ၸဝ်ႈၵႃး ဢၼ်လုၵ်ႉတၢင်း ဝဵင်းလူင်တူၼ်ႈတီး မႃးလႄႈ ဢၼ်လုၵ်ႉတၢင်ႇတီႈသီႇလႅၼ်မႃးၸိူဝ်းၼၼ်ႉ ပေႃးဢမ်ႇၵူတ်ႇထတ်းၶူဝ်းဝိတ်ႉ တီႈႁူင်းယႃၶူဝ်လမ်ယဝ်ႉ သိုၵ်းမၢၼ်ႈပႂ်ႉၶူဝ်တႃႈၵေႃႈ ၼမ်ႉၶူင်းၼၼ်ႉ ဢမ်ႇပၼ်ၶၢမ်ႈ လႄႈ ၸိူင်ႉၶမ် ပဵၼ်ထႅဝ်။

မိူဝ်ႈဝၼ်းတီႈ 12/7/2021 ၼႆႉ ၸဝ်ႈရူတ်ႉၵႃး ဢၼ်လုၵ်ႉတၢင်းမၢၼ်ႈလတ်းတူၼ်ႈတီး မိူင်းတႆးပွတ်း ၸၢၼ်းမႃး၊ ဢၼ်လုၵ်ႉတၢင်ႇဝၢၼ်ႈတၢင်ႇဝဵင်းမႃး ၸိူဝ်းၼၼ်ႉ တၵ်းလႆႈထတ်း တၢင်းပဵၼ်ၶူဝ်းဝိတ်ႉ 19 တီႈႁူင်းယႃ ၶူဝ်လမ်။ တီႈႁူင်းယႃၶူဝ်လမ်သမ်ႉ ၶိူင်ႈၵူတ်ႇထတ်း တၢင်းပဵၼ်ၶူဝ်ႊဝိတ်ႉ 19 Test Kit ၼၼ်ႉမူတ်းဝႆႉလႄႈ ၸဝ်ႈၵႃးၵမ်ႈၼမ် ဢမ်ႇလႆၶၢမ်ႈၶူင်း၊ သိုၵ်းမၢၼ်ႈပႂ်ႉၶူဝ်တႃႈၵေႃႈ ၵေႃႈ ဢမ်ႇပၼ်ၶၢမ်ႈ။

ၵူၼ်းၶူဝ်လမ် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “တီႈၶူဝ်တႃႈၵေႃႈၼၼ်ႉ ၸဝ်ႈၵႃးၵူႈၵေႃႉ တေလႆႈၼႄဝႂ် သမ်းၶဵမ်ႁႄႉၶူဝ်းဝိတ်ႉယဝ်ႉ၊ ဢမ်ႇၼၼ် ဝႂ်ဢၼ်ၵူတ်ႇ ထတ်းၸိူဝ်ႉမႅင်း ၶူဝ်ႊဝိတ်ႉ 19 ယဝ်ႉ၊ ၵူၼ်းပႂ်ႉၶူဝ် ၸင်ႇပၼ်ၶၢမ်ႈၶူင်း။ တီႈႁူင်းယႃ ၶူဝ်လမ်ၼႆႉသမ်ႉ Test Kit မူတ်း၊ ဢမ်ႇလႆႈၵူတ်ႇ ထတ်းပၼ်ၶဝ်၊ ပေႃးၶဝ်ဢမ်ႇလႆႈဝႂ်တီႈႁူင်းယႃ ၵေႃႈ ဢမ်ႇလႆႈၶၢမ်ႈၶူင်းၼၼ်ႉၶႃႈၼႃႇ”- ဝႃႈၼႆ။

