ယၢမ်းလဵဝ် ၼႂ်းၸႄႈဝဵင်းလၢႆးၶႃႈ ၸိုင်ႈတႆးပွတ်းၸၢၼ်း ၵူတ်ႇထတ်းႁၼ် ၵူၼ်းတိတ်းၸပ်း ၸိူဝ်ႉမႅင်းၶူဝ်ႊဝိတ်ႉ 19 တင်း မူတ်းမီးၵႂႃႇ 4 ၵေႃႉယဝ်ႉ ဝႃႈၼႆ။

မိူဝ်ႈဝၼ်းတီႈ 10/7/2021 ပူၼ်ႉမႃးၼႆႉ  ထတ်းႁၼ် ၵူၼ်းဝၢၼ်ႈႁူဝ်ၼွင် ပွၵ်ႉ 2 ၼႂ်းၸႄႈဝဵင်းလၢႆးၶႃႈ ၸႄႈတွၼ်ႈလွႆ လႅမ် ၸိုင်ႈတႆးပွတ်းၸၢၼ်း တင်းမူတ်း 4 ၵေႃႉ။ ပဵၼ် ၽူႈၸၢႆး 1 ၵေႃႉလႄႈ ၽူႈယိင်း 3 ၵေႃႉ  ။

ၸၢႆးၵွင်ၶမ်း ၽူႈတႅၼ်းသၽႃး ပႃႇတီႇႁူဝ်သိူဝ် ဢၼ်ဢွင်ႇပေႉ ပၢင်လိူၵ်ႈတင်ႈ မိူဝ်ႈပီ 2020 ၼၼ်ႉ လၢတ်ႈတီႈၽူႈတွႆႇႁွၵ်ႈ ဝႃႈ -“ဢၼ်ပဵၼ်တၢင်းၵၢၼ်သေ ဢွၵ်ႇဝႆႉတႄႉ တင်းမူတ်းမီး 4 ၵေႃႉ။ လိူဝ်ၼၼ်ႉတႄႉ မီးၵူၼ်းတိတ်းၸပ်း ၸိူဝ်ႉမႅင်းၽိူမ်ႉ ထႅင်ႈၼႆ လိုဝ်းၵၼ်ဝႆႉ ၸိူင်ႉၼၼ်ယူႇၶႃႈ ပႆႇႁၼ်ဢွၵ်ႇမႃးပဵၼ်တၢင်းၵၢၼ် ဝႃႈမီးၵူၼ်း ၸပ်းထႅင်ႈၵႃႈႁိုဝ် တႄႉတႄႉ ဢၼ်ဝႃႈၼၼ်ႉ”- ဝႃႈၼႆ။

ယၢမ်းလဵဝ် ၵူၼ်းမိူင်းလၢႆးၶႃႈ 4 ၵေႃႉ ဢၼ်ၵူတ်ႇထတ်းႁၼ်ၸိူဝ်ႉမႅင်းၶူဝ်ႊဝိတ်ႉ 19 ၼၼ်ႉ လႆႈယူတ်းယႃတူဝ်ဝႆႉတီႈႁူင်းယႃ ၸႄႈဝဵင်းလွႆလႅမ် ၼႆယဝ်ႉ။

ၵူၼ်းမိူင်း 4 ၵေႃႉဢၼ်ၵူတ်ႇထတ်းႁၼ် ၸိူဝ်ႉမႅင်းၶူဝ်ႊဝိတ်ႉ 19 ၼႆႉ ပဵၼ်ၽူႈၸၢႆး ဢႃယု 31 ပီ ၵေႃႉၼိုင်ႈ၊ ယဝ်ႉၵေႃႈ ၼၢင်းယိင်း 3 ၵေႃႉ ဢႃယု 74 ပီ ၵေႃႉၼိုင်ႈ၊ 47 ပီ ၵေႃႉၼိုင်ႈလႄႈ 24 ပီ ၵေႃႉၼိုင်ႈ ၼႆယဝ်ႉ။

