ၸုမ်းသိုၵ်း ၼႂ်းမိူင်းတႆး ၼင်ႇၵၼ် ႁိမ်တီႈယူႇၵၼ် တိုၵ်းၵၼ် တေႃးၵၼ်လႄႈ ၵူၼ်းမိူင်း 300 ပၢႆ ၸိူဝ်းၺႃး ၸၢၵ်ႇသိုၵ်း ၸိူဝ်းၼၼ်ႉ ႁူပ်ႉတၢင်းယၢပ်ႇ တႃႇႁဵတ်းၵၢၼ် ႁႃၵိၼ်လဵင်ႉတွင်ႉ ဝႃႈၼႆ။

ၸုမ်းသိုၵ်း ၼႂ်းမိူင်းတႆး ၼင်ႇၵၼ် ႁိမ်တီႈယူႇၵၼ် တိုၵ်းၵၼ် တေႃးၵၼ်လႄႈ ၵူၼ်းမိူင်း ၼႂ်းၸႄႈဝဵင်းသီႇပေႃႉ ၵူၼ်းဝၢၼ်ႈသူၼ်လူင်၊ ဝၢၼ်ႈၶျွင်းသုင်ႇ လႄႈ ဝၢၼ်ႈႁၢတ်ႇလႅၼ်ႈ ၼႂ်းဢိူင်ႇသူၼ် လူင် ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉ မႄး ၸိုင်ႈတႆးပွတ်းႁွင်ႇ လင်ႁိူၼ်း 100 ပၢႆ ႁူဝ်ၵူၼ်း မွၵ်ႈ 300 ပၢႆ ထူပ်းလွင်ႈယၢပ်ႇ တႃႇႁဵတ်းၵၢၼ်ႁႃၵိၼ်လဵင်ႉ ။

ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈသီႇပေႃႉ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် ပီႈၼွင်ႉ ႁဝ်းၶႃႈ 3 ဝၢၼ်ႈ ၼႆႉ ယူႇၸွမ်းသၢပ်ႇၼမ်ႉတူႈဝႆႉ ဢမ်ႇၸၢင်ႈၵႂႃႇ ႁဵတ်းႁႆႈ/ သူၼ်ၵၼ် ယဝ်ႉၵေႃႈ ဢမ်ႇ ၸၢင်ႈ ၵႂႃႇတဝ်ထိူၼ်ႈႁႃၽၵ်း ႁႃၼေႃႇ၊ ႁဵပ်း ၸိူဝ်းၼႆႉ မႃးၶၢႆ ယွၼ်ႉသိုၵ်းၼႆႉ တူင်ႉၼိုင် ၶဵင်ႈၶႅင်ၵၼ်ယူႇ ၸွမ်းႁိမ်းႁွမ်း ၸိူဝ်းၼၼ်ႉလႄႈ ထႅင်ႈၾၢႆႇၼိုင်ႈၵေႃႈ ပီႈ ၼွင်ႉႁဝ်းၶႃႈ 3 ဝၢၼ်ႈၼၼ်ႉ ၵမ်ႈၼမ် ဢမ်ႇမီး ၼႃးၵၼ် ႁဵတ်းၵိၼ်သူၼ်/ ႁႆႈၸိူဝ်းၼႆႉၵူၺ်း။ မိူဝ်ႈလဵဝ် ဢမ်ႇၸၢင်ႈႁဵတ်း ၵၢၼ်သင် ငိုၼ်းၶဝ်ႈၵေႃႈဢမ်ႇမီး ၵၢၼ်ႁႃၵိၼ်ၵေႃႈယၢပ်ႇ ဢွၼ်ၵၼ်ထူပ်းတၢင်း ယၢပ်ႇၽိုတ်ႇ ၵိၼ်းၸႂ် တႄႉၶႃႈဢေႃႈ”- ဝႃႈၼႆ။

