ၵူၼ်းၸပ်းတၢင်းပဵၼ်ၶူဝ်ႊဝိတ်ႉ 19 တီႈမူႇၸေႊ မီးၼမ် လူၼ်ႉႁူင်းယႃ လႄႈ ၸိူဝ်းတိတ်းၸပ်းမႂ်ႇ လႆႈၵႂႃႇယူႇတီႈႁူင်းယႃၵဝ်ႇၽွင်ႈလႄႈ လႆႈၵၵ်းတူဝ်ယူႇႁိူၼ်းႁင်းၽႂ်မၼ်းၽွင်ႈ ။
ယၢမ်းလဵဝ် တီႈႁူင်းယႃလူင် ၵူၼ်းမိူင်း ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 မီးမွၵ်ႈ 200 ပၢၵ်ႇ ႁူင်းယႃလူင်ဢမ်ႇႁပ်ႉလႆႈယဝ်ႉၼႆလႄႈ လႆႈဢဝ်ၵႂႃႇဝႆႉတီႈႁူင်းယႃၵဝ်ႇၶိုၼ်းၽွင်ႈ ၵူၼ်းမိူင်းတူၵ်းၸႂ်ၵၼ်။
ၽူႈတူင်ႉၼိုင် ၼႂ်းၸုမ်းပရႁိတ ၵရုၼႃႇ မူႇၸေႊ ၵေႃႉၼိုင်ႈ လၢတ်ႈတီႈၽူႈတွႆႇ ႁွၵ်ႈဝႃႈ – “ၸႂ်ႈၶႃႈဢေႃႈ မိူဝ်ႈဝႃးၼႆႉ ႁဝ်းၶႃႈ ႁပ်ႉဢဝ်ၵူၼ်းပဵၼ် ၵႂႃႇတီႈႁူင်းယႃလူင် ဢၼ်မႂ်ႇ တီႈမူႇၸေႊၼႆႉ ဢမ်ႇႁပ်ႉလႆႈယဝ်ႉ ၵူၼ်းတဵမ်မူတ်းယဝ်ႉၼႆၶႃႈ။ ယွၼ်ႉ ၼၼ်လႄႈ ႁဝ်းၶႃႈ လႆႈဢဝ်မႃးဝႆႉတီႈႁူင်းယႃၵဝ်ႇ မီး 17 ၵေႃႉ ၶႃႈ။ ”- ဝႃႈၼႆ။
ၵူၼ်းတိတ်းၸပ်းတၢင်းပဵၼ်သမ်ႉတိုၵ်ႉမီးထႅင်ႈယူႇတိၵ်းတိၵ်းလႄႈ လႆႈဢွၼ်ၵၼ် ၵၵ်းတူဝ်တီႈႁိူၼ်းၽႂ်မၼ်းသေ ႁွမ်ႁႅင်း ယူတ်းယႃ တူဝ်ဝႆႉႁင်းၽႂ်မၼ်း။
“ပႆႇမႃးမူတ်းၶႃႈ ၵူၼ်းပဵၼ်ၼႆႉ ၸိူဝ်းပဵၼ်သေ ယူတ်းယႃၵၵ်းတူဝ်ယူႇဝႆႉ တီႈႁိူၼ်းယေး ၽႂ်မၼ်းၸိူင်ႉၼႆႉၵေႃႈမီးၶႃႈဢေႃႈ ။ ၵမ်ႈၽွင်ႈၵေႃႈ လႆႈႁပ်ႉဝႆႉတီႈ လုမ်းႁဝ်းၶႃႈ ၼႆႉဢေႃႈ” – ၽူႈၶဝ်ႈၸုမ်း ၸုမ်းၸွႆႈထႅမ်တူင်ႇဝူင်းၵူၼ်း ၵရုၼႃႇမူႇၸေႊ သိုပ်ႇလၢတ်ႈၼႄထႅင်ႈ ၼင်ႇၼႆ။
