မိူဝ်ႈၼႆႉ ဝၼ်းတီႈ 29/04/2025 ယၢမ်းၵၢင်ၼႂ်မွၵ်ႈ 10 မူင်း သိုၵ်းၵဝ်ႈၵၢင်ႉ MNDAA တင်း သိုၵ်းတႆး SSPP ပဵၼ်ပၢင်တိုၵ်းၵၼ်ႁၢဝ်ႈႁႅင်း ႁိမ်းဝၢၼ်ႈၼမ်ႉမ ၼႂ်းဢိူင်ႇၼမ်ႉမ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။

လွင်ႈတၢင်းဢၼ် သိုၵ်းတင်းသွင်ၸုမ်း လႆႈၶဵင်ႈၶႅင်ၵၼ်သေ ၵိူတ်ႇပဵၼ်ပၢင်တိုၵ်းၼႆႉ ယွၼ်ႉသိုၵ်းၵဝ်ႈၵၢင်ႉ လုၵ်ႉတၢင်း ဝဵင်းလႃႈသဵဝ်ႈလႄႈ ၼမ်ႉပွင်ႈ ၶဝ်ႈၵႂႃႇၼႂ်းဢိူင်ႇၼမ်ႉမ ၼႃႈတီႈ ပႃႇတီႇမႂ်ႇသုင်ၸိုင်ႈ တႆး/တပ်ႉသိုၵ်းၸိုင်ႈတႆး SSPP/SSA ၵုမ်းၵမ် ၼႆ ၵူၼ်းမိူင်းဝဵင်းသီႇပေႃႉ ၵေႃႉၼိုင်ႈ လၢတ်ႈၼႄတီႈၽူႈတွႆႇႁွၵ်ႈ ၼင်ႇၼႆ။

“တၢင်းၼမ်ႉမၼႆႉ ႁဝ်းႁူႉတႄႉ မီးဝႆႉမေႃႇထၢၼ်ႇႁိၼ် ဢၼ်သိုၵ်းတႆးၵုမ်းဝႆႉ ၸဵမ်မိူဝ်ႈပၢၼ်လႂ်ပုၼ်ႉ။ မေႃႇ ထၢၼ်ႇႁိၼ်ၼႆႉ ပဵၼ်ဢွင်ႈတီႈဢၼ်ၵမ်ႉယၼ်ပၼ် သိုၵ်းတႆးတႄႉတႄႉဝႃႈဝႃႈယူႇ ၾၢႆႇၼိုင်ႈ။ လွင်ႈၵႂႃႇၵႃႉ မႃးပႆ ၸဝ်ႈဝူဝ်း ၸဝ်ႈၵႂၢႆး ၵႃႉမႆႉၶဝ် လတ်းၽၢၼ်ႇသဵၼ်ႈတၢင်းၼၼ်ႉ ၸဵမ်မိူဝ်ႈၵွၼ်ႇယဝ်ႉ။ တူၺ်းတႄႉ လႅပ်ႈသိုၵ်းၵဝ်ႈၵၢင်ႉၶဝ် ၶႂ်ႈၶဝ်ႈၵႂႃႇႁိမ်ဢဝ်မေႃႇထၢၼ်ႇႁိၼ်ၶႃႈယူဝ်ႉ။ ၸဵမ်မိူဝ်ႈပူၼ်ႉမႃး သွင်သၢမ်ဝၼ်း ပုၼ်ႉယဝ်ႉ သိုၵ်းၵဝ်ႈၵၢင်ႉၶဝ် ဢဝ်ႁႅင်းသိုၵ်းတႃႇၵႃးလမ်းၼိုင်ႈႁႄ ၶဝ်ႈၵႂႃႇ။ သိုၵ်းတႆးၸူးႁႄႉႁၢမ်ႈလႄႈ ၶဝ်ၸင်ႇ တႄႇၶဵင်ႈၶႅင်ၵၼ်မႃး”။

