တႆးႁွတ်ႈမိူင်းထႆး ဢွၼ်ၵၼ် ပိုတ်ႇပၢင်သွၼ်လိၵ်ႈတႆး ၶၢဝ်းမႆႈ ၽွင်းပိၵ်ႉဢိုတ်းႁူင်းႁဵၼ်းလူင်ပွင်ၸိုင်ႈထႆး ၼင်ႇႁိုဝ် လုၵ်ႈဢွၼ်ႇတႆး ပေႃးတေၾိုၵ်းလၢတ်ႈၶိုၼ်းၵႂၢမ်းတႆးလႄႈ ႁူႉလိၵ်ႈလၢႆးၾိင်ႈငႄႈ ၸဝ်ႈၵဝ်ႇၶိုၼ်း ဝႃႈၼႆ။
တႄႇဢဝ် 11/03/2024 ၼၼ်ႉမႃး ယူႇတီႈ တႆးႁွတ်ႈမိူင်းထႆး (ႁႅင်းၵၢၼ်တႆး) တီႈမူႇဝၢၼ်ႈသီဝူဝ်ငိုၼ်း ႁူမ်ႈၵၼ် ပိုတ်ႇပၢင်သွၼ်လိၵ်ႈတႆး တီႈဝတ်ႉသီဝူဝ်ငိုၼ်း ဢိူင်ႇထသႃလႃး ၸႄႈဝဵင်းၵဵင်းမႂ်ႇ ၸိုင်ႈထႆး ပွၵ်ႈၵမ်း ႁႅၵ်ႈ မီးလုၵ်ႈဢွၼ်ႇတႆး ၶိုၼ်ႈႁဵၼ်း မွၵ်ႈ 40 ၵေႃႉ ဝႃႈၼႆ။
မေႃသွၼ် ၼၢင်းႁွမ် ၵေႃႉဢွၼ်ၸတ်းပၢင်သွၼ်လိၵ်ႈတႆး တီႈဝတ်ႉသီဝူဝ်ငိုၼ်း လၢတ်ႈတီႈၽူႈတွႆႇႁွၵ်ႈဝႃႈ – “ၶႂ်ႈႁႂ်ႈလုၵ်ႈဢွၼ်ႇတႆးႁဝ်း မေႃလိၵ်ႈတႆးၵႂၢမ်းတႆးႁဝ်းၶိုၼ်း ပေႃးဝႃႈ ႁဝ်းဢမ်ႇသွၼ်ဝႆႉ တေသိုပ်ႇၵႂႃႇ တၢင်းၼႃႈၼၼ်ႉ ၵူဝ်ၶဝ်ဢမ်ႇႁူႉလိၵ်ႈတႆးၵႂၢမ်းတႆးႁဝ်းယဝ်ႉ ၵူဝ်ၶဝ်လိုမ်းၽႃသႃ ၸိူဝ်ႉၶိူဝ်း လိၵ်ႈတႆး ၵႂၢမ်းတႆး ႁဝ်းၶႃႈဢေႃႈ”- ဝႃႈၼႆ။
သိုပ်ႇလၢတ်ႈဝႃႈ – “ထႅင်ႈလွင်ႈၼိုင်ႈၵေႃႈ ၽွင်းၶၢဝ်းဢိုတ်းႁူင်းႁဵၼ်းထႆး ၶၢဝ်းမႆႈၼႆႉ ဢမ်ႇၶႂ်ႈႁႂ်ႈလုၵ်ႈဢွၼ်ႇ ႁဝ်း ယူႇလၢႆ လဵၼ်ႈၵဵမ်း တူၺ်းၾူၼ်း ၸိူင်ႉၼႆပႃးၶႃႈဢေႃႈ ၵွပ်ႈၼႆလႄႈ ၸင်ႇလႆႈပိုတ်ႇပၢင်သွၼ်လိၵ်ႈတႆး ၼႆႉမႃး”- ဝႃႈၼႆ။
ပၢင်သွၼ်လိၵ်ႈတႆး ၶၢဝ်းမႆႈ ဢၼ်လႆႈပိုတ်ႇၵႂႃႇ တီႈဝတ်ႉသီဝူဝ်ငိုၼ်းၼႆႉ တေပိုတ်ႇပူင်သွၼ် ၼႂ်းဝၼ်းသဝ်တင်း ဝၼ်းတိတ်း ၶၢဝ်းယၢမ်းၵၢင်ၼႂ် 8 မူင်း ထိုင် 3 မူင်းဝၢႆးဝၼ်း တႄႇဢဝ် လုၵ်ႈဢွၼ်ႇ ဢႃယု 7 ၶူပ်ႇထိုင် 34 ပီ ယၢမ်းလဵဝ် မီးဝႆႉ လုၵ်ႈႁဵၼ်းတင်းမူတ်း 37 ၵေႃႉ ဝႃႈၼႆ။
“ၸူးၸႂ်တႄႉ ႁဝ်းၶႃႈ ၶႂ်ႈပိုတ်ႇပၢင်သွၼ်လိၵ်ႈတႆး ၵူႈဝၼ်းၶႃႈဢေႃႈ ၵူၺ်းၵႃႈ ၵၢၼ်ႁႃၵိၼ်လဵင်ႉတွင်ႉ ႁဝ်းၶႃႈသေ ယွၼ်ႉလႆႈယိုတ်းၵၢၼ်ၼႂ်းဝၼ်းသဝ် – ဝၼ်းတိတ်း ဝၼ်းတၼ်းၸိူင်ႉၼႆသေ မႃးပူင်သွၼ်ပၼ်ၵႂႃႇ ၶႃႈဢေႃႈ”- မေႃသွၼ် ၼၢင်းႁွမ် သိုပ်ႇလၢတ်ႈၼႄၼင်ႇၼႆ။
လိူဝ်ၼၼ်ႉ မိူဝ်ႈဝၼ်းတီႈ 22/04/2024 တီႈမူႇဝၢၼ်ႈသီႇရိမင်ႇၵလႃႇတႆး မၼ်ႈၵိုမ်း ဢိူင်ႇမိူင်းၵႅဝ်ႈ ၸႄႈဝဵင်းမႄႈရိမ်း ၸႄႈတွၼ်ႈၵဵင်းမႂ်ႇ ၼၼ်ႉၵေႃႈ တႄႇပိုတ်ႇပၢင်သွၼ်လိၵ်ႈၶၢဝ်းမႆႈမႃး ပဵၼ်ပွၵ်ႈႁႅၵ်ႈ မီးလုၵ်ႈႁဵၼ်းတႆး ၶိုၼ်ႈႁဵၼ်း 24 ၵေႃႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