“ဢမ်ႇဝႃႈၽႃႇသႃႇ ၸၢဝ်းၶိူဝ်းလႂ် ႁႂ်ႈမေႃၸွႆႈထႅမ်ၵၼ် တၢင်းပဵၼ်ၼႆႉ ၵူဝ်ၼႃႇၵေႃႈ ဢမ်ႇလီ ဢမ်ႇၵူဝ်သေဢိတ်းၼႆၵေႃႈ ဢမ်ႇလီ လွင်ႈၵၢၼ်ႁႃၵိၼ်လဵင်ႉတွင်ႉၼႆႉ မၼ်းၶၼ်ၸႂ်မႃးၵူႈဝၼ်းယဝ်ႉ ပေႃးၵူၼ်းဢမ်ႇမီးသင် ဢမ်ႇမီးၶဝ်ႈၵိၼ် ဢမ်ႇ မီးငိုၼ်းမႃးၼႆ ၵူဝ်ႁဵတ်းႁၢႆႉတေႃႇၵၼ် ဢၼ်မီးၵေႃႈ ႁႂ်ႈမေႃယိုၼ်ႈပၼ် ၵူၼ်းၸိူဝ်းတူၵ်းၵိၼ်းၶၼ်ၸႂ်ၼၼ်ႉၽွင်ႈ။  ၸွႆႈ ဢၼ်ၵိၼ်ယႅမ်ႉ  ၸိူဝ်းၼႆႉ မၼ်းၸွႆႈလႆႈယူႇ  ယူႇၵႆၵႆသေ ႁဝ်းၵႂႃႇတမ်းပၼ်သေ ၶဝ်မႃးဢဝ် ၸိူဝ်းၼႆႉၵေႃႈ ႁဵတ်းလႆႈယူႇၶႃႈ ဢမ်ႇၼၼ် ၵပ်းသိုပ်ႇ တီႈၶွမ်ႊမတီႊၾၢႆႇၵႅတ်ႇၶႄၶူဝ်ႊဝိတ်ႉ ၸႄႈဝဵင်း ႁႂ်ႈမႃးၸွႆႈထႅမ်ပၼ် ၸိူဝ်းၼႆႉၵေႃႈမီးယူႇ”-  ၸၢႆးၵွင်ၶမ်း သိုပ်ႇ လၢတ်ႈ ၼႄထႅင်ႈၼင်ႇၼႆ။

လိူဝ်ၼၼ်ႉ ၼႂ်းၵၢတ်ႇလူင် လၢႆးၶႃႈ မိူၼ်ၼင်ႇ ႁၢၼ်ႉၶၢႆၶဝ်ႈၽၵ်း၊ ၶဝ်ႈသွႆးလႄႈ ႁၢၼ်ႉၶၢႆယႃႈယႃ ၸိူဝ်းၼႆႉတႄႉ ပိုတ်ႇၶၢႆဝႆႉ ပၼ်ယူႇ။  ႁၢၼ်ႉၶၢႆ တၢင်ႇၸိူဝ်ႉတၢင်ႇပိူင် မိူၼ်ၼင်ႇ ႁၢၼ်ႉသိူဝ်ႈၽႃႈ ၸိူဝ်းၼၼ်ႉတႄႉ ပိၵ်ႉဢိုတ်းဝႆႉတင်းမူတ်း တႄႇဢဝ် ဝၼ်းတီႈ 11/7/2021 ၼႆႉမႃး ဝႃႈၼႆ။

ယၢမ်းလဵဝ် တၢင်းၶဝ်ႈဢွၵ်ႇ ၼႂ်းၸႄႈဝဵင်းလၢႆးၶႃႈ   ၶိုၼ်းတင်ႈလၢၼ်ႇၵူတ်ႇထတ်း  ၵူၼ်းၵႂႃႇမႃးမႃးႁၢဝ်ႈႁႅင်း။  တႃႇၵႅတ်ႇ ၶႄႁႄႉၵင်ႈတၢင်းပဵၼ် ၼင်ႇႁိုဝ်ပေႃးတေဢမ်ႇၽႄႈလၢမ်း ။