ၶူဝ်ႊဝိတ်ႉ ၽႄႈဝႆးဝဵင်းၼမ်ႉၶမ်း လႆႈမုင်းသုမ်ႉၶႂၢၵ်ႈတီႈဝႆႉၵူၼ်းပဵၼ် တီႈႁူင်းယႃ

ယၢမ်းလဵဝ် ၼႂ်းၸႄႈဝဵင်းၼမ်ႉၶမ်း မီးၵူၼ်းတိတ်းၸပ်းၸိူဝ်းမႅင်းၶူဝ်ႊဝိတ်ႉ 19 ပုင်ႈၶိုၼ်ႈၼမ်မႃးၵူႈဝၼ်း တေႃႇထိုင်မိူဝ်ႈဝႃးၼႆႉမီး 140 ဢွင်ႈတီႈ တႃႇဝႆႉၵူၼ်းပဵၼ် တီႈႁူင်းယႃဢမ်ႇပေႃးလႄႈ ၵူၼ်းၼုမ်ႇလႄႈ ၸုမ်းတူင်ႉၼိုင်တူင်ႇဝူင်းၵူၼ်းၸွႆႈၵၼ် မုင်းလင်ၶႃးၶႂၢၵ်ႈပိုၼ်ႉတီႈထႅင်ႈ ။ 

မိူဝ်ႈဝႃး ဝၼ်းတီႈ 6/7/2021 တီႈႁူင်းယႃ ၸႄႈဝဵင်းၼမ်ႉၶမ်း ၸိုင်ႈတႆး ပွတ်းႁွင်ႇ ၵေႃႇၵၢႆႇသၢင်ႈပၼ် ဢွင်ႈတီႈယူႇ တႃႇ ၵူၼ်းပဵၼ်တိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 ပေႃးတေႁၵ်ႉသႃယူတ်းယႃတူဝ်ၵၼ် တီႈၼႂ်းႁူင်းယႃၼၼ်ႉ ၼႆယဝ်ႉ။

ၵူၼ်းၼုမ်ႇ ၼမ်ႉၶမ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “  ဢမ်ႇၶႂ်ႈႁႂ်ႈ ၵူၼ်းပဵၼ်  ယူႇၸမ်ၵၼ် တိတ်းၵၼ်ႁႅင်းၼႃႇဢႃးလႃးၶႃႈဢေႃႈ။ ႁႂ်ႈယူႇႁၢင်ႇၵႆၵၼ် ယဝ်ႉၵေႃႈ ၼင်ႇႁိုဝ် မေႃယႃ ၶဝ် ပေႃးတေၸၢင်ႈလုမ်းလႃးတူၺ်းထိုင် ၵူၼ်းပဵၼ်ငၢႆႈ ၸိူဝ်းၼႆႉၵေႃႈပႃးထႅင်ႈ။ ၵွပ်ႈၼႆလႄႈ ၸင်ႇၵေႃႇၵၢႆႇဢွၵ်ႇမႃး တၢင်း ၼွၵ်ႈႁူင်းယႃထႅင်ႈ ၵူၺ်းၵႃႈ ပဵၼ်တီႈၼႂ်းဝၢင်းႁူင်းယႃၼၼ်ႉၵူၺ်း ဢၼ်ၵေႃႇၵၢႆႇပၼ်ၼၼ်ႉၵေႃႈ”- ဝႃႈၼႆ။

မိူဝ်ႈဝႃး ဝၼ်းတီႈ 6/7/2021 ၼႂ်းၸႄႈဝဵင်းၼမ်ႉၶမ်းၵူတ်ႇထတ်း ၵူၼ်းတိတ်းၸပ်း ၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 တင်း မူတ်းမီးၵႂႃႇ 41 ၵေႃႉ။ လူႉတၢႆ ထႅင်ႈၵေႃႉၼိုင်ႈ ၼၢင်းယိင်း ဢႃယု 30 ပၢႆ ၵေႃႉၼိုင်ႈ။ ၼႂ်းၵူၼ်းပဵၼ် 41 ၼၼ်ႉ ပႃးလုၵ်ႈဢွၼ်ႇ ဢႃယု 1 ၶူပ်ႇ တင်း 2 ၶူပ်ႇ 4 ၵေႃႉ ၼႆယဝ်ႉ။

“ယၢမ်းလဵဝ် ၶႂ်ႈၾၢၵ်ႇထိုင်ၵူၼ်းၼမ်ႉၶမ်းႁဝ်းၶႃႈတႄႉ သင်ဝႃႈ ဢမ်ႇမီးလွင်ႈယုမ်ႇတူဝ် ၼႆႁႂ်ႈဢွၼ်ၵၼ်ၵႂႃႇ ၵူတ်ႇ ထတ်းၵမ်းလဵဝ်။  ၼင်ႇႁိုဝ် တေဢမ်ႇလၢမ်းၸပ်းၵူၼ်းႁိူၼ်းႁဝ်း။    ဢၼ်ၵူၼ်းၼမ်ႉၶမ်းလႆႈတိတ်းၸပ်းတၢင်းပဵၼ်ၼမ်ႁႅင်းၼႆႉ ယွၼ်ႉပိူဝ်ႈ ဢမ်ႇယွမ်းႁပ်ႉလွင်ႈတၢင်းပဵၼ်ၼႆႉ။ ဢၢႆၵၼ်။ ၵမ်ႈၽွင်ႈလၵ်ႉယူတ်းယႃတူဝ်ယူႇတီႈႁိူၼ်းႁင်းၵူၺ်းၵေႃႈမီး။ ပိူင်လူင်တႄႉဝႆႉမဝ်မၢင်ၼိူဝ်တၢင်းပဵၼ်ၼႆႉၶႃႈဢေႃႈ။ ”- ဝႃႈၼႆ။