ၸွမ်းၼင်ႇ သဵၼ်ႈသၢႆမၢႆ ဢၼ်ၾၢႆႇၸွႆႈထႅမ်လွင်ႈၵႅတ်ႇၶႄႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ၶဝ်လၢတ်ႈတႄႉ တီႈမူႇၸေႊၼႆႉ ၵူၼ်းပဵၼ်ၶူဝ်ႊဝိတ်ႉ သေလူႉတၢႆမီး 5 ၵေႃႉ။ ဢၼ်ပႂ်ႉတူၺ်းငဝ်းလၢႆးသေလူႉတၢႆ၊ ဢၼ်ဢမ်ႇႁူႉလွင်ႈတၢင်းသေလူႉတၢႆၵေႃႈမီးထႅင်ႈတၢင်းၼမ် လႆႈႁူႉၼင်ႇၼႆ။
ၾၢႆႇၼိုင်ႈ မေႃယႃ ၽူႈၸွႆႈမေႃ ၼၢင်းမေႃယႃ ၸိူဝ်းၼႆႉသမ်ႉ ၵမ်ႈၼမ် ဢွၼ်ၵၼ်ႁဵတ်း CDM (သၢၼ်ၶတ်းဢႃႇၼႃႇသိုၵ်း) ဝႆႉလႄႈ ၵူၼ်းလုမ်းလႃးတူၺ်းထိုင် ၵူၼ်းပဵၼ် တီႈမူႇၸေႊဢမ်ႇၶႂ်ႈၵုမ်ႇထူၼ်ႈ ဝႃႈၼႆ။
မိူဝ်ႈဝႃး ဝၼ်းတီႈ 6/7/2021 ၼႆႉ ၼႂ်းၸႄႈဝဵင်းမူႇၸေႊ ၵူတ်ႇထတ်း ႁၼ်ၵူၼ်း တိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 တင်း မူတ်း 38 ၵေႃႉ ။
ဝၢႆးသေ ၶွင်ႇသီႇသိုၵ်းမၢၼ်ႈ မိူၵ်ႈမႂ်ႈ ယိုတ်းဢႃႇၼႃႇ ၸိုင်ႈမိူင်းမႃးၼႆႉ မိူၼ်ၼင်ႇ ၸုမ်းတူင်ႉၼိုင်တူင်ႇဝူင်းၵူၼ်း ၽူႈႁၢပ်ႇ ၵၢၼ်လူင်ပွင်ၸိုင်ႈ မေႃယႃလူင် ၼၢင်းမေႃယႃ ၼႂ်းႁူင်းယႃ မူႇၸေႊ ၸိူဝ်းၼႆႉ ၵမ်ႈၼမ် ဢွၼ်ၵၼ်ႁဵတ်း CDM လႄႈ ၵွပ်ႈ ၼႆ တႃႇတေၸွႆႈ ၵူတ်ႇထတ်း ၵူၼ်းပဵၼ် လုမ်းလႃးၵူၼ်းပဵၼ် ၸိူဝ်းၼႆႉ ဢမ်ႇမီးသေ ပဵၼ်လွင်ႈယၢပ်ႇၽိုတ်ႇတႃႇၵူၼ်းပဵၼ် ၼႆယဝ်ႉ။
ဝၢႆးသေၶွင်ႇသီႇသိုၵ်းမၢၼ်ႈ ယိုတ်းမိူင်းမႃးၼႆႉ ဝၢၼ်ႈမိူင်းဢမ်ႇမီးလွင်ႈၼိမ်သဝ်း ၵႆႉမီးလွင်ႈမၢၵ်ႇတႅၵ်ႇ ၾႆးမႆႈ ၽူႈလၵ်ႉ ၵူၼ်းၸူၼ်လိူင်ႇၼမ် ပၢင်တေႃႇလွင်းၵေႃႈၼမ် ယဝ်ႉၵေႃႈ တၢင်းပဵၼ်ၶူဝ်ႊဝိတ်ႉ 19 သမ်ႉ ၽႄႈလၢမ်ႈထႅင်ႈႁၢဝ်ႈႁႅင်း ဢမ်ႇၵုမ်းပေႉလႆႈ ပဵၼ်ဢၼ်ယၢပ်ႇၽိုတ်ႇတႃႇၵူၼ်းမိူင်းပိုၼ်ႉတီႈ ၼႂ်းမိူင်းတႆး ၼႆယဝ်ႉ။