ၼႂ်းၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ မီးၵူၼ်းတိတ်းၸပ်း ၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 ၼမ်ၶိုၼ်ႈ ၵူႈဝၼ်း တေႃႇထိုင်ယၢမ်းလဵဝ် မီးၵူၼ်းၸပ်းတၢင်းပဵၼ် 167 ၵေႃႉ လႄႈ လူႉတၢႆယဝ်ႉ 4 ၵေႃႉ။
မိူဝ်ႈၼႆႉ ဝၼ်းတီႈ 7/7/2021 ယၢမ်းၵၢင်ၼႂ် ယူႇတီႈၵေႃႇမတီႇၾၢႆႇဢုပ်ႉပိူင်ႇ ဢိူင်ႇၼမ်ႉမ ၸႄႈဝဵင်းသီႇပေႃႉ ၵႂႃႇသေႃႇပၢဝ်ႇ ပၼ်ၾၢင်ႉၵူၼ်းမိူင်း ၼႂ်းဝၢၼ်ႈ ႁႂ်ႈဢွၼ်ၵၼ် ၽွမ်ႉၵၼ်ၵႅတ်ႇ ၵင်ႈတၢင်းပဵၼ်ၶူဝ်ႊဝိတ်ႉ 19 ၼင်ႇႁိုဝ် ပေႃးတေဢမ်ႇၽႄႈလၢမ်း တိတ်းၸပ်းမႃးတၢင်းဝၢၼ်ႈ ႁၢဝ်ႈႁႅင်း ဝႃႈၼႆ။
ၵူၼ်းၼုမ်ႇ ၼမ်ႉမ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ တႃႈႁႂ်ႈၵူၼ်းမိူင်းမေႃယူႇမေႃၵိၼ်၊ ႁႂ်ႈမေႃၾၢင်ႉလႄႈယႃႇႁႂ်ႈယူႇမဝ်ၵိၼ်မၢင်ၼၼ်ႉ ၼိုင်ႈဝူင်ႈလႂ်ႁဝ်းၶႃႈ လူင်းသေႃႇပၢဝ်ႇၼႂ်းဝၢၼ်ႈ 2 ပွၵ်ႈ။ ၵေႃႇမတီႇၵႅတ်ႇၶႄႁႄႉၵင်ႈတၢင်းပဵၼ်ၵေႃႈ ၶိုၼ်းဢွၼ်ၵၼ်တင်ႈလၢၼ်ႇ တၢင်းၶဝ်ႈ/ဢွၵ်ႇ ဢိူင်ႇ/ဝၢၼ်ႈႁဝ်းၶႃႈသေပႂ်ႉၵူတ်ႇထတ်းၸႅတ်ႈထၢမ် ၶိုၼ်း။ တႄႇႁဵတ်းမႃးမီးၶၢဝ်းတၢင်း 3-4 ဝူင်ႈၼႆႉယဝ်ႉၶႃႈ။ သင်ဝႃႈ ယၢမ်းၵၢင်ၶိုၼ်း 10 မူင်းပူၼ်ႉၵႂႃႇၼႆ ႁဝ်းၶႃႈ ဢမ်ႇပၼ် ၵူၼ်းၶဝ်ႈ ဢွၵ်ႇၵႂႃႇမႃးယဝ်ႉၶႃႈ”- ၵူၼ်းၼုမ်ႇၼမ်ႉမ သိုပ်ႇလၢတ်ႈၼႄထႅင်ႈၼင်ႇၼႆ။
ဝၼ်းမိူဝ်ႈၼႆႉ ၼႂ်းၸိုင်ႈတႆးပွတ်းႁွင်ႇ ၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ 19 မီး 1000 ပၢႆ တၢႆ40 ပၢႆ။ တီႈလႃႈသဵဝ်ႈလႄႈ ၼမ်ႉၶမ်း၊ လၢဝ်ႇၵၢႆး တိတ်းၸပ်းလူႉတၢႆၼမ်လိူဝ်ပိူၼ်ႈ။ ၼႂ်းၸိုင်ႈတႆးပွတ်းၸၢၼ်းၵေႃႈ ၶႂ်ႈဝႃႈမီးၵူၼ်းတိတ်းၸပ်းၵူႈဝဵင်းယဝ်ႉ။ ၵူၼ်းတိတ်းၸပ်းတင်းမူတ်းမီး ၼပ်ႉႁူဝ်ပၢၵ်ႇလႄႈလူႉတၢႆမီးၼပ်ႉႁူဝ်သိပ်းယဝ်ႉၼင်ႇၵဝ်ႇ။