ယၢမ်းလဵဝ် တႃႇတေႃႉၶူဝ်းၵုၼ်ႇတၢင်းလႅၼ်လိၼ်တႆး – ထႆး ၶဝ်ႈမႃးၼႂ်းမိူင်းၼႆႉ သိုၵ်းမၢၼ်ႈ သင်ႇပိၵ်ႉဢိုတ်းႁႄႉႁၢမ်ႈ ၵူတ်ႇထတ်းႁၢဝ်ႈႁႅင်းလႄႈ ႁဵတ်းႁႂ်ႈၵူၼ်းဢွၵ်ႇတႃႈပႆတၢင်းလူတ်းယွမ်း ၵူၼ်းႁေႃႈရူတ်ႉၵႃးၵေႃႈ လႆႈၵိုတ်းယၢင်ႉၼႃႈၵၢၼ်ၽႂ်မၼ်းတင်းၼမ် ၼႆယဝ်ႉ။

ၵူၼ်းႁေႃႈရူတ်ႉၵႃး တႃႈၶီႈလဵၵ်း – လၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ – “လုၵ်ႉတႃႈၶီႈလဵၵ်း တေမိူဝ်းမိူင်းတႆးလၢႆတီႈၼႆႉ ၸဝ်ႈၵႃးၶဝ် ၵိုတ်းပႅတ်ႈၼမ်ႁႅင်းၼႃႇ မၢင်ၵေႃႉၼႆႉသမ်ႉပေႃး ဢမ်ႇၸၢင်ႈဢွၵ်ႇၵႃးယဝ်ႉ။ ယွၼ်ႉသင်လႄႈ လႆႈၵိုတ်းယၢင်ႉၵႂႃႇၼႆ ယွၼ်ႉဢမ်ႇပေႃးမီးၵူၼ်းၵႂႃႇမႃးဢေႃႈ။ ယဝ်ႉၵေႃႈ ၶူဝ်းၵုၼ်ႇ ၸိူဝ်းၼႆႉ မၢၼ်ႈၶဝ်ၸႅတ်ႈႁႅင်းၼႃႇ။ ဢၼ်ပုၼ်ႉၵေႃႈ ဢမ်ႇပၼ်တၢင်ႇ ဢၼ်ၼႆႉၵေႃႈ ဢမ်ႇပၼ်တၢင်ႇ ပေႃးၼႆ ၸဝ်ႈၵႃးၵေႃႈ မၼ်းဢမ်ႇၶူပ်းၵႃႈမၼ်းၼၼ်ႉၼႃႇ။ ဢၼ်ယၢပ်ႇမၼ်းတႄႉ ပဵၼ်တီႈၶူဝ်တႃႈၵေႃႈၼၼ်ႉယဝ်ႉ”- ဝႃႈၼႆ။

မိူၼ်ၼင်ႇ ၵိူဝ် ၽွင်ဝၢၼ်၊ ၽွင်ၼမ်ႉၽၵ်း၊ ၽွင်သၵ်ႉ(သပ်ႉပျႃႇ)၊ ၵေႃႇၾီႇ ၸိူဝ်းၼႆႉၵေႃႈ သိုၵ်းမၢၼ်ႈၶဝ် တိုၼ်းဢမ်ႇပၼ်တၢင်ႇ ဢမ်ႇပၼ်ၶၢမ်ႈၶူဝ်။ ၵွပ်ႈၼႆ တႃႇတေမိူဝ်းတၢင်းပွတ်းၸၢၼ်းၼႆႉ ပေႃးႁႃၵႃးတႃႇၶီႈလဵၵ်း မိူဝ်းၸိုင် ဢမ်ႇမီးၸဝ်ႈၵႃးၵေႃႉလႂ် တေမိူဝ်းယဝ်ႉ ဝႃႈၼႆ။

လိူဝ်ၼၼ်ႉ ၸဝ်ႈၵႃး တႃႈၶီႈလဵၵ်း – မိူင်းသူႈၵေႃႈ လၢတ်ႈဝႃႈ – “မိူဝ်ႈလဵဝ် ၸွမ်းတႃႈၵႃးၼႆႉ ပိူၼ်ႈဢမ်ႇပၼ် တၢင်ႇၵုၼ်ႇသေဢိတ်းယဝ်ႉ။ ၵႃးၵဵတ်ႉဢၼ်လႂ်ၵေႃႈ ဢမ်ႇလႆႈယဝ်ႉ ၵမ်း ၼႆႉ။ တၢင်ႇၵေႃႈဢမ်ႇၸၢင်ႈတၢင်ႇ ၵႃးၵေႃႈဢမ်ႇၸၢင်ႈဢွၵ်ႇ။ ၵူၺ်းၵႃႈ ပေႃးမီးၵူၼ်းဢွၵ်ႇၶၢဝ်းတၢင်းၼႆ တေငၢႆႈဢိတ်းၼိုင်ႈ။ သင်မီးၵူၼ်းၵႂႃႇမႃးတႄႉ ဢမ်ႇပဵၼ်သင် ယၢမ်းလဵဝ်သမ်ႉ ၵူၼ်းၵႂႃႇမႃးၵေႃႈ ဢမ်ႇမီးယဝ်ႉ”- ဝႃႈၼႆ။

