သိုၵ်းမၢၼ်ႈ ယိုတ်းမိူင်းမႃးၶၢဝ်းတၢင်း 4 လိူၼ်ပၢႆ  ဝၢၼ်ႈမိူင်းပႆႇ ၼိမ်ယဵၼ် ၊   ၶူဝ်ႊဝိတ်ႉ 19 ၵေႃႈ ၽႄႈလၢမ်းႁၢဝ်ႈႁႅင်းမႃးႁွပ်ႈသၢမ် ၵူၼ်းတိတ်းၸပ်းတၢင်းပဵၼ်တီႈလႃႈသဵဝ်ႈ ၸိုင်ႈတႆးပွတ်းႁွင်ႇ မီး 100 ပၢႆ  တုမ်ႉတိူဝ်ႉၵၢၼ်ႁႃၵိၼ်လဵင်ႉတွင်ႉ ၵူၼ်းမိူင်းပွတ်းလႃႈသဵဝ်ႈ လိူဝ်ႁႅင်း။

 တၢင်းပဵၼ်ၶူဝ်ႊဝိတ်ႉ 19   ၽႄႈလၢမ်းမႃးႁွပ်ႈသၢမ်ၼႆႉ ၽႄႈလၢမ်းၼႂ်းဝဵင်းလႃႈသဵဝ်ႈ ၶႂ်ႈဝႃႈၵူႈပွၵ်ႉယွမ်ႇ ၵူၼ်းတိတ်းၸပ်းတၢင်းပဵၼ် မီးထိုင် 152 ၵေႃႉယဝ်ႉလႄႈ ၵူၼ်းမိူင်းၶၢင်းဝႃႈ တုမ်ႉတိူဝ်ႉ ၵၢၼ် ႁႃၵိၼ်လဵင်ႉတွင်ႉ၊ ၵၢၼ်ပၢႆးမၢၵ်ႈမီး၊ ၵၢၼ်ၵႃႉၶၢႆ ၸိူဝ်းၼႆႉ  ။

ၵူၼ်းႁဵတ်းသူၼ်ၽၵ်း ၼႂ်းၸႄႈဝဵင်းလႃႈသဵဝ်ႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ယၢပ်ႇၽိုတ်ႇလိူဝ်ႁႅင်းဢေႃႈ ဢမ်ႇမီး တၢင်းၶၢႆသင် မိူဝ်ႈလဵဝ် ဢမ်ႇၸၢင်ႈၶၢႆတေႃႇၽႂ်ယဝ်ႉ။ သမ်ႉလူဝ်ႇၵိၼ်ယူႇၵူႈဝၼ်း။ မိူဝ်ႈပိူၼ်ႈတႄႇပိၵ်ႉၵၢတ်ႇၼၼ်ႉ ႁဝ်းၶႃႈ ဢဝ် ၽၵ်းၵီးမႃးၶၢႆ တိုၵ်ႉလႆႈ ၼိုင်ႈမတ်ႉ 200 ပျႃးယူႇ။ မိူဝ်ႈလဵဝ်ၼႆႉ 80 ပျႃးၵေႃႈ ဢမ်ႇမီးၵူၼ်းမႃးသိုဝ်ႉ ၶၢႆဢမ်ႇလႆႈ။ ၵမ်း ၼႆႉ ဢၼ်ႁဝ်းသိုဝ်ႉၵိၼ်သမ်ႉၵႃႈ မိူၼ်ၼင်ႇ ၶႆႇၵႆႇ ၽၵ်းမီႇ မၢၵ်ႇၶိူဝ်သူမ် ဢႃႇလူး ၸိူဝ်းၼႆႉ ၶိုၼ်ႈၸွမ်းၵၼ်မူတ်း။ ဢၼ် ႁဝ်းၶႃႈ ႁဵတ်းဢွၵ်ႇၼႂ်းသူၼ်ၼႆႉသမ်ႉပေႃး ဢၼ်ပိူၼ်ႈတၢင်ႇမႃးၶၢႆမိူင်းႁဝ်းသမ်ႉၵႃႈ ႁဵတ်းၼႆၶႃႈဢေႃႈ”- ဝႃႈၼႆ။

