ပေႃးထိုင်မႃး ဝၼ်းတီႈ 23/7/2021 ဝၼ်းသုၵ်းၼႆႉ ပဵၼ်ဝၼ်း ၶဝ်ႈဝႃႇသႃလႄႈ ပီၼႆႉၵေႃႈ တီႈၵဵင်းတုင် သင်ၶၸဝ်ႈၶိုင်ပၼ် ႁႂ်ႈၵူၼ်းမႃးၶဝ်ႈဝတ်ႉဝႃးႁပ်ႉသိလ် လူၺ်ႈလၢႆးၽႂ်မၼ်း ၊ ဢမ်ႇပၼ်ၶိုၼ်ႈၵျွင်း ၵမ်းလဵဝ်ၵၼ် ၊   တႃႇႁႄႉၵင်ႈတၢင်းပဵၼ်ၶူဝ်ႊဝိတ်ႉလၢမ်းၽႄႈ   ။  

ၸဝ်ႈၶူးၺႃႇၼသီႇရိ (ၸဝ်ႈမၢၼ်ႇတႃဢွၼ်ႇ) ႁူဝ်ပဝ်ႈ ငဝ်ႈငုၼ်းမုၵ်ႉၸုမ်းလူင် သင်ႇၶၸဝ်ႈ ၸိုင်ႈတႆးပွတ်းဢွၵ်ႇၶူင်း လၢတ်ႈတီႈၽူႈတွႆႇႁွၵ်ႈဝႃႈ – “ပီၼႆႉ ဢၼ်တေ ၶိုၼ်ႈဝတ်ႉ/ ၵျွင်းတႄႉၵေႃႈ တေမီးယူႇ ႁူဝ်ၵျွင်း/ ဝတ်ႉၽႂ်မၼ်း ။ ႁႂ်ႈပဵၼ် ၵူၼ်းတင်းၼမ်ႁူမ်ႈလူႇတၢၼ်းမိူဝ်ႈလဵဝ်ၵၼ် ၸိူင်ႉၼၼ်ႉတႄႉ တေဢမ်ႇမီးယဝ်ႉ။ ပေႃးဢဝ် ၼႂ်းမိူင်းၼႆႉဝႃႈၼႆ ၶဝ်ပေႃး ဢွၵ်ႇလိၵ်ႈဝႆႉယဝ်ႉ တေႃႇထိုင်ဝၼ်းတီႈ 25 ၼႆႉ ႁၢမ်ႈႁႄႉဝႆႉ။   ယႃႇပေဢွၵ်ႇႁိူၼ်းယေးၵၼ် ယႃႇပေၵႂႃႇ တီႈၵူၼ်းၼမ် ၼႆႉတႄႉ ပွင်ႇဝႃႈ ယႃႇပေၶိုၼ်ႈၵျွင်း/ ဝတ်ႉၼႆၵေႃႈ ပႃးၶႃႈယဝ်ႉ။ ၵူၺ်းၵႃႈ ယူႇတီႈ ငဝ်ႈငုၼ်းသင်ၶၸဝ်ႈ ပၢင် လူင်သေ ဢိၵ်ႇလိၵ်ႈဝႆႉတႄႉ ပႆႇမီး ပီၼႆႉ။ မိူဝ်ႈပီၵၢႆတႄႉၵေႃႈ ဢွၵ်ႇဝႆႉယူႇ။ ပီၼႆႉ တူၺ်းငဝ်းလၢႆးဝၢၼ်ႈမိူင်းသေ ယူႇၵႂႃႇ ၸွမ်းပိူင်မၼ်း”- ဝႃႈၼႆ။

 ပီၼႆႉ သိုၵ်းမၢၼ်ႈယိုတ်းမိူင်းဝႆႉလႄႈ ၽွင်းတၢင်းပဵၼ်ၶူဝ်ႊဝိတ်ႉ 19 လၢမ်းၽႄႈမႃးႁွပ်ႈ 3 ၼႆႉ ၾၢႆႇတၢင်း ႁွင်ႈၵၢၼ်ပၢႆးယူႇလီ၊ ႁွင်ႈၵၢၼ်ၵႅတ်ႇၵင်ႈတၢင်းပဵၼ်ၶူဝ်ႊဝိတ်ႉ ဢမ်ႇဢွၵ်ႇမၢႆမီႈ ၶဵင်ၶႅင်သင် သေဢမ်ႇၵႃး ဢမ်ႇတူၺ်းလူပၼ်ပၢႆးယူႇလီၵူၼ်းမိူင်းႁႂ်ႈတဵမ်ထူၼ်ႈလႆႈ မိူၼ်ၼင်ႇ လူင်ပွင်ၸိုင်ႈ ပီႈၵၢႆ။