ယၢမ်းလဵဝ် ယွၼ်ႉၵူၼ်းႁေႃႈရူတ်ႉၵႃးၶဝ် ဢမ်ႇၸၢင်ႈတေႃႉၶူဝ်းၵုၼ်ႇၵႂႃႇမႃးလႆႈမိူၼ်ၵူႈပွၵ်ႈယဝ်ႉလႄႈ လွင်ႈၼႆႉ ႁဵတ်းႁႂ်ႈတုမ်ႉတိူဝ်ႉပႃး ၵၢၼ်ပၢႆးမၢၵ်ႈမီးတႃႇႁႃၵိၼ်လဵင်ႉတွင်ႉ ၼႆယဝ်ႉ။

“ပေႃးဝႃႈလႅၼ်ႈၵႃး ဢၼ်လဵဝ်ၵေႃႈ တေဢမ်ႇမီးၵၢၼ်မီးငၢၼ်ၼၼ်ႉယဝ်ႉ။ ငိုၼ်းၶဝ်ႈၵေႃႈ ဢမ်ႇၸၢင်ႈၵႂႃႇႁႃတၢင်းလၢႆၼၼ်ႉၼႃႇ ယၢပ်ႇၽိုတ်ႇၶႃႈဢေႃႈ။ ယွၼ်ႉမီးငိုၼ်းၶဝ်ႈဢၼ်လဵဝ်ၵူၺ်းလႄႈ ၵမ်းၼႆႉ ဢမ်ႇမီးငိုၼ်းၶဝ်ႈလႃးလႃးယဝ်ႉ။ မိူၼ်ၼင်ႇ ႁူဝ်ဢမ်ႇမႃးႁၢင်ႁႅင်ႈၼၼ်ႉယဝ်ႉ။ ပေႃးတူၺ်းလွင်ႈတုမ်ႉတိူဝ်ႉတႄႉ မိူၼ်ၼင်ႇ ၵႃႈၸႂ်ႉၸၢႆႇၸိူဝ်းၼႆႉ တေလႆႈပႅင်းၵိၼ်ပႅင်းၸၢႆႇတႄႉတႄႉ။ တေဢဝ်ငိုၼ်း ဢၼ်ႁွမ်ဝႆႉၸၢႆႇၸိုင် တေၵိၼ်းၸႂ်ၵႂႃႇတိၵ်းတိၵ်းၶႃႈယဝ်ႉ”- ၵူၼ်းႁေႃႈၵႃး တႃႈၶီႈလဵၵ်း – လၢႆးၶႃႈ သိုပ်ႇလၢတ်ႈၼႄၼင်ႇၼႆ။

တႄႇဢဝ်ႁူဝ်လိူၼ်ၵျုၼ်ႊ ပီ2025 ၼႆႉမႃး ၶူဝ်းၵုၼ်ႇမိူင်းထႆး ဢၼ်လုၵ်ႉတၢင်းဝဵင်းတႃႈၶီႈလဵၵ်းၶဝ်ႈမႃးၼႆႉ သိုၵ်းမၢၼ်ႈၶဝ် ပႂ်ႉၵူတ်ႇထတ်းၸႅတ်ႈထၢမ်ၸွမ်းၵဵတ်ႉလၢၼ်ႇ ႁၢဝ်ႈႁႅင်းမႃး ၵူႈဝၼ်း။ လိူဝ်ၼၼ်ႉ ၼႂ်းဝၼ်းတီႈ 13/08/2025 ၼႆႉၵေႃႈ ၶွမ်ႊမတီႊ ၾၢႆႇၸတ်းၵၢၼ်ငိုၼ်းၼွၵ်ႈမိူင်း ဢၼ်ယူႇတႂ်ႈသိုၵ်းမၢၼ်ႈ ၸီႉသင်ႇႁႄႉႁၢမ်ႈ ၶူဝ်းၵုၼ်ႇ 35 မဵဝ်း တေဢမ်ႇပၼ်တေႃႉတၢင်ႇၸွမ်းလႅၼ်လိၼ်လႄႈ ၸွမ်းသၢပ်ႇပၢင်ႇလၢႆႇ ၸိူဝ်းၼႆႉယဝ်ႉၼႆသေ ႁဵတ်းႁႂ်ႈၸဝ်ႈၵႃးၶဝ် ထူပ်းတၢင်းယၢပ်ႇၽိုတ်ႇႁၢၼ်ႉတေႃႇထိုင်ယၢမ်းလဵဝ်။

ၸဝ်ႈၵႃး ၵမ်ႈၽွင်ႈတႄႉ ၼင်ႇႁိုဝ် တေယူႇလွတ်ႈလႆႈသေ ႁႂ်ႈပေႃးၸၢင်ႈႁႃၵိၼ်လဵင်ႉတွင်ႉၵႂႃႇၶၢဝ်းမိူဝ်းၼႃႈၼၼ်ႉ ဢွၼ်ၵၼ်လႅၵ်ႈလၢႆႈၶၢႆႉၵၢၼ် မၢင်ၸိူဝ်းမိူဝ်းႁဵတ်းသူၼ်ႁႆႈၼႃးၸိူဝ်းၼႆႉၵေႃႈမီး ၼႆယဝ်ႉ။