မိူဝ်ႈၼႆႉ ဝၼ်းတီႈ 30/6/2021 ယၢမ်းၵၢင်ၼႂ် မွၵ်ႈ 10 မူင်း ၶွင်ႇသီႇသိုၵ်းမၢၼ်ႈ/ ပလိၵ်ႈ မိူၵ်ႈမႂ်ႈ ပွႆႇတူဝ် ၵူၼ်းမိူင်း/ ၵူၼ်းၼုမ်ႇ ၶိုၼ်း တႃႇ 19 ၵေႃႉ ၸိူဝ်းၺႃးတီႉၺွပ်း ၽွင်းၼႄၵၢင်ၸႂ် သၢၼ်ၶတ်း တေႃႇၶွင်ႇသီႇသိုၵ်းမၢၼ်ႈ ။
ၵူၼ်းၼုမ်ႇ မူႇၸေႊ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“ၸႂ်ႈၶႃႈဢေႃႈ မိူဝ်ႈၼႆႉ ၵၢင်ၼႂ် 10 မူင်း ၶဝ်ပွႆႇတူဝ် ၵူၼ်းမိူင်း/ ၵူၼ်းၼုမ်ႇ ၸိူဝ်းၶဝ် တီႉၵႂႃႇ မိူဝ်ႈၽွင်းၼႄၵၢင်ၸႂ် သၢၼ်ၶတ်းၶဝ်ၼၼ်ႉၶႃႈဢေႃႈ။ ၶဝ်ပွႆႇၶိုၼ်းတႄႉ 19 ၵေႃႉၶႃႈ။ ၸိူဝ်းၶဝ်ၼႆႉ လႆႈယူႇၼႂ်းၶွၵ်ႈ တေမီးၶၢဝ်းတၢင်းႁိုင် 100 ဝၼ်းပၢႆၶႃႈ”- ဝႃႈၼႆ။
ၵူၼ်းမိူင်း/ ၵူၼ်းၼုမ်ႇ ဢၼ်ထုၵ်ႇပွႆႇတူဝ်ဢွၵ်ႇမႃးမိူဝ်ႈၼႆႉ တင်းမူတ်း 19 ၼႆႉ ပဵၼ်ၸၢႆး 15 ၵေႃႉ ယိင်း 4 ၵေႃႉ ။
ပေႃႈမႄႈ ၵူၼ်းၼုမ်ႇ ၵေႃႉၼိုင်ႈ ဢၼ်ထုၵ်ႇပွႆႇတူဝ်ဢွၵ်ႇမႃး မိူဝ်ႈၼႆႉ လၢတ်ႈတီႈၽူႈတွႆႇႁွၵ်ဝႃႈ – “ၵူၼ်းမိူင်း ၸိူဝ်းၶဝ် ပွႆႇမႃး ၼႆႉ လႆႈလူင်းလၢႆးမိုဝ်းသေ ပၼ်ၵႂၢမ်းမၼ်ႈတီႈၶဝ်ဝႃႈ တေဢမ်ႇႁဵတ်းထႅင်ႈၼႆသေ ၸင်ႇပွႆႇ ဢွၵ်ႇမႃးၶႃႈ”- ဝႃႈၼႆ။
ၵူၼ်းမိူင်း/ ၵူၼ်းၼုမ်ႇ ၸႄႈဝဵင်းမူႇၸေႊ ဢၼ်သိုၵ်းမၢၼ်ႈတီႉၺွပ်းၵႂႃႇၽွင်းၼႄၵၢင်ၸႂ် တင်းမူတ်းမီး မွၵ်ႈ 40 ပၢႆ။ ဢၼ်ပွႆႇတူဝ်ဢွၵ်ႇမႃးမိူဝ်ႈၼႆႉ 19 ၵေႃႉ။ လိူဝ် ၼၼ်ႉ တိုၵ်ႉမီးၼႂ်းၶွၵ်ႈယူႇ ၼႆယဝ်ႉ။
ၼႂ်းၵူၼ်းမိူင်း/ ၵူၼ်းၼုမ်ႇ 19 ၵေႃႉၼၼ်ႉ ပဵၼ်ၵူၼ်းပွၵ်ႉၸၢၼ်း 1 ၵေႃႉ၊ ပွၵ်ႉၵၢတ်ႇ 1 ၵေႃႉ၊ ပွၵ်ႉၵွင်းၼွင် 2 ၵေႃႉ၊ 105 လၵ်း 5 ၵေႃႉလႄႈ ထႅင်ႈ လၢႆလၢႆပွၵ်ႉ ၼႂ်းမူႇၸေႊ။
မိူဝ်ႈၼႆႉ သိုၵ်းမၢၼ်ႈပွႆႇၵူၼ်းတူၵ်းၶွၵ်ႈတီႈမူႇၸေႊၵူၺ်းဢမ်ႇၵႃး လၢႆဝၢၼ်ႈလၢႆဝဵင်း ၵေႃႈမီးလွင်ႈပွႆႇၶိုၼ်းယူႇမိူၼ်ၵၼ်။ ၵူၺ်းၵႃႈဝဵင်းလႂ်ပွႆႇပၼ်လၢႆၵေႃႉၼၼ်ႉတႄႉ ပႆႇလႆႈႁူႉတႅတ်ႈတေႃး။
မိူဝ်ႈဝႃးၵေႃႈ ႁွင်ႈၵၢၼ်ၶၢဝ်ႇသိုၵ်းမၢၼ်ႈ MRTV MWD ပိုၼ်ၽၢဝ်ႇဝႃႈ ပူတ်းပွႆႇပၼ် ၵူၼ်းပၢႆးမွၼ်းမၢၼ်ႈၸိုဝ်ႈသဵင်လင် လၢႆလၢႆၵေႃႉ ၸိူဝ်းၺႃးဢဝ်လိူင်ႈဝႆႉလူၺ်ႈမၢႆမီႈ 505 ။
ၵူၼ်းၵၢၼ်မိူင်းၵမ်ႈၽွင်ႈၵေႃႈဝႃႈ – ဝၼ်းတီႈ 3/7/2021 ၼႆႉ ပဵၼ်ဝၼ်းၵိူတ်ႇ ၽူႈၼမ်းသိုၵ်းမၢၼ်ႈမိူၵ်ႈမႂ်ႈ မိၼ်းဢွင်ႇလၢႆႇ လႄႈ သိုၵ်းမၢၼ်ႈၶႂ်ႈႁဵတ်းၼေလုမ်ႈၾႃႉလွင်ႈဝႃႈမီးလွင်ႈပူတ်းပွႆႇပၼ်ၶိုၼ်းၵူၼ်းမိူင်းယူႇ ၼႆၼၼ်ႉ- ဝႃႈၼႆ။