ၼႂ်းၸႄႈဝဵင်းသီႇပေႃႉ ၸိုင်ႈတႆး ပွတ်းႁွင်ႇ ၵူၼ်းတိတ်းၸပ်း ၸိူဝ်ႉမႅင်း ၶူဝ်ႊဝိတ်ႉ 19 ပုင်ႈၶိုၼ်ႈဝႆး ၼႂ်းၶၢဝ်းတၢင်း လိူၼ်ပၢႆၼႆႉ မီးထိုင် 13 ၵေႃႉ ၵႂႃႇတၢႆတီႈ ႁူင်းယႃ လႃႈသဵဝ်ႈၵေႃႉၼိုင်ႈ လႆႈႁူႉၼင်ႇၼႆ။
မိူဝ်ႈၼႆႉ ဝၼ်းတီႈ 25/6/2021 ယၢမ်းၵၢင်ၼႂ် ၵူတ်ႇထတ်းႁၼ် ၵူၼ်းတိတ်းၸပ်းၶူဝ်ႊဝိတ်ႉ 19 ထႅင်ႈ ၵေႃႉၼိုင်ႈ ၼႂ်း ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ယၢမ်းလဵဝ် သူင်ႇ ယူတ်းယႃတူဝ်ဝႆႉတီႈႁူင်းယႃ ယဝ်ႉဝႃႈၼႆ။
ၽူႈၸွႆႈထႅမ် ၸုမ်းပရႁိတ သီႇပေႃႉ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈ ဢေႃႈ ၼႂ်းၶၢဝ်းတၢင်း လိူၼ်သွင်လိူၼ် မႃးၼႆႉ ၼႂ်းၸႄႈဝဵင်းသီႇပေႃႉႁဝ်းၶႃႈ ၵူတ်ႇ ထတ်းၵူၼ်းတိတ်ႉၸပ်းၸိူဝ်ႉမႅင်းၶူဝ်ႊဝိတ်ႉ 19 ၼႆႉ မီးၵႂႃႇယဝ်ႉ 13 ၵေႃႉ။ ၼႂ်း 13 ၵေႃႉၼၼ်ႉ လူႉတၢႆၵႂႃႇယဝ်ႉ ၵေႃႉၼိုင်ႈ ”- ဝႃႈၼႆ။
ၼႂ်းၵူၼ်းပဵၼ်တိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 ၸႄႈဝဵင်းသီႇပေႃႉ တင်းမူတ်း 13 ၵေႃႉၼႆႉ။ ၼႂ်းၼၼ်ႉ ယူတ်းယႃႁၢႆၶႅၼ်း လူင်းႁူင်းယႃယဝ်ႉ 2 ၵေႃႉ၊ လူႉတၢႆ 1 ၵေႃႉ လႄႈ ယၢမ်းလဵဝ် တိုၵ်ႉသိုပ်ႇယူတ်းယႃတူဝ်ဝႆႉယူႇ တင်းမူတ်း 10 ၵေႃႉ ၼႆယဝ်ႉ။
ၵူၼ်းပဵၼ်ၶူဝ်ႊဝိတ်ႉ ၵူၼ်းသီႇပေႃႉၼႆႉ ၵႂႃႇတၢႆတီႈႁူင်းယႃလႃႈသဵဝ်ႈ မိူဝ်ႈဝၼ်းတီႈ 15/6/2021 ၼၼ်ႉ ၵေႃႉၼိုင်ႈလႆႈႁူႉၼင်ႇၼႆ။
တၢင်းပဵၼ်ၶူဝ်ႊဝိတ်ႉ 19 ၼႆႉ တင်ႈတႄႇလၢမ်းၽႄႈၶဝ်ႈမႃးၼႂ်းမိူင်းႁူမ်ႈတုမ် မိူဝ်ႈပီဢွၼ် 2020 တေႃႇထိုင် လိူၼ်မေႊ 2021 ၼႆႉ ဢမ်ႇၽႄႈလၢမ်းထိုင်ဝဵင်းလႃႈသဵဝ်ႈႁၢဝ်ႈႁႅင်းပဵင်းၵမ်းၼႆႉသေၵမ်း။ ဝၢႆးလင် ၾၢႆႇပၢႆးယူႇလီ ဢွၼ်ၵၼ်ႁဵတ်း CDM ဢမ်ႇမီးၵူၼ်းပႂ်ႉၵူတ်ႇထတ်းပၼ်လီလီ ၊ ဢမ်ႇမီးၽႅၼ်ၵၢၼ် ၵႅတ်ႇၶႄႁႄႉၵင်ႈလီလီလႄႈ တင်ႈဢဝ်ဝၼ်းတီႈ 1 လိူၼ် ၵျုၼ်ႊၼႆႉမႃး ၶၢဝ်းတၢင်း 20 ဝၼ်းပၢႆမီးၵူၼ်းတိတ်းၸပ်းၶူဝ်းဝိတ်ႉ 250 ပၢႆ။တၢႆယွၼ်ႉတၢင်းပဵၼ်မီး 5 ၵေႃႉယဝ်ႉ။
