ၼႂ်းၸႄႈဝဵင်းၵဵင်းတုင် ၵူတ်ႇထတ်းႁၼ် ၵူၼ်းတိတ်းၸပ်း ၸိူဝ်ႉမႅင်းတၢင်းပဵၼ် ၶူဝ်ႊဝိတ်ႉ 19 တင်းမူတ်းမီးၵႂႃႇ 70 ပၢႆယဝ်ႉ လူႉတၢႆတႄႉ ပႆႇမီး ဝႃႈၼႆ။

မိူဝ်ႈၼႆႉ ဝၼ်းတီႈ 19/7/2021 ၵူတ်ႇထတ်းႁၼ်ထႅင်ႈ ၵူၼ်းတိတ်းၸပ်းၸိူဝ်ႉမႅင်းတၢင်းပဵၼ် ၶူဝ်ႊဝိတ်ႉ 19 ၼႂ်းၸႄႈဝဵင်း ၵဵင်းတုင် ၸိုင်ႈတႆးပွတ်းဢွၵ်ႇၶူင်း တေႃႇထိုင်ယၢမ်းဝၢႆးဝၼ်းၼႆႉ မီးၵႂႃႇ 77 ၵေႃႉယဝ်ႉ။  ယူတ်းယႃၶႅၼ်းၸိုၼ်ႈသေ လူင်းႁူင်းယႃယဝ်ႉ 10 ၵေႃႉ တိုၵ်ႉယူတ်းယႃတူဝ်ဝႆႉယူႇ တီႈႁူင်းယႃသမ်ႉ 67 ၵေႃႉ ၼႆယဝ်ႉ။

ၸၢႆးႁွမ်ၼွႆႉ ၶွမ်ႊမတီႊႁႃငိုၼ်းၵွင်ၵၢင်လႄႈ ႁႄႉၵင်ႈတၢင်းပဵၼ်ၶူဝ်ႊဝိတ်ႉ ၸႄႈ တွၼ်ႈၵဵင်းတုင် လၢတ်ႈတီႈၽူႈတွႆႇ ႁွၵ်ႈ ဝႃႈ-“ယၢမ်းလဵဝ် တီႈၵဵင်းတုင် ၵူတ်ႇထတ်းႁၼ်ဝႆႉ ၵူၼ်းတိတ်းၸပ်း ၸိူဝ်ႉမႅင်း တင်းမူတ်းမီးၵႂႃႇ 77 ၵေႃႉယဝ်ႉ။ ၼႂ်းၼၼ်ႉ လႆႈၶႂၢင်ႉလူင်းႁူင်းယႃယဝ်ႉ 10 ၵေႃႉ တိုၵ်ႉသိုပ်ႇယူတ်းယႃဝႆႉ 67 ၵေႃႉ။ မိူဝ်ႈၼႆႉ ယၢမ်းဝၢႆးဝၼ်းၼႆႉ ၵူတ်ႇထတ်း ႁၼ်ထႅင်ႈ ၵေႃႉၼိုင်ႈ။ တီႈၵဵင်းတုင်တႄႉ လူႉတၢႆတႄႉပႆႇမီး”- ဝႃႈၼႆ။

ယၢမ်းလဵဝ် ၵူၼ်းပဵၼ်ၸိူဝ်းမႅင်းၼႆႉ လႆႈသူင်ႇယူတ်းယႃတူဝ်တီႈ ႁူင်းယႃလူင် ၵဵင်းတုင်ဝႆႉယဝ်ႉ။ ၼွၵ်ႈလိူဝ်ၼၼ်ႉ ၵူၼ်းမိူင်း ၸိူဝ်းၵဵဝ်ႇၶွင်ႈ ယူႇၸမ် ၵူၼ်းပဵၼ် တိတ်းၸပ်းၸိူဝ်းမႅင်းၼၼ်ႉသမ်ႉ ဢၼ်လုၵ်ႉတၢင်းတူၼ်ႈတီးၶဝ်ႈ မႃးၼႂ်းၵဵင်းတုင် လႄႈသင် ဢၼ်လုၵ်ႉတၢင်းတႃႈၶီႈလဵၵ်းသေ ၶဝ်ႈမႃးၼႂ်းၵဵင်းတုင် ၸိူဝ်းၼႆႉ လႄႈသင် လႆႈသူင်ႇၵၵ်းတူဝ် ပႂ်ႉတူၺ်းငဝ်းလၢႆး ဝႆႉတီႈၸၼ်ႉၸွမ်ၵဵင်းတုင် ၸိူဝ်းၼႆႉဝႆႉၵေႃႈမီး ဝႃႈၼႆ။

