ၶၢဝ်းတၢင်းလိူၼ်ပၢႆမႃးၼႆႉ ၼႂ်းၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇၼၼ်ႉ မီးၵူၼ်းတိတ်းၸပ်း ၸိူဝ်ႉမႅင်းၶူဝ်ႊဝိတ်ႉ 19 ၸမ်ထိုင် 200 ၵေႃႉ၊ ၵူၼ်းလူႉတၢႆၵေႃႈ မီးၵႂႃႇ 6 ၵေႃႉ။
တႄႇဢဝ် မိူဝ်ႈလိူၼ်ၵျုၼ်ႊမႃး တေႃႇထိုင်မိူဝ်ႈၼႆႉ ဝၼ်းတီႈ 8/7/2021 ၼႂ်းၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ မီးၵူၼ်းတိတ်းၸပ်းၸိူဝ်ႉမႅင်း ၶူဝ်ႊဝိတ်ႉ 19 တင်းမူတ်း 186 ၵေႃႉ လူႉတၢႆ 6 ၵေႃႉ ၼႆယဝ်ႉ။
ၽူႈၸွႆႈထႅမ် ၼႂ်းၸုမ်းပရႁိတ သီႇပေႃႉ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၼႂ်းၸႄႈဝဵင်းသီႇပေႃႉ ႁူမ်ႈ ပႃးၼမ်ႉလၼ်ႈ တင်းမူတ်း တေမီးၵူၼ်းပဵၼ် 186 ၵေႃႉယဝ်ႉ။ ၵမ်ႈၽွင်ႈ လူင်းႁူင်းယႃယဝ်ႉၵေႃႈမီး ယၢမ်းလဵဝ် တိုၵ်ႉယူတ်းယႃတူဝ်ဝႆႉ တီႈသီႇပေႃႉ မီး 114 ၵေႃႉ။ တီႈၼမ်ႉလၼ်ႈ မီး 29 ၵေႃႉ။ ၼႂ်းၸႄႈဝဵင်းသီႇပေႃႉ တင်းမူတ်း မီးၵူၼ်းလူႉတၢႆယဝ်ႉ မီး 6 ၵေႃႉ ပႃးမိူဝ်ႈၼႆႉ ၵေႃႉၼိုင်ႈ”- ဝႃႈၼႆ။
ထႅင်ႈၾၢႆႇၼိုင်ႈၵေႃႈ ၼင်ႇႁိုဝ် တၢင်းပဵၼ်ၶူဝ်ႊဝိတ်ႉ 19 ပေႃးတေဢမ်ႇၽႄႈလၢမ်း တိတ်းၸပ်းၵၼ်ၼမ်မႃးႁၢဝ်ႈႁႅင်းၼၼ်ႉ သင်ပဵၼ်လႆႈ ယႃႇၵႆႉဢွၵ်ႇတၢင်းၼွၵ်ႈ ၶတ်းၸႂ်ဝႄႈတီႈၵူၼ်းၼမ်ၵူၼ်းၵိုၼ်း ၸိူဝ်းၼႆႉ ၽူႈၸွႆႈထႅမ် ၵူၼ်းပၢႆႈ ၼႂ်းၸုမ်းပရႁိတ သီႇပေႃႉ သိုပ်ႇလၢတ်ႈၼႄၼင်ႇၼႆထႅင်ႈ။
“သင်ပဵၼ်လႆႈ တီႈသီႇပေႃႉႁဝ်းၶႃႈ ၼႂ်းဝူင်ႈဝၢင်ႈၼႆႉ ယႃႇပေပေႃးၵႆႉဢွၵ်ႇတၢင်း ၼွၵ်ႈၵၼ် ၶတ်းၸႂ်ယူႇၼႂ်းႁိူၼ်းယေး ယႃႇၵႂႃႇတီႈၵူၼ်းၵိုၼ်းၵူၼ်းၼမ်။ သင်ဝႃႈ ႁဝ်းဝႄႈလႆႈလွင်ႈၸိူင်ႉၼႆၸိုင် ယူဝ်တၢင်းပဵၼ်တေၸၢင်ႈလူတ်းယွမ်း။ လွင်ႈၽႄႈ ၸပ်းၵၼ်ၵေႃႈ တေၸၢင်ႈလူတ်းယွမ်း။ ထႅင်ႈလွင်ႈၼိုင်ႈ ဢၼ်လွင်ႈယႂ်ႇတီႈသုတ်းတႄႉ သင်ဢမ်ႇယူႇလီ ၼၢဝ် ပဵၼ်ဝတ်း ဢႆ မီးလူမ်းမႆႈၶိုၼ်ႈၸိုင် ယႃႇပေလၵ်ႉလွမ်ယူတ်းယႃႁင်းၵူၺ်း။ သင်ဝႃႈ ႁဝ်းပဵၼ်တၢင်းပဵၼ်တႄႉၼႆၸိုင် မၼ်းၸၢင်ႈထိုင် သၢႆၸႂ်ႁဝ်းသေဢမ်ႇၵႃး ၸၢင်ႈၽႄႈလၢမ်းပႃးထႅင်ႈႁၢဝ်ႈႁႅင်း။ ၵွပ်ႈၼၼ် ယႃႇပေလၵ်ႉလွမ်ယူတ်းယႃ ႁင်းၵူၺ်း ၼႆႉပဵၼ် ဢၼ်လွင်ႈယႂ်ႇတီႈသုတ်းၶႃႈယဝ်ႉ”- ဝႃႈၼႆ။
ယၢမ်းလဵဝ် ၵူၼ်းတိတ်းၸပ်းၸိူဝ်ႉမႅင်း ၶူဝ်ႊဝိတ်ႉ 19 တိုၵ်ႉယူတ်းယႃ ယူႇတီႈႁူင်းယႃသီႇပေႃႉၼႆႉ မီးပႃးၵူၼ်းပဵၼ်ႁၢဝ်ႈႁႅင်း ဢၼ်လႆႈၸႂ်ႉၶိူင်ႈဢွၵ်ႊသီႊၵျိၼ်ႊ ထူၺ်ႈၸႂ်ၸွႆႈယူႇ ၵမ်ႈၽွင်ႈၵေႃႈမီး။ မေႃယႃလႄႈ ၸုမ်းၸွႆႈထႅမ်ၵူၼ်းပဵၼ်ၵေႃႈ ဢမ်ႇၵုမ်ႇထူၼ်ႈ ယွၼ်ႉၼၼ်လႄႈ မီးလွင်ႈယၢပ်ႇၽိုတ်ႇလၢႆၸိူဝ်ႉလၢႆပိူင်။