ဢိင်ၼိူဝ် လွင်ႈၼႆႉသေ ယူႇတီႈ ၸုမ်းၶၢဝ်ႇၽူႈတွႆႇႁွၵ်ႈ ၵပ်းၸူးၽူႈၶၢၼ်ပၢၵ်ႇ တင်းသွင်ၾၢႆႇၵေႃႈ ဢမ်ႇလႆႈလႄႈ လွင်ႈတၢင်းပၢင်တိုၵ်းပဵၼ်ႁိုဝ်တႄႉတႄႉ လွင်ႈမၢတ်ႇၸဵပ်းလူႉတၢႆမီးၸိူင်ႉႁိုဝ်တႄႉဢမ်ႇႁူႉတႅတ်ႈတေႃး ။

ၵူၺ်းၵႃႈ ၵူၼ်းပိုၼ်ႉတီႈလၢတ်ႈဝႃႈ မွၵ်ႈၶၢဝ်းယၢမ်း 9 မူင်းၼႆႉ သိုၵ်းၵဝ်ႈၵၢင်ႉ ၽႃႇၺႃးမၢၵ်ႇ တီႈတၢင်းၽႄ ပၢင်ငႃးလႄႈ တၢင်းၶိုၼ်ႈၵျွင်းပၢင်ႁုင်း ၼူၵ်ႉၵူတ်းႁူးမီ ။ မီးလွင်ႈမၢတ်ႇၸဵပ်းလူႉတၢႆၼမ်။ ဢၼ်တၢႆတႄႉဢမ်ႇႁူႉတႅတ်ႈတေႃး ဢၼ်မၢတ်ႇၸဵပ်းမီး 20 ပၢႆ။ ယၢမ်းၵၢင်ဝၼ်းၼႆႉ ၶဝ်ဢဝ်ၵူၼ်းသိုၵ်းၶဝ်တၢင်ႇၵႃးၶိုၼ်ႈမိူဝ်းတၢင်းၼမ်ႉပွင်ႈယဝ်ႉ – ဝႃႈၼႆ။

ယၢမ်းလဵဝ် တင်းသွင်ၾၢႆႇ ထႅမ်ႁႅင်းသိုၵ်းဝႆႉ ႁင်းၽႂ်မၼ်းသေ ပဵၼ်ပၢင်တိုၵ်းၵၼ်ဝႆႉ ႁိမ်းဝၢၼ်ႈၼမ်ႉမ ဝၢၼ်ႈၼႃးၼၢင်း – တိုင်းႁႆး ၵႄႈၵၢင်ထုင်ႉၼမ်ႉပွင်ႈတင်း ဢိူင်ႇၼမ်ႉမယူႇလႄႈ ႁဵတ်းႁႂ်ႈ ၵူၼ်းဝၢၼ်ႈတိုင်းႁႆး၊ ဝၢၼ်ႈၶူဝ်ၼႃးၾႃႉလႄႈ ဝၢၼ်ႈၵျွင်းမႆႇ ပၢႆႈဢွၵ်ႇဝၢၼ်ႈ ငိူင်ႉပၢႆႈၽေးသိုၵ်းဝႆႉ။

တီႈတၢင်းဝၢၼ်ႈၸၢင်ႉ ၼၼ်ႉၵေႃႈ သွင်ၾၢႆႇၶဵင်ႈၶႅင်ၵၼ်ဝႆႉ။ သိုၵ်းတႆး ဢဝ်တီႈယူႇဝႆႉၸွမ်းတူၼ်းႁၢဝ်းသၼ်လွႆ၊ သိုၵ်းၵဝ်ႈၵၢင်ႉတႄႉၶဝ်ႈဢဝ်တီႈယူႇဝႆႉၼႂ်းဝၢၼ်ႈ ၵူႈၵိဝ်ႇ။ ႁဵတ်းႁႂ်ႈၵူၼ်းဝၢၼ်ႈမႆႈၸႂ်ၵူဝ်ပဵၼ်ပၢင်တိုၵ်း။ ၵမ်ႈၽွင်ႈၵေႃႈႁၢင်ႈႁႅၼ်းတႃႇႁႃတၢင်းပၢႆႈယူႇယဝ်ႉ – ၵူၼ်းပိုၼ်ႉတီႈလၢတ်ႈၼင်ႇၼႆ။

တႅမ်ႈ – ၽူၺ်းၼုမ်ႇ