ၾၢႆႇၵႅတ်ႇၶႄႁႄႉၵင်ႈၶူဝ်ႊဝိတ်ႉ 19 ၸႄႈဝဵင်းၵဵင်းတုင် ပိုၼ်ၽၢဝ်ႇၸူးၵူၼ်းမိူင်းပိုၼ်ႉတီႈ သင်ဢမ်ႇမီးလွင်ႈယႂ်ႇ ၼႃႇဢႃးလႃး ယႃႇပေဢွၵ်ႇၼွၵ်ႈႁိူၼ်းယေးၵၼ် ဝႃႈၼႆ။
တႄႇဢဝ် မိူဝ်ႈၼႆႉ ဝၼ်းတီႈ 10/7/2021 တေႃႇထိုင် ဝၼ်းတီႈ 22/7/2021 တႃႇၶၢဝ်းတၢင်း 12 ဝၼ်း ယူႇတီႈၶွမ်ႊမတီႊၾၢႆႇ ၵႅတ်ႇၶႄႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ၸႄႈဝဵင်းၵဵင်းတုင် ပိုၼ်ၽၢဝ်ႇယွၼ်းတၢင်းႁူမ်ႈမိုဝ်းထိုင် ၵူၼ်းမိူင်းပိုၼ်ႉတီႈ ၼႂ်းၸႄႈဝဵင်း ၵဵင်းတုင် ၸိုင်ႈတႆး ပွတ်းဢွၵ်ႇၶူင်း တင်းမူတ်း ႁႂ်ႈယူႇသဝ်းၼႂ်းႁိူၼ်းယေး ယႃႇပေဢွၵ်ႇတၢင်းၼွၵ်ႈ ၼင်ႇႁိုဝ်တေၸၢင်ႈ ၵႅတ်ႇၶႄႁႄႉၵင်ႈတၢင်းပဵၼ်၊ ႁႂ်ႈပေႃးတေဢမ်ႇၽႄႈလၢမ်းႁၢဝ်ႈႁႅင်းတိတ်းၸပ်းၵၼ်ၼမ်။
ၵူၼ်းၼုမ်ႇ ၵဵင်းတုင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ယူႇတီႈၶွမ်ႊမတီႊၶဝ် မႃးသေႃႇပဝ်ႇၸွမ်း ၼႂ်း ဝဵင်း ၸွမ်းပွၵ်ႉဢိူင်ႇ သင်ဢမ်ႇ လွင်ႈယႂ်ႇၼႃႇဢႃးလႃး ယႃႇပေဢွၵ်ႇႁိူၼ်းယေး ၊ တႄႇဝၼ်းတီႈ 10 ၼႆႉၵႂႃႇ တေႃႇထိုင် ဝၼ်းတီႈ 22 ။ လွင်ႈ Lockdown တင်းဝဵင်းတႄႉဢမ်ႇၸႂ်ႈၶႃႈ။ ၶဝ်ယွၼ်းႁူမ်ႈမိုဝ်း ႁႂ်ႈၵူၼ်းမိူင်း ဢွၼ်ၵၼ်ယူႇ ႁိူၼ်းယေးၵၼ် ၸိူင်ႉၼၼ်ၵူၺ်းၶႃႈ”- ဝႃႈၼႆ။
ယၢမ်းလဵဝ် ၼႂ်းၸႄႈဝဵင်းၵဵင်းတုင် မီးၵူၼ်းတိတ်းၸပ်း ၸိူဝ်ႉမႅင်းၶူဝ်ႊဝိတ်ႉ 19 တင်းမူတ်း 11 ၵေႃႉ လူႉတၢႆတႄႉ ပႆႇမီး။
တီႈဝဵင်းတႃႈၶီႈလဵၵ်း ဢၼ်မီးၵူၼ်းတိတ်းၸပ်းတၢင်းပဵၼ် 200 ပၢႆၼၼ်ႉၵေႃႈတေႃႈၼင်ႇၼၼ် တင်ႈဢဝ် ဝၼ်းတီႈ 9/7/2021 ၼႆႉၵႂႃႇ သင် ဢမ်ႇမီးလွင်ႈယႂ်ႇ ၸမ်ပဵၼ်ၼႆ ယႃႇပေဢွၵ်ႇၼွၵ်ႈႁိူၼ်းယေးၵၼ်၊ ယဝ်ႉၵေႃႈ ယႃႇၵႂႃႇတီႈၵူၼ်းၵိုၼ်းၶွၼ်ႈၼမ်၊ ပွႆးလၢမ်း ၸိူဝ်းၼႆႉသေ ယႃႇၸတ်းႁဵတ်းပၢင်မူၼ်ႈသိူဝ်း ၸိူဝ်းၼႆႉ။
