သိုၵ်းမၢၼ်ႈတင်း သိုၵ်းတဢၢင်း TNLA တိုၵ်ႉသိုပ်ႇပဵၼ်ပၢင်တိုၵ်းၵၼ်ႁၢဝ်ႈႁႅင်း ႁိမ်းထုင်ႉၼွင်ပိင် ၸႄႈဝဵင်းၵျွၵ်ႉမႄးယူႇလႄႈ ၵူၼ်းမိူင်းတႃႇ 20 ဝၢၼ်ႈပၢႆ လႆႈၶၢႆႉဢွၵ်ႇၵႂႃႇယူႇဝႆႉတၢင်းဝၢၼ်ႈပုင်ႇဝူဝ်း၊ ႁၢႆးၵုၺ်၊ ၼမ်ႉႁၢင်ႈၶိူင်ႈ ၸိူဝ်းၼႆႉ ႁိုင်ၶၢဝ်းတၢင်းသွင်ဝူင်ႈပၢႆ ယၢမ်းလဵဝ် လူဝ်ႇတၢင်းၸွႆႈထႅမ်ဝႆႉထႅင်ႈ ၼႆယဝ်ႉ။

ၵူၼ်းမိူင်းၼိုင်ႈမိုၼ်ႇၵေႃႉပၢႆ ၸိူဝ်းပၢႆႈၽေးပၢင်တိုၵ်းဝႆႉၼၼ်ႉ ယၢမ်းလဵဝ် လူဝ်ႇတၢင်းၸွႆႈထႅမ် ၶဝ်ႈၼမ်ႉတၢင်းၵိၼ်၊ ၶိူင်ႈယႃႈယႃ ၸိူဝ်းၼႆႉၵူၺ်းဢမ်ႇၵႃး တွၼ်ႈတႃႇလုၵ်ႈဢွၼ်ႇလႄႈ ၼၢင်းယိင်းၸႂ်ႉတိုဝ်း မိူၼ်ၼင်ႇ ၶိူင်ႈၸႂ်ႉတိုဝ်းၼၢင်းယိင်း ၽႃႈဢွမ်ႈႁူဝ်လိူၼ်လႄႈ ၶိူင်ႈၸႂ်ႉသုၼ်ႇတူဝ် ၸဵမ်ၸိူဝ်းၼႆႉၼႆ –  ၵူၼ်းႁဵတ်းၵၢၼ် ၵမ်ႉၸွႆႈၵူၼ်းပၢႆႈၽေးပၢင်တိုၵ်း လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။

“မိူဝ်ႈလဵဝ် ၵူၼ်းပၢႆႈၽေးၶဝ် လူဝ်ႇတၢင်းၵမ်ႉၸွႆႈယႃႈယႃလႄႈ ၶဝ်ႈၼမ်ႉတၢင်းၵိၼ်၊ ၽႃႈယၢင်၊ သၢတ်ႇ၊ ပုင်းၼမ်ႉ ၸဵမ်ၸိူဝ်းၼႆႉ။ ၵမ်ႈၽွင်ႈ ၵိုင်ႉၵၢင်ႉလႆႈပၢႆႈမႃးလႄႈ ဢမ်ႇတၼ်းလႆႈ ဢဝ်ၽႃႈႁူမ်ႇၶူဝ်းၼွၼ်းမႃး။ သဵၼ်ႈတၢင်းတႃႇၵႂႃႇမႃးၵေႃႈ ၺႃးဢိုတ်းဝႆႉလႄႈ တေသိုဝ်ႉဢဝ်ဢၼ်မႂ်ႇၼႆၵေႃႈ ၵႃႈၶၼ်ယႂ်ႇႁႅင်းၼႃႇ။ ပၢင်တိုၵ်းတႄႉ တိုၵ်ႉပဵၼ်ယူႇႁိမ်းႁွမ်းၼွင်ပိင်၊ သိုၵ်းမၢၼ်ႈၶဝ် ထူဝ်းသိုၵ်းၵႂႃႇတၢင်းၸၶၢၼ်းတႃႇ ၵျွၵ်ႉမႄးၼၼ်ႉ”။

ၵဵဝ်ႇလူၺ်ႈပၢင်တိုၵ်းၼႆႉသေ သိုဝ်ႇၾၢႆႇသိုၵ်းမၢၼ်ႈ (ၶွမ်ႊမသျိၼ်ႊသိုၵ်း) ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႆႉ မိူဝ်ႈဝၼ်းတီႈ 29 လိူၼ်ဢေႃႊၵတ်ႊသ်ၼၼ်ႉဝႃႈ တႄႇဝၼ်းတီႈ 19 တေႃႇထိုင် ဝၼ်းတီႈ 29 ပဵၼ်ပၢင်တိုၵ်းၵၼ်တင်းသိုၵ်းတဢၢင်း ႁိုင်ယူႇၶၢဝ်းတၢင်း 12 ဝၼ်း ၼႂ်းထုင်ႉၼွင်ပိင် ၸွမ်းသဵၼ်ႈတၢင်းႁူၺ်ႈၵိုတ်ႈလႄႈ ႁိမ်းၶူဝ်ၵိုတ်ႈလူင်ၼၼ်ႉ တႃႇ 47 ပွၵ်ႈ တီႉၺွပ်းလႆႈၶိူင်ႈၵွင်ႈၵၢင်ႇၸေးသႅၼ်း 23 လဝ်း ၼႆယဝ်ႉ။

