ၵူၼ်းပၢႆႈၽေးသိုၵ်း တီႈၵေးသီး ႁဵင်ပၢႆ ထူပ်းတၢင်းယၢပ်ႇၽိုတ်ႇၵိၼ်းၸႂ် လိူဝ်ႁႅင်း ႁၢမ်းၵၢၼ်ၽုၵ်ႇသွမ်ႈ ယွၼ်ႉသိုၵ်း RCSS တင်း SSPP ယိုဝ်းၵၼ်မႃး မီးၶၢဝ်းတၢင်း လိူၼ်ပၢႆ ပၢင်တိုၵ်းယင်း ပႆႇယဵၼ်။

မိူဝ်ႈဝႃး ဝၼ်းတီႈ 1/7/2021 ၵူၼ်းဝၢၼ်ႈပၢႆႈပၢင်တိုၵ်း ႁွတ်ႈထိုင်ၼႂ်းဝဵင်းၵေးသီးထႅင်ႈ 587 ၵေႃႉ ယၢမ်းလဵဝ် ၼႂ်း ၸႄႈဝဵင်းၵေးသီး ၸိုင်ႈတႆးပွတ်းၸၢၼ်းၼႆႉ မီးၵူၼ်းပၢႆႈၽေးသိုၵ်း ဢမ်ႇယွမ်း 1,400 ၵေႃႉယဝ်ႉ ၵူၺ်းၵႃႈ သိုၵ်း RCSS တင်း SSPP ပၼ်တၢင်းတုၵ်ႉၶ မႆႈၸႂ် ၵူၼ်းမိူင်း ႁၢမ်းၵၢၼ်ငၢၼ်းၽုၵ်ႇသွမ်ႈသူၼ်ႁႆႈၼႃးၵၼ် ၵူၼ်းပၢႆႈၽေးသိုၵ်း ဢၼ် ပၢႆႈႁွတ်ႈထိုင် တီႈၵေးသီး ၵေႃႉၼိုင်ႈ လၢတ်ႈၼႄၽူႈတွႆႇႁွၵ်ၼင်ႇၼႆ။

“ယၢမ်းလဵဝ်ၼႆႉ ပဵၼ်ၶၢဝ်းလူဝ်ႇၽုၵ်ႇသွမ်ႈၼႃးၵၼ်ၶႃႈယဝ်ႉ။ ၶၢဝ်းၼႆႉ ပေႃးဢမ်ႇလႆႈၽုၵ်ႇသွမ်ႈႁဵတ်းၸိူင် တေပူၼ်ႉပႅတ်ႈ ၶၢဝ်းယၢမ်းမၼ်းၵႂႃႇယဝ်ႉ။ တႃႇၵိၼ်ပီတေမႃးတႄႉ တေယၢပ်ႇၽိုတ်ႇၵိၼ်းၸႂ်ၵၼ်ၶႃႈယဝ်ႉ။ ၵမ်ႈၽွင်ႈပေႃးဝၢင်ႇၵႃႈ ၸိူဝ်ႉ ၽၼ်းၶဝ်ႈၵၼ်ဝႆႉယဝ်ႉ၊ မၢင်ၸိူဝ်းပႆႇလႆႈႁဵတ်းၵေႃႈမီး၊ မၢင်ၸိူဝ်းတိုၵ်ႉလူဝ်ႇဝၢင်ႇၵႃႈ ၸိူဝ်းၼႆႉ မီးၶႃႈဢေႃႈ။ ယွၼ်ႉပၢင် တိုၵ်းၼႆႉသေ လႆႈဢဝ်ၶမ်/ၵိုတ်းဝႆႉ ၸိူင်ႉၼႆၶႃႈ။ သိုၵ်းၼႆႉ ဢမ်ႇယဝ်ႉဢမ်ႇယဵၼ်သေပွၵ်ႈၶႃႈလူင် မၼ်းတုမ်ႉတိူဝ်ႉႁဝ်းၶႃႈ ၵူၼ်းမိူင်းတႄႉတႄႉၶႃႈဢေႃႈ”-  ဝႃႈၼႆ။

