သိုၵ်း TNLA ၵဵပ်းၶွၼ်ႇလၢႆးမႂ်ႇ ၸႅၵ်ႇဝႂ်ႁဵင်းလိၵ်ႈ (Name Card) လႄႈ မၢႆၾူၼ်း ပၼ် ၸဝ်ႈႁၢၼ်ႉၶၢႆၶူဝ်း ၼႂ်းၵၢတ်ႇၼမ်ႉၶမ်း ၸီႉသင်ႇႁႂ်ႈဢွၼ်ၵၼ်ၵႂႃႇသႂ်ႇၶွၼ်ႇပၼ် ၶဝ် ဝႃႈၼႆ။

မိူဝ်ႈဝႃး ဝၼ်းတီႈ 24/6/2021 ယၢမ်းၵၢင်ၼႂ် သိုၵ်းတဢၢင်း TNLA ၼုင်ႈၶူဝ်းၵူၼ်းမိူင်းသေ ဢဝ်ဝႂ်ႁဵင်းလိၵ်ႈလႄႈ မၢႆၾူၼ်း  ၸႅၵ်ႇပၼ်ၸွမ်းႁၢၼ်ႉၶၢႆၶူဝ်း ၼႂ်းၵၢတ်ႇလႄႈ ၸွမ်းႁိမ်းႁွမ်းၵၢတ်ႇ ၼႂ်းၸႄႈဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈ တႆးပွတ်းႁွင်ႇ ႁႂ်ႈဢွၼ်ၵၼ်ၵႂႃႇသႂၢင်းၶွၼ်ႇပၼ်ၶဝ် ၸွမ်းၼင်ႇပၼ်ဝႆႉ ႁဵင်းလိၵ်ႈၼၼ်ႉ ၼႆယဝ်ႉ။

ၵူၼ်းၼမ်ႉၶမ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းသိုၵ်းၶဝ် မႃးပၼ် ႁဵင်းလိၵ်ႈၶဝ်သေ ယဝ်ႉၵေႃႈ မၢႆၾူၼ်း။ ႁႂ်ႈၵပ်းၸူးမၢႆၾူၼ်းဢၼ်ၶဝ်ပၼ်ဝႆႉၼၼ်ႉသေ ႁႂ်ႈၵႂႃႇသႂၢင်းၶွၼ်ႇပၼ်ၶဝ်။ ယၢမ်းလဵဝ် ၶဝ်ၵဵပ်းၶွၼ်ႇၶိုၼ်ႈမႃးႁၢဝ်ႈႁႅင်း ၵဵပ်း ၼမ်လိူဝ်သေ မိူဝ်ႈပူၼ်ႉမႃး 2-3 ပီၼၼ်ႉ။ တေႃႈလဵဝ် ၶဝ်ၵဵပ်းၸွမ်းႁၢၼ်ႉၶၢႆၶူဝ်း/ ႁၢၼ်ႉၵုၼ်ႇ ၸိူဝ်းၼႆႉ။ မိူဝ်ႈဝူင်ႈပူၼ်ႉမႃး ၼၼ်ႉ ၶဝ်ၶဝ်ႈၵဵပ်းၽႅဝ်ၼႂ်းၵၢတ်ႇၵွၼ်ႇ” –  ဝႃႈၼႆ။

ယၢမ်းလဵဝ် ၼႂ်းၸႄႈဝဵင်းၼမ်ႉၶမ်းၼႆႉ ဢမ်ႇလိူၵ်ႈႁၢၼ်ႉၶၢႆၶူဝ်း  သိုၵ်း TNLA ၶဝ်ႈၵဵပ်းၵူႈႁၢၼ်ႉ ။  ၼွၵ်ႈလိူဝ်ၼၼ်ႉ ၵဵပ်း ပႃးထႅင်ႈ ၶွၼ်ႇႁိူၼ်းယေး ၵူၼ်းၸိူဝ်းတေသၢင်ႈႁိူၼ်းမႂ်ႇ ၸိူဝ်းၼႆႉ ထႅင်ႈလူးၵွၼ်ႇ ၵူၼ်းၼမ်ႉၶမ်းလၢတ်ႈၼင်ႇၼႆ။  

“တိုၵ်ႉတေၵေႃႇသၢင်ႈႁိူၼ်းယေး ၽွင်းတိုၵ်ႉႁၢင်ႈႁႅၼ်းၵူၺ်း သိုၵ်းလွႆၶဝ် ပေႃးၶဝ်ႈမႃးၵဵပ်းၶွၼ်ႇ ၵမ်းလဵဝ်ယဝ်ႉ။ ၼႂ်းၸႄႈဝဵင်းၼမ်ႉၶမ်းၼႆႉ”- ၵူၼ်းပိုၼ်ႉတီႈၼမ်ႉၶမ်း သိုပ်ႇလၢတ်ႈၼႄထႅင်ႈၼင်ႇၼႆ။

ဢိင်ၼိူဝ် လွင်ႈၼႆႉသေ  ၸဝ်ႈႁၢၼ် မၢႆးဢၢႆႈၵျေႃႇ ၽူႈၶၢၼ်ပၢၵ်ႇ TNLA လၢတ်ႈတီႈၽူႈတွႆႇႁွၵ်ႈဝႃႈ – “လွင်ႈၵဵပ်းၶွၼ်ႇၼႆႉ ယူႇတီႈႁွင်ႈၵၢၼ်ၾၢႆႇၵဵပ်းၶွၼ်ႇႁဝ်းၶႃႈသေ ၵဵပ်းတႄႉ မီးဢေႃႈ။ ယၢမ်းလဵဝ် ဢၼ်ၵဵပ်းၶွၼ်ႇယူႇၼႆႉ မီး ဢမ်ႇမီးဢၼ် ဝႃႈၼၼ်ႉ ၶႃႈႁဝ်းၵေႃႈ ပႆႇလႆႈႁူႉႁူဝ်ယွႆႈမၼ်းလီ။ ၵူၺ်းၵႃႈ ဢၼ်ၶဝ်ၵဵပ်းယူႇတႃႇသေႇ ၸိူဝ်းၼၼ်ႉတႄႉ မီးယူႇ”- ဝႃႈၼႆ။

မိူၼ်ၼၼ် ၼင်ႇၵဝ်ႇ မိူဝ်ႈပူၼ်ႉမႃးဝၼ်းတီႈ 15/6/2021 ၼၼ်ႉၵေႃႈ ၼၢင်းယိင်း ၵူၼ်းမိူင်းၼမ်ႉၶမ်းၵေႃႉၼိုင်ႈ   ဢမ်ႇသႂ်ႇ ၶွၼ်ႇဢၼ်သိုၵ်း TNLA ၶဝ်ယွၼ်းၼၼ်ႉလႄႈၼႆသေ မီးသိုၵ်း TNLA   7-8 ၵေႃႉ ၶဝ်ႈတီႉၺွပ်းဢဝ်တူဝ် ထိုင်ၼႂ်းႁိူၼ်းယေး ယၢမ်း ၵၢင်ၶမ်ႈ။  ၽွင်း SSPP ၶဝ်ႈၵႄႈၸွႆႈလၢတ်ႈသေပွႆႇပွၵ်ႈႁိူၼ်းၶိုၼ်းၼၼ်ႉ သိုၵ်း TNLA ၼႄလွင်ႈတၢင်းဝႃႈ တီႉၺွပ်းၵူၼ်းၽိတ်း ဝႃႈၼႆ။