တီႈဝဵင်းၼမ်ႉလၼ်ႈ ၸိုင်ႈတႆးပွတ်းႁွင်ႇ ၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ 19 ပုင်ႈၶိုၼ်ႈထိုင် 40 ၵေႃႉ ယၢမ်းလဵဝ်ထိုင်တီႈလႆႈပိၵ်ႉၵၢတ်ႇဝႆႉ ၼိုင်ႈဝူင်ႈ ဝႃႈၼႆ။
တႄႇဢဝ် ဝၼ်းတီႈ 29/6/2021 တေႃႇထိုင် 5/7/2021 တႃႇၶၢဝ်းတၢင်း 7 ဝၼ်း ယူႇတီႈ ၾၢႆႇၶွမ်ႊမတီႊၵႅတ်ႇၶႄႁႄႉၵင်ႈ တၢင်းပဵၼ်ၶူဝ်ႊဝိတ်ႉ 19 ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ဢွၵ်ႇလိၵ်ႈပိုၼ်ၽၢဝ်ႇ ၸီႉသင်ႇ ႁႂ်ႈပိၵ်ႉဢိုတ်းၵၢတ်ႇ ဝဵင်း ၼမ်ႉလၼ်ႈတင်း ၵၢတ်ႇၽၵ်းၶဵဝ် ဝဵင်းသီႇပေႃႉ ဝႆႉၸူဝ်ႈၶၢဝ်း ၼႆယဝ်ႉ။
ၽူႈတူင်ႉၼိုင် ၼႂ်းတူင်ႇဝူင်းၵူၼ်း ၼမ်ႉလၼ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၵၢတ်ႇၼမ်ႉလၼ်ႈလႄႈ ၵၢတ်ႇ ၽၵ်းၶဵဝ် သီႇပေႃႉတႄႉ ပိၵ်ႉဢိုတ်းၸူဝ်ႈၶၢဝ်းၶႃႈဢေႃႈ။ ယွၼ်ႉဝႃႈ တီႈၵၢတ်ႇၽၵ်းၶဵဝ် သီႇပေႃႉၼၼ်ႉ ထူပ်းႁၼ် ၵူၼ်းမီး မႅင်း ၼႂ်းၵၢတ်ႇၼၼ်ႉလႄႈ ၾၢႆႇလိူမ်ႈလႆႇၶဝ် ၸင်ႇလႆႈ ဢွၵ်ႇလိၵ်ႈဢိုတ်းဝႆႉ။ ၵူၺ်းၵႃႈ ၵၢတ်ႇလူင်သီႇပေႃႉတႄႉ ဢမ်ႇ ဢိုတ်းၶႃႈ တေပၼ်ႇပုတ်ႈၵၼ်သေပိုတ်ႇၶၢႆၵႂႃႇၶႃႈဢေႃႈ”- ဝႃႈၼႆ။
တီႈၵၢတ်ႇဝဵင်းၼမ်ႉလၼ်ႈၼႆႉသမ်ႉ ဢွင်ႈတီႈၶၢႆၽၵ်းၶဵဝ် သိူဝ်ႈၶူဝ်းလႄႈ ၶွင်ၵိၼ်ယႅမ်ႉ ၶူဝ်းၵုၼ်ႇၸိူဝ်းၼႆႉသမ်ႉ ပဵၼ်ဝႆႉတီႈလဵဝ် ၼႆယဝ်ႉ။
“ တႃႇႁႃၵိၼ်လဵင်ႉတွင်ႉၶႃႈၼႃႇၼေႃႈ ။ ၵမ်ႈၽွင်ႈၵေႃႈ ၵူၼ်းၶၢႆၶူဝ်းၶဝ် ဢွၵ်ႇမႃးၶၢႆၸွမ်းၾင်ႇတၢင်း ၸိူဝ်းၼႆႉၵေႃႈ မီးၼမ် ၶႃႈဢေႃႈ ယွၼ်ႉပိူဝ်ႈၵၢတ်ႇဢိုတ်းဝႆႉယဝ်ႉလႄႈ”- ၵူၼ်းၼမ်ႉလၼ်ႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈၼင်ႇၼႆ။
ယၢမ်းလဵဝ် ၼႂ်းဝဵင်းၼမ်ႉလၼ်ႈၼႆႉ ၵူၼ်းတိတ်းၸပ်း ၸိူဝ်ႉမႅင်းတၢင်းပဵၼ် တင်းမူတ်းမီး 40 ၵေႃႉ။ ယူတ်းယႃ တူဝ်ဝႆႉ တီႈႁူင်းယႃၼမ်ႉလၼ်ႈလႄႈ သီႇပေႃႉ။ ဢၼ်ၶႅၼ်းၸိုၼ်ႈသေလႆႈလူင်းႁူင်းယႃယဝ်ႉ 16 ၵေႃႉ လူႉတၢႆ 2 ၵေႃႉ ယူႇတီႈၽူႈ ၸွႆႈထႅမ် ၼႂ်းၸုမ်း (ဖြူစင်နှလုံးသား) ၼမ်ႉလၼ်ႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈၼင်ႇၼႆ။
