ၵူၼ်းၸပ်းတၢင်းပဵၼ်ၶူဝ်ႊဝိတ်ႉ 19 တီႈၵျွၵ်ႉမႄး 20 ၵေႃႉ ထူပ်းတၢင်းယၢပ်ႇၽိုတ်ႇ  လွင်ႈၶဝ်ႈၼမ်ႉတၢင်း ၵိၼ်။

တႄႇဢဝ် လိူၼ်ၵျုၼ်ႊ 2021 ၼႆႉမႃး ၼႂ်းၸႄႈဝဵင်းၵျွၵ်ႉမႄး ၸိုင်ႈတႆး ပွတ်းႁွင်ႇ ၵူတ်ႇထတ်းႁၼ် ၵူၼ်းတိတ်းၸပ်းၸိူဝ်ႉ မႅင်းတၢင်းပဵၼ်ၶူဝ်ႊဝိတ်ႉ 19 တင်းမူတ်း မီး 20 ၵေႃႉ ။ ယၢမ်းလဵဝ် လႆႈသူင်ႇယူတ်းယႃတူဝ်ဝႆႉတီႈၼႂ်းႁူင်းယႃလူင် ၵျွၵ်ႉမႄး၊  ထူပ်းတၢင်းယၢပ်ႇၽိုတ်ႇလွင်ႈၶဝ်ႈၼမ်ႉတၢင်းၵိၼ် ၼႆယဝ်ႉ။

ၽူႈမီးပုၼ်ႈၽွၼ်းၼႂ်းၸုမ်းၸွႆႈထႅမ် တူင်ႇဝူင်းၵူၼ်း မိုဝ်းယိုၼ်ႈ (ၵၢၼ်းလိၼ်ႉလႅတ်ႉမျႃး) ၵျွၵ်ႉမႄး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ၼႂ်းၸႄႈဝဵင်းၵျွၵ်ႉမႄးႁဝ်းၶႃႈၼႆႉ ၵူတ်ႇ ထတ်း ၵူၼ်းတိတ်းၸပ်းၶူဝ်ႊဝိတ်ႉ 19 ၼႂ်းဝဵင်း 4 ၵေႃႉလႄႈ ၼွင်ႉပိင် 14 ၵေႃႉ တင်းမူတ်း 20 ၵေႃႉ။ ၼႂ်း 20 ၵေႃႉၼၼ်ႉ ယၢမ်းလဵဝ် လႆႈသူင်ႇယူတ်းယႃဝႆႉတီႈ ႁူင်းယႃ ၵျွၵ်ႉမႄးယဝ်ႉ။ ၼႂ်းၼၼ်ႉ တႃႇ 4 ၵေႃႉတႄႉ ထူပ်းတၢင်းယၢပ်ႇၽိုတ်ႇၼမ်ႉ တႃႇတေၵိၼ်လႄႈ ၶဝ်ႈၸိူဝ်းၼႆႉၶႃႈဢေႃႈ ဢမ်ႇမီးၽႂ် မႃးၸွႆႈထႅမ်ၶႃႈ”- ဝႃႈၼႆ။

သိုပ်ႇလၢတ်ႈဝႃႈ – “ၶဝ်ႈၼမ်ႉတၢင်းၵိၼ်ၼႆႉ ႁႂ်ႈတီႈႁိူၼ်းသူင်ႇပၼ်ဢဝ်ၼႆသေတႃႉ မၢင်ၸိူဝ်းသမ်ႉ လႆႈထုၵ်ႇၵၵ်းတူဝ်တင်း ႁိူၼ်းလႄႈ ၵေႃႉဢၼ်ႁုင်မိုဝ်ႉသူင်ႇပၼ်ၼႆႉ ဢမ်ႇမီး ပဵၼ်ၸိူင်ႉၼႆဝႆႉၶႃႈဢေႃႈ”- ဝႃႈၼႆ။

ၵူၼ်းတိတ်းၸပ်း ၸိူဝ်ႉမႅင်းၶူဝ်ႊဝိတ်ႉ 19 ၼႂ်းဝဵင်းၵျွၵ်ႉမႄး တင်းမူတ်း 20 ၵေႃႉၼႆႉ ၼႂ်းၼၼ်ႉ ပႃးၵူၼ်းထဝ်ႈဢႃယု မွၵ်ႈ 70 ပၢႆ 2 ၵေႃႉ၊ လိူဝ်ၼၼ်ႉ လုၵ်ႈဢွၼ်ႇ ဢႃယု မွၵ်ႈ 5 ၶူပ်ႇလူင်းတႂ်ႈ 2 ၵေႃႉလႄႈ 7-8 ၶူပ်ႇ 3 ၵေႃႉ ယဝ်ႉၵေႃႈ ဢႃယု 30 – 40  ၸိူဝ်း ၼႆႉ။

ၼႂ်းလိူၼ်ၵျုၼ်ႊၼႆႉၵူၺ်း ၵူၼ်းတိတ်းၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 ၼႂ်းၸႄႈမိူင်းတႆးပုင်ႈၶိုၼ်ႈၼမ်မႃးႁၢဝ်ႈ ႁႅင်း။ ၵူၼ်းမိူင်းထူပ်းတၢင်းယၢပ်ႇၽိုတ်ႇ ၸဵမ်လွင်ႈၵႂႃႇမႃး၊ လွင်ႈၵႃႉၶၢႆၸိူဝ်းၼႆႉ။ မၢင်ဢွင်ႈတီႈ မၢင်ၸႄႈဝဵင်း ထုၵ်ႇ Lockdown တင်းမူႇဝၢၼ်ႈ တင်းပွၵ်ႉ ၸိူဝ်းၼႆႉၵေႃႈမီး။