 ယၢမ်းလဵဝ် ၾၢႆႇလိူမ်ႈလႆႇၸႄႈဝဵင်း ပိုၼ်ၽၢဝ်ႇဝႆႉဝႃႈ ပိၵ်ႉၵၢတ်ႇၽၵ်းၶဵဝ်ဝႆႉၸူဝ်ႈၶၢဝ်းၼႆလႄႈ   တုမ်ႉတိူဝ်ႉ ၵူၼ်းႁဵတ်းၵၢၼ်ၽုၵ်ႇသွမ်ႈၵူၺ်းဢမ်ႇၵႃး ၵူၼ်းၸိူဝ်းႁဵတ်းၵိၼ်ၵၢၼ်ၸွမ်းဝၼ်း ၸိူဝ်းၼႆႉၵေႃႈ ထူပ်းတၢင်းယၢပ်ႇၽိုတ်ႇ လိူဝ်ႁႅင်း မိူၼ်ၵၼ်။

ၵူၼ်းႁဵတ်းၵိၼ်ၵၢၼ်ႁႃလဵင်ႉတွင်ႉ ၸွမ်းဝၼ်း တီႈလႃႈသဵဝ်ႈ ၵေႃႉၼိုင်ႈ လၢတ်ႈတီႈ ၽူႈတွႆႇႁွၵ်ႈဝႃႈ – “ယၢပ်ႇၽိုတ်ႇၶႃႈ ဢေႃႈ။ ၵၢတ်ႇၵေႃႈပိၵ်ႉ၊ယေးငိုၼ်းၵေႃႈပိၵ်ႉ။ ၵႃႈၶၼ်ၶွင်ၵိၼ်ယႅမ်ႉၵေႃႈၶိုၼ်ႈ။ မိူၼ်ၼင်ႇ ၼမ်ႉၸဵမ်းၼမ်ႉဝၢၼ်   ၼိုင်ႈဢႅပ်ႇ ၶိုၼ်ႈထိုင် 700 ပျႃး။ မိူဝ်ႈၵူႈပွၵ်ႈ 400 -500 ပျႃးၵူၺ်း။ ၵူႈပွၵ်ႈၼမ်ႉမၼ်းၵိၼ် ၼိုင်ႈပုင်း 28,000 ပျႃး။ ယၢမ်းလဵဝ် ၶိုၼ်ႈထိုင် 40,000 ပၢႆယဝ်ႉ။ မၼ်းၶိုၼ်ႈႁႅင်းၼႃႇ ၶိုၼ်ႈၵူႈမဵဝ်း ငိုၼ်းၼိုင်ႈသႅၼ်ၼႆႉ ၸၢႆႇၵမ်ႉၵူၺ်းၶႃႈဢေႃႈ ဢမ်ႇတၼ်းႁူႉသင်”- ဝႃႈၼႆ။

ၽွင်းသိုၵ်းမၢၼ်ႈယိုတ်းမိူင်းမႃးၼႆ့ ၵူၼ်းဝၢၼ်ႈၵူၼ်းမိူင်းယၢပ်ႇၽိုတ်ႇလိူဝ်ႁႅင်းမႃးၵူႈမိုဝ့်ၵူႈဝၼ်း။ ၾၢႆႇၼိုင်ႈသိုၵ်း မၢၼ်ႈ သမ်ႉသင်ႇပိၵ်ႉ ႁၢမ်ႈဢဝ်ၶူဝ်းၵုၼ်ႇၼွၵ်ႈမိူင်း သူင်ႇၶဝ်ႈမိူင်းႁူမ်ႈတုမ် ၸွမ်းသဵၼ်ႈတၢင်းလႅၼ်လိၼ်လႄႈ ၶၼ်ၶူဝ်းၵုၼ်ႇ ပုင်ႈၶိုၼ်ႈၵူႈၸိူဝ်း ဝႃႈၼႆ။