ၼွၵ်ႈလိူဝ်ၼၼ်ႉ တွၼ်ႈတႃႇ ၵူၼ်းပဵၼ် ပေႃးတေမီးၸႂ်ႉ မေႃႈဢွၵ်ႊသီႊၵျိၼ်ႊၵုမ်ႇထူၼ်ႈလႆႈလီၼၼ်ႉ ယူႇတီႈ ၶွမ်ႊမၻီႊၶူဝ်ႊဝိတ်ႉ 19 ၸႄႈတွၼ်ႈၵဵင်းတုင် ႁၢင်ႈႁႅင်း သိုဝ်ႉ ၶိူင်ႈၸၢၵ်ႈဢွၵ်ႊသီႊၵျိၼ်ႊ တီႈမိူင်းၶႄႇဝႆႉ ပေႃးလိူၼ်ၼႆႉ သဵင်ႈ တေလုၵ်ႉမိူင်းၶႄႇ သူင်ႇၸူးတႃႈၵုင်ႈ ဝႃႈၼႆ။

“ယၢမ်းလဵဝ် ႁဝ်းၶႃႈ လႆႈငိုၼ်းလူႇၶၢမ်ႇဝႆႉ တႃႇသိုဝ်ႉ ၶိူင်ႈၸၢၵ်ႈဢွၵ်ႊသီႊၵျိၼ်ႊ မႃးတင်ႈတီႈၵဵင်းတုင်ၼႆႉ တင်းမူတ်း လႆႈဝႆႉ 1,700 သႅၼ်ပျႃးပၢႆ (56,000 တေႃႊလႃႊ) ၶိူင်ႈၸၢၵ်ႈၼႆႉ သင်ႇမႃးတၢင်းမိူင်းၶႄႇ လိူၼ်ၼႆႉသဵင်ႈ တေသႂ်ႇႁိူဝ်းသၢင်း ၽေႃးသေ သူင်ႇၸူးတႃႈၵုင်ႈ တေလုၵ်ႉတႃႈၵုင်ႈသေ သူင်ႇမႃးတၢင်းၵဵင်းတုင်။ ငိုၼ်း 1,700 သႅၼ်ပၢႆၼႆႉ လူင်ပွင်ၸိုင်ႈ ၵမ်ႉ ၸွႆႈ 200 သႅၼ် လိူဝ်ၼၼ်ႉ ၵူၼ်းမိူင်း တၢင်းပွတ်းဢွၵ်ႇၶူင်း ႁူမ်ႈၵၼ်လူႇတၢၼ်းၵမ်ႉထႅမ်မႃး တႃႇသိုဝ်ႉၶိူင်ႈၸၢၵ်ႈ၊ ယဝ်ႉ ၵေႃႈ မေႃႇသႂ်ႇဢွၵ်ႊသျိၼ်ႊၵျိၼ်ႊ၊ ဢွင်ႈတီႈဝႆႉ ၶိူင်ႈၸၢၵ်ႈ ၸိူဝ်းၼႆႉ။ ၶိူင်ႈၸၢၵ်ႈၼႆႉ ပေႃးမီးၾႆးသေ တၢႆႇတႃႇမူဝ်ႇပၼ်ႇ ၵေႃႈ တိူမ်းဢွၵ်ႊသျိၼ်ႊၸိၼ်ႊလႆႈယဝ်ႉၶႃႈ သင်ႇၶိူင်ႈၸိူင်ႉၼႆမႃးၶႃႈဢေႃႈ”- ၸၢႆးႁွမ်ၼွႆႉ သိုပ်ႇလၢတ်ႈၼႄထႅင်ႈၼင်ႇၼႆ။

တႃႇသႂ်ႇဢွၵ်ႊသီႊၵျိၼ်ႊ ၼၼ်ႉၵေႃႈ ယၢမ်းလဵဝ်မီး ၸဝ်ႈတႃႇၼ လူႇတၢၼ်းမႃး မေႃႈ  ဢွၵ်ႊသီႊၵျိၼ်ႊ တေမီးမွၵ်ႈ 200 ထင်။  ဢၢၼ်း တေ ၸႅၵ်ႇပၼ်လၢႆ တွၼ်ႈတႃႇၵူၼ်းပဵၼ်တိတ်းၸပ်း ၸိူဝ်းမႅင်းၶူဝ်ႊဝိတ်ႉ 19   ၼႂ်းမိူင်းတႆး ပွတ်းဢွၵ်ႇၶူင်း ၼႆယဝ်ႉ။

ယၢမ်းလဵဝ် ၼႂ်းၸႄႈဝဵင်း မိူင်းယွင်းၵေႃႈ မီးၵူၼ်းတိတ်းၸပ်း ၸိူဝ်ႉမႅင်းၶူဝ်ႊဝိတ်ႉ 19 ဝႆႉ တင်းမူတ်း 7 ၵေႃႉ။ ၼႂ်းၸႄႈဝဵင်း တႃႈၶီႈလဵၵ်း မီးၵူၼ်းတိတ်းၸပ်းဝႆႉ 700 လူႉတၢႆ 2 ၵေႃႉ လႆႈၶႂၢင်ႉလူင်းႁူင်းယႃယဝ်ႉ 169 သဵၼ်ႈမၢႆ တေႃႇထိုင်ဝၼ်းတီႈ 18 မိူဝ်ႈဝႃး ၼႆယဝ်ႉ။