ယၢမ်းလဵဝ် ၼႂ်းၸႄႈဝဵင်းသႅၼ်ဝီ ၸိုင်ႈတႆး ပွတ်းႁွင်ႇ ထုၵ်ႇပိၵ်ႉဢိုတ်းဝႆႉ ၵၢတ်ႇလူင် လႄႈ ႁူင်းႁဵၼ်း ယွၼ်ႉတၢင်းပဵၼ် ၶူဝ်ႊဝိတ်ႉ 19 ၽႄႈလၢမ်း ဝႃႈၼႆ။
တႄႇဢဝ် ဝၼ်းတီႈ 27/6/2021 တေႃႇထိုင် 11/7/2021 ၵၢတ်ႇလူင် ၸႄႈဝဵင်းသႅၼ်ဝီ ၸိုင်ႈတႆး ပွတ်းႁွင်ႇ ပိၵ်ႉဢိုတ်း ႁၢမ်ႈ ၵူၼ်းၶဝ်ႈသိုဝ်ႉၶၢႆ ၸၢႆႇၵၢတ်ႇ တႃႇၶၢဝ်းတၢင်း 14 ဝၼ်း ယွၼ်ႉတၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းႁၢဝ်ႈႁႅင်း ၼႆယဝ်ႉ။
ၸၢႆးဢူးၶမ်း ၽူႈတႅၼ်းသၽႃးၵူၼ်းမိူင်း မိူဝ်ႈပီ 2015 – 2020 လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် တီႈသႅၼ်ဝီတႄႉ ႁူင်း ႁဵၼ်း တင်း ၵၢတ်ႇလူင် ပိၵ်ႉဢိုတ်းဝႆႉ ၶႃႈဢေႃႈ။ ယွၼ်ႉတၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းႁၢဝ်ႈႁႅင်းၼႆႉၶႃႈဢေႃႈ။ တီႈ သႅၼ်ဝီႁဝ်းၶႃႈၵေႃႈ ၵူတ်ႇထတ်းႁၼ် ၵူၼ်းတိတ်းၸပ်း ၸိူဝ်ႉမႅင်း ၶူဝ်ႊဝိတ်ႉ 19 မီး 4 ၵေႃႉယဝ်ႉ ဢၼ်ၶႃႈႁဝ်းလႆႈႁပ်ႉႁူႉ”- ဝႃႈၼႆ။
ယၢမ်းလဵဝ် ၼႂ်းၸႄႈဝဵင်းသႅၼ်ဝီ ၸိုင်ႈတႆးပွတ်းႁွင်ႇ ၼႂ်းလိူၼ်ၵျုၼ်ႊၼႆႉၵူၺ်း ၵူတ်ႇထတ်းႁၼ် ၵူၼ်းတိတ်းၸပ်းၸိူဝ်ႉ မႅင်းတၢင်းပဵၼ်ၶူဝ်ႊဝိတ်ႉ 19 တင်းမူတ်း မီး 4 ၵေႃႉ။ ၼႂ်းၼၼ်ႉ တႃႇၵေႃႉၼိုင်ႈ ပဵၼ်ၽူႈႁၢပ်ႇၵၢၼ်လူင်ပွင်ၸိုင်ႈ တႃႇသၢမ် ၵေႃႉၼၼ်ႉတႄႉ ပဵၼ်ၵူၼ်းမိူင်း။
“ ငဝ်းလၢႆး မိူဝ်ႈလဵဝ်ၼႆႉ ၵွပ်ႈတၢင်းပဵၼ်ၵေႃႈႁင်းမၼ်း လွင်ႈၵၢၼ်ဝၢၼ်ႈမိူင်းၵေႃႈ သုၵ်ႉယုင်းယူႇၵေႃႈႁင်းမၼ်း ၵူၼ်း မိူင်းတႄႉ ဢိင်ၼိူဝ် ငဝ်းလၢႆးၸိူဝ်းၼႆႉသေ ဢွၼ်ၵၼ်တုၵ်ႉၶ ၸွမ်းယူႇ။ ၵွပ်ႈၼႆႉလႄႈ ၶႂ်ႈပၼ်ၾၢင်ႉထိုင် ၵူၼ်းမိူင်း ႁဝ်းၶႃႈ ဝႃႈ ႁႂ်ႈမေႃၾၢင်ႉၵိၼ်/ ယူႇၵၼ်”- ၸၢႆးဢူးၶမ်း သိုပ်ႇလၢတ်ႈၼႄၼင်ႇၼႆ။
လိူဝ်ၼၼ်ႉ ၼႂ်းၸႄႈဝဵင်းလႃႈသဵဝ်ႈၵေႃႈ မိူၼ်ၵၼ် ယၢမ်းလဵဝ် ၵူၼ်းတိတ်း ၸပ်း ၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 ၼႆႉ မီးၵႂႃႇ 300 ပၢႆ။ ၵူၼ်းတၢႆမီး 8 ၵေႃႉယဝ်ႉ။ ယွၼ်ႉတၢင်းပဵၼ်ၽႄႈလၢမ်း ႁၢဝ်ႈႁႅင်းသေ ထိုင်တီႈပေႃးလႆႈပိၵ်ႉဢိုတ်းၵၢတ်ႇလူင်ဝႆႉ ၸမ်ဝူင်ႈ။ ၵူၼ်းၸပ်းတၢင်းပဵၼ်ၼႆႉပႃးတင်းလုၵ်ႈဢွၼ်ႇႁူင်းႁဵၼ်းလႄႈ တင်ႈဢဝ်ဝၼ်းတီႈ 28 မႃးႁူင်းႁဵၼ်းၼႂ်းၸႄႈဝဵင်းလႃႈသဵဝ်ႈၵေႃႈ တႄႇပိၵ်ႉဢိုတ်းဝႆႉမူတ်းယဝ်ႉ ။ တေပႂ်ႉတူၺ်းငဝ်းလၢႆး 2 ဝူင်ႈဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