ဢိင်ၼိူဝ် ငဝ်းလၢႆး ၼႂ်းပိုၼ်ႉတီႈ လႄႈပၼ်ႁႃလၢႆလၢႆဢၼ် ဢၼ်ၵူၼ်းမိူင်းဝဵင်းၼမ်ႉၶမ်း လႆႈႁူပ်ႉထူပ်းသေ မိူဝ်ႈၼႆႉပဵၼ်ဝၼ်းၵၢတ်ႇၼႆသေတႃႉၵေႃႈ ၵၢတ်ႇၼမ်ႉၶမ်းဢမ်ႇငိုၼ်း ဝဵင်းၼမ်ႉၶမ်းပေႃးယဵၼ်သီႇလူင်ဝႆႉ ၵူၼ်းမိူင်းၼမ်ႉၶမ်းလၢတ်ႈၼင်ႇၼႆ။

မိူဝ်ႈၼႆႉ ဝၼ်းတီႈ 29/6/2021 ပဵၼ်ဝၼ်းၵၢတ်ႇ 5 ဝၼ်းလႂ် ၼိုင်ႈပွၵ်ႈ ၼႂ်းၸႄႈဝဵင်း ၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆး ပွတ်းႁွင်ႇ ဢမ်ႇမီးၵူၼ်းမႃး ၶဝ်ႈသိုဝ်ႉၶၢႆ ၸၢႆႇၵၢတ်ႇ၊ ယွၼ်ႉလွင်ႈပၼ်ႁႃၼႂ်းပိုၼ်ႉတီႈ လၢႆၸိူဝ်ႉလၢႆလွင်ႈ ၸွမ်းၵၢတ်ႇ ၸွမ်း ၵၢင် ဝဵင်းၼမ်ႉၶမ်း ၸိူဝ်းၼႆႉ ဢမ်ႇမီးၵူၼ်း။

ၵူၼ်းၼမ်ႉၶမ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၼႆႉ ပဵၼ်ဝၼ်း ၵၢတ်ႇ ၼမ်ႉၶမ်း 5 ဝၼ်းလႂ် ၼိုင်ႈပွၵ်ႈ ၶႃႈဢေႃႈ။ ၵူၺ်းၵႃႈ  ၵူၼ်းဢမ်ႇၵိုၼ်းမိူၼ် မိူဝ်ႈၵူႈပွၵ်ႈၶႃႈ။ ၵၢတ်ႇၵေႃႈ ပိၵ်ႉၸဝ်ႉ ဢမ်ႇမီးၵူၼ်း။ တေ ပဵၼ်ယွၼ်ႉပၼ်ႁႃ မိူဝ်ႈဝႃး လွင်ႈမၢၵ်ႇတႅၵ်ႇၼႂ်း ၵႄႈပၢင်ၼႄၵၢင်ၸႂ်ၼၼ်ႉၵေႃႈတေပႃး။ ယဝ်ႉၵေႃႈ တၢင်းပဵၼ်ၶူဝ်ႊဝိတ်ႉ 19  ၸိူဝ်း ၼႆႉၵေႃႈ တေပႃးထႅင်ႈၶႃႈဢေႃႈ”- ဝႃႈၼႆ။

ၾၢႆႇၼိုင်ႈ မိူဝ်ႈၼႆႉမီးၶၢဝ်ႇလိုဝ်းဝႆႉဝႃႈ မီးလွင်ႈလိုပ်ႈလမ်းတီႉၺွပ်းၵူၼ်းဝၢၼ်ႈၵူၼ်းမိူင်း၊ လုၵ်ႈဢွၼ်ႇၵေႃႈဢမ်ႇဝႆႉၵိုတ်းၼႆလႄႈ ဢွၼ်ၵၼ်ဢမ်ႇႁတ်းဢွၵ်ႇႁိူၼ်းယေးၵေႃႈပႃး ၵူၼ်းၼမ်ႉၶမ်းလၢတ်ႈၼင်ႇၼႆ။

“ႁၢၼ်ႉၶၢႆၶူဝ်းၸိူဝ်းၼႆႉၵေႃႈ ပိၵ်ႉဢိုတ်းၼမ် ၸွမ်းသဵၼ်ႈတႃႈသၢႆတၢင်း ၼႂ်းၵၢင်ဝဵင်း ၸိူဝ်းၼႆႉၵေႃႈ ယဵၼ်သီႇမူတ်း မိူၼ် ဝဵင်းဢမ်ႇမီးၵူၼ်းၼၼ်ႉၶႃႈယဝ်ႉ ။ ယဝ်ႉၵေႃႈ မိူဝ်ႈၼႆႉၾူၼ်ၵေႃႈတူၵ်း”- ၵူၼ်း ၼမ်ႉ ၶမ်း သိုပ်ႇလၢတ်ႈၼႄၼင်ႇၼႆ။

ထႅင်ႈၾၢႆႇၼိုင်ႈၵေႃႈ ယၢမ်းလဵဝ် ၼႂ်းၸႄႈဝဵင်းၼမ်ႉၶမ်းၼႆႉ ၵူတ်ႇထတ်းထူပ်းႁၼ် ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 တႄႇဢဝ် ဝၼ်းတီႈ 19-28/6/2021 တင်းမူတ်းမီး 39 ၵေႃႉ။ ပဵၼ်ၵူၼ်းတၢင်းပွၵ်ႈၼွင်ၸၢင်ႉ(နောင်စန့်)၊ ၵွင်းၼွင်မူဝ် (ကောင်း နောင်မို)၊ ႁူဝ်ၼွင်(ဟိုနောင်)၊ တႃႇယႃႇၵူင်း (သာယာကုန်း)၊ ပွၵ်ႉတႂ်ႈ (ပေါက်တိုက်)၊ ပွၵ်ႉတႅၼ်ႈမ (ပေါက်တင်မ)၊ ၼွင်ၸၢင်ႉၵူင်း (နောင်စန့်ကုန်း) လႄႈ ႁူဝ်ၼႃး ( ဟိုနား) ၸိူဝ်းၼႆႉ။