ပိူဝ်ႈတႃႇသိုၵ်းမၢၼ်ႈ တေဢဝ်ႁႅင်းၵူၼ်းသိုၵ်း ႁႅင်းၶိူင်ႈၵွင်ႈၵၢင်ႇ ထူဝ်းသိုၵ်းၶိုၼ်ႈၵႂႃႇတၢင်း ၸႄႈဝဵင်းၵျွၵ်ႉမႄး လႆႈငၢႆႈလီၼၼ်ႉ သိုၵ်းမၢၼ်ႈၶတ်းၸႂ်မူၼ်ႉမႄးၶိုၼ်း သဵၼ်ႈတၢင်းလႄႈ ၶူဝ်ၼႂ်းၵိုတ်ႈ ဢၼ်လူႉၵွႆဝႆႉ ယွၼ်ႉပၢင်တိုၵ်းၼၼ်ႉယူႇ။ ၾၢႆႇၼိုင်ႈၵေႃႈ သိုၵ်းမၢၼ်ႈတင်း သိုၵ်းတဢၢင်း ပဵၼ်ပၢင်တိုၵ်းၵၼ်ဝႆႉ တီႈဝၢၼ်ႈပၢင်ႇတိုင် ယၢၼ်ၵႆၵၼ်တင်း ဝဵင်းၵျွၵ်ႉမႄး မွၵ်ႈ 15 လၵ်းၼၼ်ႉယူႇၼႆ ၵူၼ်းမိူင်းပိုၼ်ႉတီႈ လၢတ်ႈၼႄၼင်ႇၼႆ။

ယွၼ်ႉၼၼ် ၵူၼ်းမိူင်းၸိူဝ်းယူႇသဝ်း ၸွမ်းဝၢၼ်ႈ၊ ၸွမ်းပွၵ်ႉ ၼႂ်းဝဵင်းသီႇပေႃႉ၊ ၵျွၵ်ႉမႄး ၼိူဝ်သဵၼ်ႈတၢင်းလူင် မိူင်းႁူမ်ႈတုမ်ၼၼ်ႉ လႆႈငိူင်ႉၵႂႃႇယူႇသဝ်းဝႆႉ တၢင်းဝဵင်းလႃႈသဵဝ်ႈၼႆ – ၵူၼ်းၸၢႆးၵေႃႉၸွႆႈထႅမ် ၵူၼ်းပၢႆႈၽေးပၢင်တိုၵ်း လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။

“ပၢင်တိုၵ်းၼႆႉ တိုၵ်ႉပဵၼ်တၢင်းပၢင်ႇတိုင်။ သဵင်ၵွင်ႈသဵင်မၢၵ်ႇလူင်တႄႉ လႆႈငိၼ်းထိုင်တၢင်း ၸၶၢၼ်းတႃႇၼၼ်ႉ။ ၵမ်ႈၽွင်ႈၵေႃႈ ၵႂႃႇတၢင်းဝဵင်းသီႇပေႃႉ၊ ၵမ်ႈၽွင်ႈ ၵႂႃႇတၢင်းလႃႈသဵဝ်ႈ မီးႁဵင်ပၢႆ”။

မိူဝ်ႈဝၼ်းတီႈ 29 သိုၵ်းမၢၼ်ႈယိုတ်းမိူင်း လၢမ်းလိမ်းယိုဝ်းၵွင်ႈလူင်သႂ်ႇၼႂ်းဝၢၼ်ႈ ၾၢႆႇပုၼ်ႉႁူၺ်ႈၵိုတ်ႈလႄႈ ၵူၼ်းၸၢႆး ဢႃယု 51 ပီ တိူဝ်ႉမၢတ်ႇၵႂႃႇၵေႃႉၼိုင်ႈ။ ထိုင်မႃးယၢမ်းႁူဝ်ၶမ်ႈ သိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်း ပွႆႇမၢၵ်ႇလူင်သႂ်ႇထႅင်ႈ ၼႂ်းဝၢၼ်ႈပၢင်ႇသပ်ႉပေႇ ႁိမ်းဝဵင်းမိူင်းလူင် ၸႄႈဝဵင်းၵျွၵ်ႉမႄး ၼၼ်ႉထႅင်ႈ 4 လုၵ်ႈလႄႈ တိူဝ်ႉၺႃးၼၢႆးၶၢဝ် လူႉလွၼ်ႇၵႂႃႇ ၼိုင်ႈပႃး၊ ၼၢင်းယိင်း လူႉတၢႆၵႂႃႇ 2 ၵေႃႉ ၵူၼ်းမိူင်းမၢတ်ႇၸဵပ်းၵႂႃႇၸွမ်း 6 ၵေႃႉ ၼႆယဝ်ႉ။

လိူဝ်ၼၼ်ႉ မိူဝ်ႈဝၼ်းတီႈ 30 လိူၼ်ဢေႃႊၵတ်ႊသ် ယၢမ်းၵၢင်ၶမ်ႈၼၼ်ႉၵေႃႈ သိုၵ်းမၢၼ်ႈၸႂ်ႉႁိူဝ်းမိၼ်တိုၵ်း ပွႆႇမၢၵ်ႇလူင်သႂ်ႇၼႂ်းဝၢၼ်ႈၼႃးၶေႃထႅင်ႈ 2 လုၵ်ႈ တိူဝ်ႉၺႃးႁိူၼ်းၵူၼ်းမိူင်းလူႉၵွႆၵႂႃႇ 4 လင် ၼႆယဝ်ႉ။

တႅမ်ႈ – ၽူၺ်းၼုမ်ႇ