မိူဝ်ႈၼႆႉ ဝၼ်းတီႈ 28/6/2021 ယၢမ်းၵၢင်ဝၼ်း လုၵ်ႈႁဵၼ်းၸၼ်ႉ 2 တီႈႁူင်းႁဵၼ်းၸၼ်ႉသုင် မၢႆ 2 ၸႄႈဝဵင်းမူႇၸေႊ ၸိုင်ႈ တႆး ပွတ်းႁွင်ႇ ၵူတ်ႇထတ်းထူပ်းႁၼ် တိတ်းၸပ်းၸိူဝ်ႉမႅင်း ၶူဝ်ႊဝိတ်ႉ 19 ၵေႃႉၼိုင်ႈ ၼႆယဝ်ႉ။
ၵူၼ်းပိုၼ်ႉတီႈ မူႇၸေႊ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၼႆႉယၢမ်းၵၢင်ဝၼ်း တီႈႁူင်းႁဵၼ်းၸၼ်ႉသုင် မၢႆ 2 ၵူတ်ႇထတ်းႁၼ် ဢွၼ်ႇၸၢႆး လုၵ်ႈႁဵၼ်း ၸၼ်ႉ 2 ၵေႃႉၼိုင်ႈ ၸပ်းတၢင်းပဵၼ်ၶူဝ်ႊဝိတ်ႉ 19”- ဝႃႈၼႆ။
ယဝ်ႉၵေႃႈ ဢွၼ်ႇၸၢႆး လုၵ်ႈႁဵၼ်းဢၼ်ၶိုၼ်ႈႁဵၼ်းၸွမ်းၵၼ်ထႅင်ႈ 9 ၵေႃႉၼၼ်ႉၵေႃႈ ယၢမ်းလဵဝ် ၵႃးႁူင်းယႃမႃး ႁပ်ႉဢဝ် တူဝ် ၵႂႃႇဝႆႉတီႈႁူင်းယႃ မူႇၸေႊယဝ်ႉ ဝႃႈၼႆ။
ၼႂ်းလိူၼ်ၵျုၼ်ႊၼႆႉၵူၺ်း ၼႂ်းၸႄႈဝဵင်းမူႇၸေႊ ၵူတ်ႇထတ်းၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 တင်းမူတ်း မီး 12 ၵေႃႉယဝ်ႉ ဝႃႈၼႆ။
တီႈၸႄႈဝဵင်းၼမ်ႉၶမ်းၵေႃႈ ၼႂ်းလိူၼ်ၵျုၼ်ႊ တေႃႇထိုင်ဝၼ်းတီႈ 25 ၼႆႉ ၵူၼ်းတိတ်း ၸပ်းၸိူဝ်ႉမႅင်းၶူဝ်ႊဝိတ်ႉ 19 တင်းမူတ်း မီး 19 ၵေႃႉယဝ်ႉ လႆႈႁူႉၼင်ႇၼႆ။
ၽူႈတူင်ႉၼိုင်ၼႂ်းတူင်ႇဝူင်းၵူၼ်း ၸႄႈဝဵင်းၼမ်ႉၶမ်း ၵေႃႉၼိုင်ႈ လၢတ်ႈတီႈၽူႈတွႆႇ ႁွၵ်ႈဝႃႈ – “ယၢမ်းလဵဝ် ၼႂ်းၸႄႈဝဵင်း ၼမ်ႉၶမ်းၼႆႉ ၵူၼ်းတိတ်းၸပ်း ၸိူဝ်ႉမႅင်းတၢင်း ပဵၼ်ၶူဝ်ႊဝိတ်ႉ 19 ၼႆႉ တင်းမူတ်းမီး 19 ၵေႃႉယဝ်ႉ။ ၶေႃႈမုလ်းဢၼ် ၼႆႉတႄႉ ဢမ်ႇၸႂ်ႈတီႈႁူင်းယႃၶဝ်ပိုၼ်ၽၢဝ်ႇဢွၵ်ႇမႃးပဵၼ်တၢင်းၵၢၼ်။ ႁဝ်းၶႃႈ လႆႈႁပ်ႉႁူႉ တီႈၸုမ်း ၸွႆႈထႅမ်တူင်ႇဝူင်း ဢၼ်ၵႂႃႇၸွႆႈၼၼ်ႉ လၢတ်ႈၼႄၵူၺ်း လူႉတၢႆတႄႉ ပႆႇမီး”- ဝႃႈၼႆ။
ၵူၼ်းတိတ်းၸပ်း ၸိူဝ်ႉမႅင်းၶူဝ်ႊဝိတ်ႉ 19 ၼႂ်းၸႄႈဝဵင်းၼမ်ႉၶမ်း တင်းမူတ်း 19 ၵေႃႉၼႆႉ လႆႈသူင်ႇယူတ်းယႃ တူဝ်ဝႆႉတီႈႁူင်းယႃၼမ်ႉၶမ်း ၼႆယဝ်ႉ။
ဝၢႆးသေ ၶွင်ႇသီႇသိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းမႃးၼႆႉသေ တႄႇဢဝ် ၼႂ်းလိူၼ်ၵျုၼ်ႊၼႆႉမႃး ၼႂ်းမိူင်းတႆး လၢႆၸႄႈ ဝဵင်း မီးၵူၼ်းတိတ်းၸပ်းၸိူဝ်ႉမႅင်း တၢင်းပဵၼ်ၶူဝ်ႊဝိတ်ႉ 19 တိူဝ်ႉၼမ်မႃး ၼႆယဝ်ႉ။