ၸဝ်ႈၶူးၵုလိသ ၾၢႆႇယိပ်းငိုၼ်း လုမ်းသင်ႇၶႃႇၸိုင်ႈတႆး ပွတ်းဢွၵ်ႇၶူင်းၵေႃႈ လၢတ်ႈတီႈၽူႈတွႆႇႁွၵ်ႈဝႃႈ – “ပီၼႆႉ ၵေႃႈ တၵ်ႉၵႃႇ သတ်ႉထႃး မႃးၶိုၼ်ႈၵျွင်းၵေႃႈ တေလူႇၽႂ် လူႇမၼ်း။ တေဢမ်ႇလႆႈပူၼ်ႉ 30 ၵေႃႉ ၶိုၼ်ႈၼိူဝ် 50 ၵေႃႉၶိုၼ်ႈၼိူဝ် ပေႃးမႃးၵေႃႈ တေလႆႈၼင်ႈၵႆၵၼ် ယူႇၵႆၵၼ် တေလႆႈသႂ်ႇၽႃႈတူမ်းသူပ်း ၵႆႉလၢင်ႉ မိုဝ်း။ ၸွမ်းၼင်ႇ ပိူင်ပၢႆးယူႇလီၶဝ်မီးဝႆႉၼၼ်ႉ တေလႆႈႁဵတ်းၸွမ်း။ လွင်ႈၵူၼ်းထဝ်ႈတေ မႃး ၵမ်သိလ်တီႈဝတ်ႉ ၵေႃႈ ဢဝ်ၵမ်ႉၸႂ်ဝႃႈ ၵူၺ်းတေဢမ်ႇလႆႈလိူဝ် 30 ၵေႃႉ 50 ၵေႃႉၼၼ်ႉယဝ်ႉ ပေႃးမႃးၵေႃႈ တေလႆႈႁဵတ်းၸွမ်းပၵ်းပိူင်  ”- ဝႃႈၼႆ။

တၢင်းပဵၼ် ၶူဝ်ႊဝိတ်ႉ 19 ၽႄႈလၢမ်းႁၢဝ်ႈႁႅင်း မႃးပွၵ်ႈၵမ်း 3 ၼႆႉ    ၼႂ်းၸႄႈဝဵင်းၵဵင်းတုင် မီးၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19  –  70 ပၢႆယဝ်ႉ ဝႃႈၼႆ။။

ၼွၵ်ႈလိူဝ်ၼၼ်ႉ တႃႇတိူၵ်ႈသွၼ်လိၵ်ႈ သင်ၶၸဝ်ႈ ၼႂ်းၸိုင်ႈတႆးပွတ်းဢွၵ်ႇၶူင်းၵေႃႈ ယူႇတီႈဝတ်ႉၽႂ်မၼ်းသေ ႁၢမ်ႈႁႄႉဝႆႉ သင်ၶၸဝ်ႈတၢင်းၼႂ်းၵေႃႈ ဢမ်ႇပၼ်ဢွၵ်ႇ ၼွၵ်ႈဝတ်ႉ ။ ယဝ်ႉၵေႃႈ ၵူၼ်းတၢင်းၼွၵ်ႈတင်းၼမ် တေဢမ်ႇၶဝ်ႈၼႂ်းၵျွင်း ၸိူဝ်းၼႆႉၵေႃႈ ႁၢင်ႈႁႅၼ်းဝႆႉယူႇ ဝႃႈၼႆ။

လိူဝ်ၼၼ်ႉ တီႈထမ်ႈလူင် မိူင်းၵႅတ်ႇ ဢွင်ႈတီႈ ၸဝ်ႈၶူးဝႃးပေႃႈ ဝုၼ်းၸုမ်ႉ တိုဝ်းၵမ်သိလ်ဝႆႉၼၼ်ႉၵေႃႈ ႁၢမ်ႈသင်ၶၸဝ်ႈ လႄႈ တၵ်ႉၵႃႇသတ်ႉထႃး တီႈၸမ်ၵႆၶဝ်ႈ။ သင်ဝႃႈ သင်ၶၸဝ်ႈလႄႈ တၵ်ႉၵႃႇသတ်ႉထႃး ၶႂ်ႈလူႇတၢၼ်းၼႆၸိုင် ႁႂ်ႈၵပ်းၸူး သူင်ႇၸူး လူႇတၢၼ်းဝႆႉ တီႈလုၵ်ႈၼွင်ႉတပေး လုၵ်ႈသိတ်ႇ တီႈမိူင်းပဵင်းၵေႃႈလႆႈ ဢမ်ႇၼၼ် တီႈမိူင်းသၢတ်ႇၵေႃႈလႆႈ တေ ယူႇတီႈလုၵ်ႈသိတ်ႇ ဢၼ်ႁပ်ႉပုၼ်ႈၽွၼ်းဝႆႉတီႈမိူင်းပဵင်းလႄႈ မိူင်းသၢတ်ႇၼၼ်ႉ တေတေႃႉသူင်ႇ ႁပ်ႉၶူဝ်းလူႇတၢၼ်း ၼၼ်ႉသေ တေႃႉသူင်ႇၸူးတီႈမိူင်းၵႅတ်ႇဢဝ် ၸဝ်ႈၶူးၺႃႇၼသီႇရိ သိုပ်ႇလၢတ်ႈၼႄၼင်ႇၼႆ ထႅင်ႈ။