ဢိင်ၼိူဝ် တၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းႁၢဝ်ႈႁႅင်းမႃးသေ သင်ဝႃႈ ၽူႈလႂ် ၽႂ် ၵေႃႉလႂ် တေၶဝ်ႈ ဝဵင်းၵဵင်း တုင်ၸိုင် တေလႆႈ ၵၵ်း/ ၵုမ်းတူဝ် တႃႇၶၢဝ်းတၢင်း 10 ဝၼ်း ၸွမ်းၼင်ႇၾၢႆႇၵဵဝ်ႇၶွင်ႈၸတ်းဝႆႉပၼ်၊ ၵူၺ်းၵႃႈ ၵႃႈယူႇၵိၼ် တၵ်းလႆႈဢွၵ်ႇႁင်းၵူၺ်း
တႄႇဢဝ် ဝၼ်းတီႈ 5/7/2021 ၼႆႈမႃး သင်ဝႃႈ ၽူႈလႂ် ၽႂ်ၵေႃႉလႂ် လုၵ်ႉတၢင်ႇၸႄႈဝဵင်း ၶဝ်ႈမႃးၼႂ်းၸႄႈဝဵင်းၵဵင်းတုင်ၸိုင်ႈတႆးပွတ်းဢွၵ်ႇၶူင်းၸိုင် တေလႆႈၵၵ်းတူဝ် တႃႇၶၢဝ်းတၢင်း 10 ဝၼ်း ၼင်ႇႁိုဝ် တၢင်းပဵၼ်ၶူဝ်ႊဝိတ်ႉ 19 ပေႃးတေ ဢမ်ႇၽႄႈလၢမ်းႁၢဝ်ႈႁႅင်း ၼႆယဝ်ႉ။
ၵူၼ်းၼုမ်ႇၵဵင်းတုင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ယူႇတီႈႁွင်ႈၵၢၼ် လူင်ပွင် ၸိုင်ႈ တီႈၵဵင်းတုင် ၶဝ်တိုၵ်ႉပိုၼ်ၽၢဝ်ႇ ဢွၵ်ႇမႃး မိူဝ်ႈဝၼ်းၸၼ်ၼႆႉၵူၺ်း ။ ၽႂ်တေၶဝ်ႈၵဵင်တုင်ၵေႃႈ တေလႆႈ Quarantine ၵၵ်းတူဝ် တႃႇၶၢဝ်းတၢင်း 10 ဝၼ်း။ လွင်ႈၵိၼ် လွင်ႈယူႇတင်းမူတ်း ယူႇတီႈတူဝ်ၸဝ်ႈၵဝ်ႇ တေလႆႈဢဝ်ပုၼ်ႈၽွၼ်းမူတ်းမူတ်းၼႆၶႃႈ”- ဝႃႈၼႆ။
ၵူၼ်းၵဵင်းတုင်ဢၼ်ၵႂႃႇယူႇတၢင်ႇတီႈသေပွၵ်ႈမႃးႁိူၼ်းၶိုၼ်းၵေႃႈလီ ၊ ၵူၼ်းတၢင်ႇတီႈသေတေမႃးၵဵင်းတုင်ၵေႃႈယဝ်ႉ တၵ်းတေလႆႈၵၵ်းတူဝ် ၵူႈၵေႃႈ လႆႈႁူႉၼင်ႇၼႆ။
“မိူဝ်ႈလဵဝ်ၼႆႉ ၵူၼ်းၵဵင်းတုင် ၸိူဝ်းၵႂႃႇယူႇတၢင်ႇပိုၼ်ႉတီႈႁႃႉ ဢမ်ႇၼၼ် ၵူၼ်းတၢင်ႇ ပိုၼ်ႉတီႈၶႂ်ႈမႃးၵဵင်းတုင် ၸိူဝ်းၼႆႉ သင်ဝႃႈ ၶဝ်ႈမႃးၼႂ်းၵဵင်းတုင်ၸိုင် တေလႆႈၵၵ်းတူဝ်မူတ်းမူတ်းၶႃႈ။ ယဝ်ႉၵေႃႈ သင်ဝႃႈ ၶဝ်ႈမႃးၼႆ တေလႆႈမီးဝႂ်ၵမ်ႉယၼ် ၸိူင်ႉႁိုဝ် တေလႆႈၵႂႃႇၵၵ်းတူဝ် ယူႇဝႆႉၸိူင်ႉႁိုဝ် တီႈလႂ် ၸိူဝ်းၼႆႉ ယူႇတီႈႁွင်ႈၵၢၼ်ၾၢႆႇ လူင်ပွင်ၸိုင်ႈတီႈၵဵင်းတုင်တႄႉ ပႆႇ ပိုၼ်ၽၢဝ်ႇ လၢႆးႁူဝ်ယွႆႈမၼ်း တေလႆႈႁဵတ်းၸိူင်ႉႁိုဝ် ဢၼ်ဝႃႈၼၼ်ႉ”- ၵူၼ်းၼုမ်ႇ ၵဵင်းတုင် သိုပ်ႇလၢတ်ႈၼႄၼင်ႇၼႆ။
ယၢမ်းလဵဝ် ၼႂ်းၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်းၼႆႉ မီးၵူၼ်းတိတ်းၸပ်း ၸိူဝ်ႉမႅင်းၶူဝ်ႊဝိတ်ႉ 19 ယဝ်ႉ 10 ပၢႆ ဝႃႈၼႆ။
ၵွပ်ႈၼႆလႄႈ ယၢမ်းလဵဝ် ၼႂ်းၸႄႈဝဵင်းၵဵင်းတုင် တၢင်းၶဝ်ႈဢွၵ်ႇ ၵူႈသဵၼ်ႈတၢင်း မိူၼ်ၼင်ႇ ၵဵင်းတုင် – တူၼ်ႈတီး၊ ၵဵင်းတုင် – တႃႈၶီႈလဵၵ်း လႄႈ ၵဵင်းတုင် – မိူင်းၶၢၵ်ႇ ၸိူဝ်းၼႆႉ ၵူတ်ႇထတ်းၵူၼ်းၶဝ်ႈဢွၵ်ႇၵႂႃႇမႃး ႁၢဝ်ႈႁႅင်း တႃႇၵႅတ်ႇၶႄႁႄႉၵင်ႈတၢင်း ပဵၼ် ၶူဝ်ႊဝိတ်ႉ 19 ၵူၼ်းပိုၼ်ႉတီႈၵဵင်းတုင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈၼင်ႇၼႆ။