ၵူၼ်းဝၢၼ်ႈ 3 ဝၢၼ်ႈ ဢၼ်ထူပ်းတၢင်းယၢပ်ႇၽိုတ်ႇၵၢၼ်ႁႃၵိၼ်လဵင်ႉတွင်ႉၼၼ်ႉ ဝၢၼ်ႈသူၼ်လူင် လင်ႁိူၼ်း 70 ပၢႆ။ ဝၢၼ်ႈႁၢတ်ႇလႅၼ်ႈ တင်း ၶျွင်းသုင်ႇ ႁူမ်ႈၵၼ်ၵေႃႈလင်ႁိူၼ်း မွၵ်ႈ 70 ပၢႆ။

ၵူၼ်းပၢႆႈၽေးသိုၵ်း တီႈၼမ်ႉလၼ်ႈၵေႃႈ တိုၵ်ႉၵိုတ်းထႅင်ႈယူႇ ပႆႇ လႆႈပွၵ်ႈႁိူၼ်းယေးၵၼ် မိူၼ်ၼင်ႇ ဝတ်ႉမၢၼ်ႈလီႈ၊ ဝၢၼ်ႈၸိင်းလႄႈ ဝတ်ႉမၢၼ်ႈ ၵွင်း ၸိူဝ်းၼႆႉ။

“ယၢမ်းလဵဝ် ႁဝ်းၶႃႈ ႁၢင်ႈႁႅၼ်းဝႆႉ လွင်ႈတေမိူဝ်းၸွႆႈပီႈၼွင်ႉႁဝ်းၶႃႈ တၢင်းၼမ်ႉ လၼ်ႈထႅင်ႈ မိူၼ်ၼင်ႇ ၼမ်ႉမၼ်း ၵိူဝ် ၽွင်ဝၢၼ် ၼမ်ႉယႃႈသၵ်ႉသိူဝ်ႈၶူဝ်း ၸိူဝ်းၼႆႉ။ ယဝ်ႉၵေႃႈ ၵူၼ်းဝၢၼ်ႈႁဝ်းၶႃႈ တၢင်းသူၼ်လူင်၊ ၶျွင်းသူင်ႇလႄႈ ႁၢတ်ႇ လႅၼ်ႈၼၼ်ႉတႄႉ ႁဝ်းၶႃႈ ပႂ်ႉၽူႈမီးၼမ်ႉၸႂ်ၸေႇတၼႃႇၶဝ် ၵမ်ႉၸွႆႈမႃးထႅင်ႈ ၵွၼ်ႇၶႃႈ ၸင်ႇတေၸၢင်ႈမိူဝ်းၸွႆႈ”- ၽူႈၸွႆႈ ထႅမ် ၵူၼ်းပၢႆႈၽေးသိုၵ်း သိုပ်ႇလၢတ်ႈ ၼႄၼင်ႇၼႆ။

သိုၵ်းၼႂ်းမိူင်းတႆး ၼင်ႇၵၼ်ယိုဝ်းၵၼ်လႄႈ ၵူၼ်းပၢႆႈၽေးသိုၵ်း တီႈဝတ်ႉမၢၼ်ႈလီႈႁူဝ်ၵူၼ်း 200 ပၢႆ ၊ ပဵၼ်ၵူၼ်း ဝၢၼ်ႈၶၢႆးမွၼ်။ တီႈဝတ်ႉဝၢၼ်ႈၸိင်းသမ်ႉ ပဵၼ်ၵူၼ်းဝၢၼ်ႈၵုင်းၼိဝ်ႉ၊ ၵုင်းယူမ်း၊ ပၢင်ႇသိမ်ႇလႄႈ ဝၢၼ်ႈတၢပ်ႈ။ တီႈ ဝတ်ႉမၢၼ်ႈၵွင်းသမ်ႉ ပဵၼ်ပီႈၼွင်ႉတႃႈတေႈ လင်ႁိူၼ်း 65 လင် ၸဵမ်ၸိူဝ်းၼႆႉ။