ယၢမ်းလဵဝ် ၼႂ်းၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း ၵူတ်ႇထတ်းႁၼ် ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 တင်းမူတ်းမီးၵႂႃႇ 224 ၵေႃႉယဝ်ႉ ဝႃႈၼႆ။
မိူဝ်ႈဝႃး ဝၼ်းတီႈ 8/7/2021 ၵူတ်ႇထတ်းႁၼ် ၵူၼ်းမိူင်းၼႂ်းၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း တင်းမူတ်း 35 ၵေႃႉ ယၢမ်းလဵဝ် ႁူမ်ႈၵၼ်တင်းမူတ်း မီးၵႂႃႇ 224 ၵေႃႉ ။
ၵူၼ်းၼုမ်ႇ ပိုၼ်ႉတီႈ တႃႈၶီႈလဵၵ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် ၼႂ်းၸႄႈဝဵင်းတႃႈၶီႈလဵၵ်း ၸွမ်းၼႂ်း မူႇဝၢၼ်ႈ ၸွမ်းပွၵ်ႉ/ ဢိူင်ႇၸိူဝ်းၼႆႉ သေႃႇပၢဝ်ႇပေႃးဢမ်ႇလမ်ႇလွင်ႈလိူဝ်ႁႅင်း ယႃႇပေဢွၵ်ႇ ႁိူၼ်း ။ ယႃႇပေၵႂႃႇတီႈၵူၼ်းၶွၼ်ႈၼမ်၊ ပွႆးလၢမ်း၊ ၵႂႃႇၵိၼ်မူၼ်ႈၵိၼ်ပျေႃႇၵၼ် ၸိူဝ်းၼႆႉ။ ႁႂ်ႈဢွၼ်ၵၼ် ၵုမ်းၵၵ်းတူဝ်ယူႇဝႆႉၼႂ်းႁိူၼ်းယေးၽႂ်မၼ်း။ တႄႇဢဝ်မိူဝ်ႈၼႆႉ ၵႂႃႇ ႁူင်းႁဵၼ်းလူင်ပွင်ၸိုင်ႈ ၼႂ်းၸႄႈဝဵင်းတႃႈၶီႈလဵၵ်း တင်း မူတ်းၵေႃႈ သင်ႇပိၵ်ႉ ဢိုတ်းယဝ်ႉၶႃႈ”- ဝႃႈၼႆ။
တႃႇႁႄႉၵင်ႈၽေးၶူဝ်ႊဝိတ်ႉၼႆသေ ၾၢႆႇပၢႆးယူႇလီၶွင်ၸုမ်းသိုၵ်းမၢၼ်ႈ ပိုၼ်ၽၢဝ်ႇမိူဝ်ႈဝႃး 8/7/2021 ဝႃႈ ႁႂ်ႈၵိုတ်းလိုဝ်ႈႁူင်းႁဵၼ်းလူင်ပွင်ၸိုင်ႈ ၊ ၵျွင်းမုၼ်ၸဝ်ႈ၊ သုၼ်ႇတူဝ် ပတ်းပိုၼ်ႉၸိုင်ႈမိူင်း တင်းမူတ်းဝႃႈၼႆ။
ၼွၵ်ႈလိူဝ်ၼၼ်ႉ သင်ဝႃႈ ၵူၼ်းတႃႈၶီႈလဵၵ်းၵႂႃႇမီးဝႆႉယူႇ တၢင်ႇပိုၼ်ႉတီႈလႄႈသင် ၵူၼ်းတၢင်ႇပိုၼ်ႉတီႈ ၸိူဝ်းတေၶဝ်ႈ မႃးၼႂ်းၸႄႈဝဵင်းတႃႈၶီႈလဵၵ်း ၸိူဝ်းၼႆႉလႄႈသင် ၵူႈၵေႃႉ တိုၼ်းတေလႆႈၶဝ်ႈၵၵ်းတူဝ် ၾၢႆႇႁႄႈၵင်ႈတၢင်းပဵၼ် ၶိုင်ဝႆႉပၼ်ၼၼ်ႉ ဝႃႈၼႆ။
“လွင်ႈ Lockdown ၸွမ်းၼႂ်းဢိူင်ႇ ၼႂ်းပွၵ်ႉ ၼႂ်းမူႇဝၢၼ်ႈတႄႉ ပႆႇမီးၶႃႈ တီႈတႃႈၶီႈလဵၵ်းတႄႉ ၵူၺ်းၵႃႈ သင်ဝႃႈ ၵူၼ်းတႃႈ ၶီႈလဵၵ်း ဢွၵ်ႇၵႂႃႇလႄႇၵႂႃႇလၢဝ်း တၢင်ႇတီႈ တၢင်ႇလႅၼ် တၢင်ႇၸႄႈဝဵင်း ၼႂ်းၸူဝ်ႈၶၢဝ်းၶိဝ်းၼႆႉသေ ပွၵ်ႈမႃးႁိူၼ်းၶိုၼ်းၼႆ ႁႂ်ႈလႆႈၵၵ်းတူဝ် ။ ယဝ်ႉၵေႃႈ ၵူၼ်းတၢင်ႇပိုၼ်ႉတီႈ တေၶဝ်ႈမႃးၸိူဝ်းၼႆႉ တေလႆႈၵၵ်းတူဝ် မူတ်းမူတ်းၶႃႈ”- ၵူၼ်း ၼုမ်ႇ တႃႈၶီႈလဵၵ်း သိုပ်ႇလၢတ်ႈ ၼႄၼင်ႇၼႆ။
တီႈၸႄႈဝဵင်းမိူင်းပဵင်းၵေႃႈ မိူဝ်ႈဝႃး ဝၼ်းတီႈ 8/7/2021 ၵူတ်ႇထတ်းႁၼ် ၸိူဝ်ႉမႅင်းထႅင်ႈ 2 ၵေႃႉ။ တႄႇဢဝ် 30/6/2021 – 8/7/2021 ၼႆႉ တင်းမူတ်း မီးၵူၼ်း တိတ်းၸပ်းၵႂႃႇ 9 ၵေႃႉယဝ်ႉ။ ၼႂ်းၸႄႈဝဵင်းၵဵင်းတုင်တႄႉ တေႃႇထိုင် ဝၼ်းတီႈ 8/7/2021 ၼႆႉ တင်းမူတ်းမီးၵူၼ်းတိတ်းၸပ်းၸိူဝ်ႉမႅင်း 11 ၵေႃႉ။ ယဝ်ႉၵေႃႈ ၼႂ်းၸႄႈဝဵင်းမိူင်းတူၼ် ၵူတ်ႇထတ်း ႁၼ်ထႅင်ႈ 2 ၵေႃႉ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