တၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းႁၢဝ်ႈႁႅင်း မႃးၵူႈဝၼ်းလႄႈ ၾၢႆႇပၢႆးပၺ်ၺႃႇ ၶွင်ႇသီႇသိုၵ်းမၢၼ်ႈ သင်ႇပိၵ်ႉၶိုၼ်း ႁူင်းႁဵၼ်း ၼႂ်းၸႄႈဝဵင်းၵဵင်းတုင်၊ မိူင်းပဵင်း ၸိူဝ်းၼႆႉ တႃႇၶၢဝ်းတၢင်း 2 ဝူင်ႈ။
တႄႇဢဝ် ဝၼ်းတီႈ 28/6/2021 မႃးတေႃႇထိုင်ဝၼ်းတီႈ 7/7/2021 ၼႆႉ ၼႂ်းၸႄႈဝဵင်း ၵဵင်းတုင် ၵူတ်ႇထတ်းႁၼ် ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 တင်းမူတ်း မီး 11 ၵေႃႉ။ တႃႇၵုမ်းၵမ်လႆႈ တၢင်းပဵၼ်ၶူဝ်ႊဝိတ်ႉ 19 ၼႆသေ တႄႇဢဝ် ဝၼ်းတီႈ 7/7/2021 ၼႆႉၵႂႃႇ ၾၢႆႇပၢႆးပၺ်ႇၺႃႇ ၶွင်ႇသီႇ သိုၵ်းမၢၼ်ႈ ႁႂ်ႈပိၵ်ႉဢိုတ်းႁူင်းႁဵၼ်း ဢၼ်ပိုတ်ႇဝႆႉ ၼႂ်းၸႄႈဝဵင်းၵဵင်းတုင် တင်း ၸႄႈဝဵင်းမိူင်းပဵင်း ၸိုင်ႈတႆးပွတ်းဢွၵ်ႇၶူင်း တႃႇၶၢဝ်းတၢင်း 2 ဝူင်ႈ ဝႃႈၼႆ။
ၵူၼ်းၼုမ်ႇ ၵဵင်းတုင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “လႆႈငိၼ်းဝႃႈ တေပိၵ်ႉႁူင်းႁဵၼ်း ဢၼ်ၶဝ်ပိုတ်ႇမႃးၼၼ်ႉ တီႈၵဵင်းတုင် တင်း မိူင်းပဵင်းၼႆၶႃႈ။ ၵူၺ်းၵႃႈ တေႃႈလဵဝ်ၼႆႉ တီႈၵဵင်းတုင်တႄႉ ပေႃးပိၵ်ႉယဝ်ႉ ဢမ်ႇႁၼ်ၽႂ်ၵႂႃႇၶိုၼ်ႈၶႃႈ။ မိူဝ်ႈပူၼ်ႉမႃး လုၵ်ႈႁဵၼ်း ၸိူဝ်းၵႂႃႇၶိုၼ်ႈၼၼ်ႉၵေႃႈ ပဵၼ်လုၵ်ႈဢွၼ်ႇသိုၵ်းမၢၼ်ႈလႄႈ ၽူႈႁၢပ်ႇၵၢၼ်လူင်ပွင်ၸိုင်ႈ ၶဝ်ၸိူဝ်းၼၼ်ႉၵူၺ်း။ ဢမ်ႇႁၼ်ၵူၼ်းမိူင်းႁဝ်းၶႃႈ ဢဝ်လုၵ်ႈလၢင်းၵၼ် ၵႂႃႇၶိုၼ်ႈၼမ်ၶႃႈ တင်ႈတႄႇၶဝ်ပိုတ်ႇႁူင်းႁဵၼ်းမႃးၼႆႉ ဢၼ်ၵႂႃႇၶိုၼ်ႈၼၼ်ႉၵေႃႈ တေမီး 3 ပုၼ်ႈ 1 ပုၼ်ႈၵႃႈၼႆႉၵူၺ်း”- ဝႃႈၼႆ။
ၸိူင်ႉၼၼ်ၼင်ႇၵဝ်ႇ တၢင်းၸႄႈဝဵင်းတႃႈၶီႈလဵၵ်းၵေႃႈ တႄႇဢဝ် ဝၼ်းတီႈ 28/6/2021 မႃး တေႃႇထိုင်ဝၼ်းတီႈ 7/7/2021 ၼႆႉ ၵူတ်ႇထတ်းတင်းမူတ်းမီး 189 ၵေႃႉ။ မိူင်းယွင်းသမ်ႉ 3 ၵေႃႉ၊ မိူင်းၽျၢၵ်ႈ 1 ၵေႃႉ။ မိူင်းပဵင်းသမ်ႉ တႄႇဢဝ် ဝၼ်းတီႈ 30/6/2021 မႃးထိုင်မိူဝ်ႈၼႆႉ ဝၼ်းတီႈ 8/7/2021 မီးၵႂႃႇ 9 ၵေႃႉ ၼႆယဝ်ႉ။
ႁူင်းႁဵၼ်းလူင်ပွင်ၸိုင်ႈမၢၼ်ႈ ဢၼ်ပိုတ်ႇပူင်သွၼ်လိၵ်ႈမႃးၼႆႉ ယူႇတီႈၶွင်ႇသီႇသိုၵ်းမၢၼ်ႈ ၸႂ်ႉဢႃႇၼႃႇ သေ ၸီႉသင်ႇ ပိုတ်ႇမႃးမိူဝ်ႈႁူဝ်လိူၼ်ၵျုၼ်ႊ 2021 ။
တႄႇဢဝ် ၼႂ်းလိူၼ်ၵျုၼ်ႊၼႆႉမႃး ၼႂ်းမိူင်းတႆး ၵူၼ်းတိတ်းၸပ်းၸိူဝ်ႉမႅင်း ၶူဝ်ႊဝိတ်ႉ 19 ပုင်ႈၶိုၼ်ႈၼမ် မႃးၵူႈဝၼ်း။ ၼႂ်းမိူင်းတႆး ပွတ်းႁွင်ႇ မိူၼ်ၼင်ႇ လႃႈသဵဝ်ႈ မူႇၸေႊ ၼမ်ႉၶမ်း လၢဝ်ႇၵၢႆး ၸိူဝ်းၼႆႉ ၶၢဝ်းတၢင်း 4-5 ဝၼ်းၵူၺ်း ပုင်ႈၶိုၼ်ႈၼပ်ႉပၢၵ်ႇ ၵူႈၼွၼ်းတီႈႁူင်းယႃပေႃးဢမ်ႇၵုမ်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