သိုၵ်း KIA ၸႂ်ႉၸုမ်းပျီႇတူႉၸိတ်ႉ မၢၼ်ႈပၢင်ႇၶၢႆႉဢွၵ်ႇ မိူင်းယေႃ ၸႄႈဝဵင်းလႃႈသဵဝ်ႈ ၵူၼ်းမိူင်းပိုၼ်ႉတီႈ မႆႈၸႂ် ၵူဝ်ပဵၼ် ပၢင်တိုၵ်း ဝႃႈၼႆ။
Photo by – Google/ တပ်ႉသိုၵ်း KIA
မိူဝ်ႈဝႃး ဝၼ်းတီႈ 20/6/2021 သိုၵ်းၶၢင် KIA ၸႂ်ႉၸုမ်းပျီႇတူႉၸိတ်ႉ မၢၼ်ႈပၢင်ႇ ဢၼ်ပၵ်းတပ်ႉဝႆႉ တီႈတၢင်းၶဝ်ႈ ဢွၵ်ႇ မိူင်းယေႃ ၸႄႈဝဵင်းလႃႈသဵဝ်ႈ ၊ ၼႂ်းၶၢဝ်းတၢင်း 2 ဝၼ်း ႁႂ်ႈၶၢႆႉယဝ်ႉ ဝႃႈၼႆသေတႃႉ တၢင်းၾၢႆႇၸုမ်းပျီႇတူႉၸိတ်ႉ မၢၼ်ႈပၢင်ႇ ဢမ်ႇယွမ်းၶၢႆႉ ၵူၼ်းမိူင်း ပိုၼ်ႉတီႈ မႆႈၸႂ် ၵူဝ်သွင်ၾၢႆႇပဵၼ်ပၢင်တိုၵ်း ၼႆ ယဝ်ႉ။
ၵူၼ်းမိူင်းယေႃ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ တပ်ႉပျီႇတူႉၸိတ်ႉမၢၼ်ႈပၢင်ႇၼႆႉၶဝ်ပၵ်းဝႆႉ တီႈတၢင်း ၶဝ်ႈ မိူင်းယေႃ ။ မိူဝ်ႈဢွၼ်တၢင်း တီႈၼၼ်ႈ ပဵၼ်ဢွင်ႈတီႈ တပ်ႉသိုၵ်းမၢၼ်ႈမႃးပၵ်းယူႇဝႆႉ။ ဝၢႆးသိုၵ်းမၢၼ်ႈ ထွၼ်ၶၢႆႉ ဢွၵ်ႇၵႂႃႇတီႈၼၼ်ႈယဝ်ႉ ၸုမ်းပျီႇတူႉၸိတ်ႉမၢၼ်ႈပၢင်ႇ ၶိုၼ်းမႃး ပုတ်ႈတႅၼ်းတၢင်ဢဝ်မႃး မီးၶၢဝ်းတၢင်း 10 ပီပၢႆယဝ်ႉ ။ ၵွပ်ႈၼႆတီႈၼႆႈ ၸုမ်းၼိုင်ႈၸႂ်ႉၶၢႆႉ ၸုမ်းၼိုင်ႈဢမ်ႇယွမ်းၶၢႆႉ ၼႆတႄႉ ပဵၼ်ဢၼ်လီမႆႈၸႂ်ၵူဝ်မီးၽေးသိုၵ်းသိူဝ်ၶႃႈဢေႃႈ ” – ဝႃႈၼႆ။
