ၶၢဝ်းတၢင်းၼိုင်ႈလိူၼ်မႃးၼႆႉ ၼႂ်းၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ မီးၵူၼ်းတိတ်းၸပ်း ၸိူဝ်ႉမႅင်း ၶူဝ်ႊဝိတ်ႉ 19 တင်းမူတ်း 436 ၵေႃႉ၊ လူႉတၢႆ 21 ၵေႃႉယဝ်ႉ ဝႃႈၼႆ။
တႄႇဢဝ် ဝၼ်းတီႈ 19/6/2021 မႃးထိုင် ဝၼ်းတီႈ 19/7/2021 ယၢမ်းဝၢႆးဝၼ်း 4 မူင်း ၼႂ်းၶၢဝ်းတၢင်း ၼိုင်ႈလိူၼ် ၼႆႉ ၼႂ်းၸႄႈဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ မီးၵူၼ်းတိတ်းၸပ်း ၸိူဝ်ႉမႅင်းတၢင်းပဵၼ် ၶူဝ်ႊ ဝိတ်ႉ 19 တင်းမူတ်း 436 ၵေႃႉ၊ လူႉတၢႆ 21 ၵေႃႉ၊ လႆႈၶႂၢင်ႉလူင်းႁူင်းယႃ 201 ၵေႃႉလႄႈ တိုၵ်ႉ ယူတ်းယႃဝႆႉ 214 ၵေႃႉ ၼႆယဝ်ႉ။
တီႈဝဵင်းၼမ်ႉၶမ်းၼႆႉ ၵူၼ်းတႄႇတိတ်းၸပ်းတၢင်းပဵၼ်ၶူဝ်ႊဝိတ်ႉ 19 မိူဝ်ႈဝၼ်းတီႈ 19 လိူၼ်ၵျုၼ်ႊ ။ ၵူၼ်းတိတ်းၸပ်းၵေႃႉဢွၼ်တၢင်းသုတ်းပဵၼ် ၼၢင်းယိင်းဢွၼ်ႇ ဢႃယု 19 ပီ။
ၼႂ်းၼႂ်းၵူၼ်းတိတ်းၸပ်းတင်းမူတ်း 400 ပၢႆၼႆႉ ဢၼ်လူႉတၢႆ မီး 21 ၵေႃႉ။ ပဵၼ်ၽူႈၸၢႆး 5 ၵေႃႉ၊ ၼၢင်းယိင်း 16 ၵေႃႉ။ ၼႂ်း ၼၼ်ႉ ဢႃယု 30 ပီ 3 ၵေႃႉ၊ ဢႃယု 30 ပီ – 39 ပီ 4 ၵေႃႉ၊ ဢႃယု 40 ပီ – 49 ပီ 3 ၵေႃႉ၊ ဢႃယု 50 ပီ – 59 ပီ 2 ၵေႃႉ၊ ဢႃယု 60 ပီ – 69 ပီ 4 ၵေႃႉလႄႈ ဢႃယု 70 ပီ ၶိုၼ်ႈၼိူဝ် 5 ၵေႃႉ လႆႈႁူႉၸွမ်းၾၢႆႇပၢႆးယူႇလီၸႄႈဝဵင်းလၢတ်ႈ- ၵူၼ်းၼမ်ႉၶမ်းၵေႃႉၼိုင်ႈလၢတ်ႈၼင်ႇၼႆ။
ၼႂ်းၵူၼ်းလူႉတၢႆ 21 ၵေႃႉၼႆႉ ႁွတ်ႈထိုင်ႁူင်းယႃ ၶၢဝ်းတၢင်း 24 ၸူဝ်ႈမူင်းသေလူႉတၢႆမိး 8 ၵေႃႉ၊ ဢၼ်ႁွတ်ႈႁူင်းယႃ 3 ဝၼ်းသေၸင်ႇလူႉတၢႆမီး 6 ၵေႃႈ၊ ဢၼ်လႆႈယူႇတီႈႁူင်းယႃ ထိုင် 10 ဝၼ်းလူႉတၢႆ 5 ၵေႃႉလႄႈ ဢၼ်လႆႈယူႇတီႈႁူင်းယႃ 10 ဝၼ်းပၢႆသေ ၸင်ႇလူႉတၢႆ မီး 2 ၵေႃႉ။
လွင်ႈၵူတ်ႇထတ်းတၢင်းပဵၼ် ၶူဝ်ႊဝိတ်ႉ 19 တီႈၸႄႈဝဵင်းၼမ်ႉၶမ်းသမ်ႉ ၵူတ်ႇထတ်းပၼ် တီႈႁူင်းႁေႃးပၢင်ၵုမ် ႁူင်းယႃ ၼမ်ႉၶမ်း တႄႇဢဝ် ယၢမ်းၵၢင်ၼႂ် 9 မူင်း ထိုင် 12 မူင်းၵၢင်ဝၼ်းၵမ်းၼိုင်ႈ၊ တႄႇဢဝ် 2 မူင်းဝၢႆးဝၼ်း ထိုင် 4 မူင်း ထႅင်ႈ ၵမ်းၼိုင်ႈ ၵူတ်ႇထတ်းပၼ် ၼႂ်းဝၼ်းၸၼ် ထိုင်ဝၼ်းသုၵ်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