်းၸပ်းတၢင်းပဵၼ်ၶူဝ်ႊဝိတ်ႉ 19 မီး 92 ၵေႃႉ ။ ၼႂ်းၼၼ်ႉ လႆႈၶႂၢင်ႉလူင်းႁူင်းယႃၵႂႃႇယဝ်ႉ 19 ၵေႃႉ တိုၵ်ႉယူတ်းယႃဝႆႉယူႇ 73 ၵေႃႉ ။