ၾၢႆႇၼိုင်ႈ ယၢမ်းလဵဝ် တၢင်းၾၢႆႇဢွၵ်ႇဝဵင်းလႃႈသဵဝ်ႈ တၢင်းပွတ်းထုင်ႉမိူင်းယေႃ ၸိူဝ်းၼႆႉ ပဵၼ်ၸုမ်းဢူၺ်းလီ ပွတ်းႁွင်ႇ မိူၼ်ၼင်ႇ သိုၵ်းၵူဝ်းၵၢင်ႉ MNDAA၊ သိုၵ်းလွႆ TNLA လႄႈ သိုၵ်းၶၢင် KIA ၸိူဝ်းၼႆႉ တူင်ႉၼိုင်ၵႂႃႇမႃး ႁၢဝ်ႈႁႅင်း ။
ယၢမ်းလဵဝ်ၼႆႉ တၢင်းပွတ်းသၢႆထုင်ႉမိူင်းယေႃၼႆႉၵူၺ်း ထုၵ်ႇၸုမ်းယိပ်းၵွင်ၵၢင်ႇၸၢဝ်းၶိူဝ်း ပိၵ်ႉဢိုတ်း Lockdown ဝႆႉ ယွၼ်ႉတၢင်းဝဵင်းလႃႈသဵဝ်ႈ မီးၵူၼ်းတိတ်းၸပ်း ၶူဝ်ႊဝိတ်ႉ 19 တိူဝ်းၼမ်မႃး ဝႃႈၼႆ။
“တႄႇဢဝ် မိူဝ်ႈဝႃး ဝၼ်းတီႈ 20 ၼႆႉမႃး သိုၵ်းၶၢင်၊ ၵူဝ်းၵၢင်ႉလႄႈ လွႆ ၶဝ်ႁူမ်ႈၵၼ်သေ ပိၵ်ႉဢိုတ်းတၢင်းပႅတ်ႈ တီႈသဵၼ်ႈ တၢင်း ဢၼ်ၵၢႆႇၸူးၵၼ် လႃႈသဵဝ်ႈ – မိူင်းယေႃ ဢမ်ႇပၼ်ၵူၼ်းၶဝ်ႈဢွၵ်ႇၵႂႃႇမႃးၶႃႈ။ လုၵ်ႉတၢင်းလႃႈသဵဝ်ႈမႃးၵေႃႈ ဢမ်ႇ လႆႈ။ လုၵ်ႉတၢင်းမိူင်းယေႃၼႆႉၵႂႃႇလႃႈသဵဝ်ႈၵေႃႈ ဢမ်ႇလႆႈ။ ယွၼ်ႉတၢင်းပဵၼ်ၶူဝ်ႊဝိတ်ႉ 19 ၼႆသေ Lockdown ဝႆႉၶႃႈ ဢေႃႈ။ လွင်ႈၼႆႉ တေလႆႈဝႃႈ ပဵၼ်လွင်ႈယၢပ်ႇၽိုတ်ႇတႃႇၵူၼ်းမိူင်းပိုၼ်ႉတီႈ ၵႂႃႇမႃးယၢပ်ႇတႄႉၶႃႈ”- ၵူၼ်းမိူင်းယေႃ သိုပ်ႇလၢတ်ႈၼႄထႅင်ႈၼင်ႇၼႆ။
ၼွၵ်ႈလိူဝ်ၼၼ်ႉ တႄႇဢဝ် ဝၼ်းတီႈ 20 ၼႆႉၵႂႃႇထႅင်ႈ တၢင်းၸုမ်းသိုၵ်းၵူဝ်းၵၢင်ႉၵေႃႈ သမ်ႉဢွၵ်ႇလိၵ်ႈမႃး ပွတ်းတၢင်း ထုင်ႉမိူင်းယေႃၼႆႉ တႄႇဢဝ် ယၢမ်းၵၢင်ၶိုၼ်း 10 မူင်း ထိုင် 4 မူင်းၵၢင်ၼႂ်ၸဝ်ႉ ႁၢမ်ႈၵူၼ်းမိူင်း ၼႂ်းပိုၼ်ႉတီႈ တေဢမ်ႇလႆႈ ဢွၵ်ႇတၢင်းၼွၵ်ႈႁိူၼ်းယေးၵၼ် ၵႂႃႇမႃး တၢင်းလႂ် ဝႃႈၼႆ။