ၸွမ်းၼင်ႇ ႁွင်ႈၵၢၼ်ပၢႆးယူႇလီ ၾၢႆႇတႂ်ႈၵုမ်းၵမ် ၶွင်ႇသီႇသိုၵ်းမၢၼ်ႈ ၸီႉသင်ႇဝႆႉဝႃႈ သင်ဝႃႈ ၵူၼ်းမိူင်း ဢမ်ႇၼၼ် ၸဝ်ႈၵႃး ဢၼ်တေလုၵ်ႉတၢင်းပွတ်းတူၵ်းၶူင်း  ၶၢမ်ႈၵႂႃႇ ပွတ်းဢွၵ်ႇၶူင်းၼၼ်ႉ တၵ်း လႆႈမီးဝႂ်ႁပ်ႉႁွင်ႈ(သေးထွၵ်ႇၶၢမ်ႇၸႃႇ) ပၢႆး ယူႇလီ ၊ ဝႂ် ၵူတ်ႇထတ်းၶူဝ်ႊဝိတ်ႉယဝ်ႉလွင်ႈဝႃႈ ဢမ်ႇမီးတၢင်းပဵၼ်ၼႆယဝ်ႉ ၸင်ႇလႆႈၶၢမ်ႈၶူင်း။

ၸူဝ်ႈၶၢဝ်းၶူဝ်ႊဝိတ်ႉလၢမ်းၽႄႈမႃးၶိုၼ်းႁၢဝ်ႈႁႅင်းၼႂ်းလိူၼ်ၵျူႊလၢႆႊၼႆႉ သေလႆႈၵူတ်ႇထတ်းၶူဝ်ႊဝိတ်ႉႁၢဝ်ႈႁႅင်းၶိုၼ်းၼႂ်းဝူင်ႈၼႆႉၼႆႉ ၸဝ်ႈရူတ်ႉၸဝ်ႈၵႃးတၢင်ႇၵုၼ်ႇတၢင်ႇၵူၼ်း ဢၼ်လုၵ်ႉတၢင်ႇတီႈမႃးသေ လတ်းဝဵင်းၶူဝ်လမ် ဢမ်ႇပေႃးမီးၼမ်ယဝ်ႉ၊ ၼႂ်းဝၼ်း 2 ဝၼ်းၼႆႉယိင်ႈၶႅၼ်းလူတ်းလူင်းလိူဝ်ႁႅင်း ႁၼ် လမ်း သွင်လမ်းၵူၺ်းယဝ်ႉ ၵူၼ်းၶူဝ်လမ်ၵေႃႉၼိုင်ႈလၢတ်ႈၼင်ႇၼႆ။

ယၢမ်းလဵဝ် ၼႂ်းၵိင်ႇၸႄႈဝဵင်းၶူဝ်လမ် မီးၵူၼ်းတိတ်းၸပ်း ၸိူဝ်ႉမႅင်းၶူဝ်ႊဝိတ်ႉ 19  တင်းမူတ်းမီး  28 ၵေႃႉ၊ တႃႇ 9 ၵေႃႉ ပဵၼ်ၸဝ်ႈၵႃး လႄႈ ၵူၼ်းၸွမ်းၵႃး။ ၼႂ်းမိူင်းတႆး ၵူႈဝဵင်းဝဵင်း ဝဵင်းလူင်တူၼ်ႈတီး၊ လႃႈသဵဝ်ႈ ၊သီႇပေႃႉ၊ မူႇၸေႊ၊ ၼမ်ႉၶမ်း၊ ၵဵင်းတုင် ၸိူဝ်းၼႆႉ ၵူၼ်းၸပ်းတၢင်းပဵၼ်ၼမ်၊ တၢႆၼမ် ။ ၾၢႆႇၶွင်ႇသီႇသိုၵ်းမၢၼ်ႈၵေႃႈ ႁၢမ်ႈဝႆႉ ႁႂ်ႈၾၢင်ႉၵႂႃႇ ၾၢင်ႉပႆ၊ ၵူၺ်းၵႃႈဢမ်ႇမီးၶူင်းၵၢၼ်လူင်းၸွႆႈၵူၼ်းမိူင်းသင် ၵူၼ်းမိူင်းတႆးလၢတ်ႈၼေၼင်ႇၼႆ။