ယူႇတီႈၵူၼ်းၼုမ်ႇၼမ်ႉၶမ်းတုၵ်းယွၼ်းထိုင်ပႃး ၾၢႆႇၽွင်းငမ်း၊ ၾၢႆႇပၢႆးယူႇလီ ဢိၵ်ႇၵူႈၾၢႆႇၾၢႆႇ ႁႂ်ႈသႂ်ႇၸႂ်ၼိူဝ်တၢင်းပဵၼ်သေ ႁႂ်ႈတူၺ်းလူပၢႆးယူႇလီပၼ်ၵူၼ်းမိူင်းႁႂ်ႈၵုမ်ႇထူၼ်ႈ ဝႃႈၼႆ။

ယၢမ်းလဵဝ်ၾၢႆႇပၢႆးယူႇလီၵမ်ႈၼမ် သမ်ႉသၢၼ်ၶတ်းဢႃႇၼႃႇသိုၵ်းသေ ႁဵတ်း CDM ဝႆႉလႄႈ မေႃယႃဢမ်ႇၵုမ်ႇထူၼ်ႈ လႄႈ ၸင်ႇလႆႈပဵၼ်မႃးၸိူင်ႉၼႆဝႃႈၼႆ။

 “တီႈၼမ်ႉၶမ်းႁဝ်းၶႃႈၼႆႉ ပေႃးၸပ်းတၢင်းပဵၼ်ၼႆ ၸပ်းတင်းႁိူၼ်းၶႃႈဢေႃႈ ။   ပိူင်လူင်တႄႉ ဢွၵ်ႊသိၼ်ႊၵျိၼ်ႊၵေႃႈ တုၵ်ႉလူဝ်ႇထႅင်ႈယူႇၶႃႈ၊ မိူဝ်ႈဝႃးၼႆႉ ၸုမ်းတူင်ႇဝူင်းၼႂ်းၼမ်ႉၶမ်း သိုဝ်ႉ လူႇ ၽွင်ႈယဝ်ႉၵူၺ်းၵႃႈယင်းတိုၵ်ႉလူဝ်ႇထႅင်ႈယူႇဢေႃႈ”- ၵူၼ်းၼုမ်ႇၼမ်ႉၶမ်း သိုပ်ႇလၢတ်ႈၼႄ ထႅင်ႈၼင်ႇၼႆ။

ယၢမ်းလဵဝ် ၼႂ်းၵၢင်ဝဵင်း ၸွမ်းၵၢတ်ႇ ၼႂ်းဝဵင်းၼမ်ႉၶမ်း ၸိူဝ်းၼႆႉ ယဵၼ်သီႇ ဢမ်ႇမီးၵူၼ်းၵႂႃႇမႃးၵၼ် ၵမ်ႈၼမ် ဢွၼ်ၵၼ် Stay at Home ၵၼ် ၼႆယဝ်ႉ။

“မိူဝ်ႈလဵဝ်ၼႆႉ ၵူၼ်းမိူင်းၼမ်ႉၶမ်း ဢွၼ်ၵၼ် Stay at Home ဝႆႉႁင်းၽႂ်။ပေႃးမီးတၢင်းလူဝ်ႇၵေႃႈ ယူႇၵႆၵႆသေ လၢတ်ႈတေႃႇၵၼ် ဢမ်ႇၼၼ် လၢတ်ႈတေႃႇၵၼ် တၢင်းၾူၼ်း ၸိူဝ်းၼႆႉၵူၺ်း။ ပေႃးဢမ်ႇၵႂႃႇဢမ်ႇပဵၼ် လူဝ်ႇသူင်ႇၶွင် ၸိူဝ်းၼႆႉၵေႃႈ ယိုၼ်ႈပၼ်သေ ပွၵ်ႈၵမ်းလဵဝ်ၼၼ်ႉၶႃႈယဝ်ႉ။ ၵူၺ်းၵႃႈၾၢႆႇၽွင်းငမ်းၶဝ်ယင်းပႆႇပိုၼ်ၽၢဝ်ႇႁႂ်ႈ Lockdown ဝဵင်း။ ႁူင်းႁဵၼ်းၵေႃႈဢမ်ႇမီးလိၵ်ႈသင်ႇပိၵ်ႉၶႃႈ။ လၢၼ်ႉတၢင်းၶၢႆလႄႈၵၢတ်ႇတႄႉ ၽိူဝ်ႇၵူၼ်းမိူင်းဢဝ်ၸႂ်ႁူႉသေ ပိၵ်ႉဝႆႉတင်းႁိုင်ယဝ်ႉၶဝ်ၸင်ႇပိုၼ်ၽၢဝ်ႇၶႃႈလူး”-  ၵူၼ်းပိုၼ်ႉတီႈၼမ်ႉၶမ်း ၵေႃႉၼိုင်ႈ လၢတ်ႈတီႈၽူႈတွႆႇ ႁွၵ်ႈၼင်ႇၼႆ။

ယၢမ်းလဵဝ် ၼႂ်းၸႄႈဝဵင်းၼမ်ႉၶမ်းၼႆႉ မီးၵူၼ်းတိတ်းၸပ်း ၸိူဝ်ႉမႅင်းၶူဝ်ႊဝိတ်ႉ 19 တင်းမူတ်း 139 ၵေႃႉ လူႉတၢႆယဝ်ႉ 7 ၵေႃႉ ၼႂ်းၶၢဝ်းတၢင်း 15 ဝၼ်းမႃးၼႆႉ တေႃႇထိုင် ဝၼ်းတီႈ 6/7/2021 ၼႆႉ လူင်းႁူင်းယႃယဝ်ႉ 16 ၵေႃႉ ဝႃႈၼႆ။