သိုၵ်း RCSS တင်း SSPP ၼႆႉ တႄႇဢဝ် ဝၼ်းတီႈ 1/6/2021 မႃးတေႃႇထိုင် မိူဝ်ႈၼႆႉ ဝၼ်းတီႈ 2/7/2021 သွင်ၾၢႆႇ လႆႈပဵၼ်ပၢင်တိုၵ်းၵၼ်မႃး ၼႂ်းၸႄႈဝဵင်းၵေးသီး မီးၶၢဝ်းတၢင်း လိူၼ်ပၢႆ ။

“ယူႇတီႈႁဝ်းၶႃႈ ၵူၼ်းမိူင်းလၢမ်းၶၢတ်ႇတူၺ်းတႄႉ တၢင်းၾၢႆႇၸၢၼ်းၵေးသီးၼႆႉ မၼ်းမီးဝႆႉ ၶမ်းၽိူၵ်ႇ၊ ၽွႆး ၸိူဝ်းၼႆႉ ယဝ်ႉ ၵေႃႈ တီႈႁိမ်းမိူင်းၵၢဝ်သမ်ႉ မီးဝႆႉမေႃႇထၢၼ်ႇႁိၼ် ၶဝ်သွင်ၸုမ်းၼႆႉ တေႁိမ်ၵၼ်လွင်ႈၼႆႉၵူၺ်း။ လွင်ႈႁိမ်ၵၼ် လွႆလၢႆလၢႆ တႄႉ တေဢမ်ႇလွင်ႈယႂ်ႇၵႃႈႁိုဝ်။ ၵူၺ်းၵႃႈ သင်ၸုမ်းလႂ် လႆႈလွႆႁူၼ်းၾၢႆႇၸၢၼ်းၵေးသီးၼႆႉၵႂႃႇၸိုင် မၼ်းၵေႃႈ တေၵုမ်း လႆႈၶူဝ်းၶွင် ၸိူဝ်းၼၼ်ႉ တင်းမူတ်းၶႃႈယဝ်ႉ။ သိုၵ်းမၢၼ်ႈၵေႃႈၶႂ်ႈလႆႈ တီႈမေႃႇထၢၼ်ႇႁိၼ် ႁိမ်းမိူင်းၵၢဝ်ၼၼ်ႉ” – ၽူႈတူင်ႉ ၼိုင် ၼႂ်းတူင်ႇဝူင်းၵူၼ်း ၵေးသီး ၵေႃႉၼိုင်ႈ လၢတ်ႈၼႄၽူႈတွႆႇႁွၵ်ႈၼင်ႇ ၼႆ။

ပၢင်တိုၵ်းၼႆႉ မၼ်းၵိုင်ႇလီၵိုတ်း ၸဵမ်လႂ်ယဝ်ႉ ပဵၼ်သိုၵ်းတႆး ၼင်ႇၵၼ် ယိုဝ်းၵၼ်ၸိူင်ႉၼႆ ပၼ်တၢင်းတုၵ်ႉၶၵူၼ်းမိူင်း ယၢပ်ႇၽိုတ်ႇၶၼ်ၸႂ်ၵူၺ်း ၵူၼ်းပိုၼ်ႉတီႈၵေးသီး ၵေႃႉၼိုင်ႈ လၢတ်ႈၼႄၼင်ႇၼႆ။

ယၢမ်းလဵဝ် ၵူၼ်းပၢႆႈၽေးသိုၵ်း ၼႂ်းၸႄႈဝဵင်းၵေးသီးၼႆႉ တင်းမူတ်းတေမီး မွၵ်ႈ 1,400 ပၢႆ ၵမ်ႈၼမ် ပဵၼ်ၵူၼ်းမိူင်း ၼႂ်း ဢိူင်ႇၼွင်သွမ်း၊ မိူင်းၵၢဝ်လႄႈ ႁူဝ်ပူင်ႇ ၸိူဝ်းၼႆႉ။ ဢွင်ႈတီႈၵူၼ်းပၢႆႈၽေးသိုၵ်း မႃးသွၼ်ႈၵၼ်ဝႆႉသမ်ႉ တေပဵၼ် ဝတ်ႉၼွင် သွမ်း၊ ဝတ်ႉသုဝၼ်ႇၼ သီႇရိ ႁူင်းၶမ်း၊ ဝတ်ႉၵျွင်းလူင်ပွင်ႇဢုတ်ႇ၊ ဝတ်ႉၼွင်ဝူဝ်း၊ ဝတ်ႉလွႆသႅင်၊ ဝတ်ႉ မိူင်းၼိမ် ၸိူဝ်းၼႆႉ။