တီႈလိၼ်ၶွင်ၵူၼ်းဝၢၼ်ႈႁွင်ႇ တႃႈၶီႈလဵၵ်း ထုၵ်ႇၶွမ်ႊပၼီႊႁူင်ပင်း ဢထမ်ႇမ လွမ်ႉႁူဝ်ႉဢဝ်ထႅင်ႈသေ ၵူၼ်းဝၢၼ်ႈႁူမ်ႈ ၵၼ် ၶတ်းၸႂ်ယႃႉႁူဝ်ႉပႅတ်ႈ ၼင်ႇႁိုဝ် ပေႃးတေလႆႈၶိုၼ်းတီႈလိၼ်ၼၼ်ႉ ဝႃႈၼႆ။

ဝၼ်းတီႈ 17/6/2021 ၼၼ်ႉ ၵူၼ်းဝၢၼ်ႈႁွင်ႇ ဢိူင်ႇႁွင်ႈလိုၵ်ႉ ၸႄႈဝဵင်းတႃႈၶီႈလဵၵ်း ႁူမ်ႈၵၼ်သေ ယႃႉပႅတ်ႈႁူဝ်ႉ ဢၼ် ၶွမ်ႇပၼီႊႁူင်ပင်း ဢထမ်ႇမ လွမ်ႉဢဝ်လိၼ် သူၼ်ႁႆႈၼႃး ၵူၼ်းဝၢၼ်ႈၼၼ်ႉ ၼႆယဝ်ႉ။

ၵူၼ်းဝၢၼ်ႈႁွင်ႇ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဢွၼ်တၢင်းၼၼ်ႉ ႁဝ်းၶႃႈ ယႃႉပႅတ်ႈယဝ်ႉ လၢႆၵမ်း ႁူဝ်ႉဢၼ် ၶဝ်မႃးလွမ်ႉဢဝ်ဝႆႉၼၼ်ႉ။ ၶွမ်ႊပၼီႊၶဝ် ပၢႆလွၵ်ႇငိုတ်ႈႁဝ်းၶႃႈ တေယိုဝ်းႁဝ်းၶႃႈၼႆထႅင်ႈလူးၵွၼ်ႇ။ ၶဝ်ဢထမ်ႇမသေ လွမ်ႉႁူဝ်ႉဢဝ် တီႈလိၼ်ၼႆႉထႅင်ႈ။ မိူဝ်ႈဝႃးၼႆႉ ႁဝ်းၶႃႈ ၵူၼ်းဝၢၼ်ႈ ႁူမ်ႈၵၼ်သေ ၵႂႃႇယႃႉပႅတ်ႈ ႁူဝ်ႉၶဝ်ၼၼ်ႉၶႃႈဢေႃႈ ယွၼ်ႉႁဝ်းၶႃႈ လူဝ်ႇၵႂႃႇၽုၵ်ႇသွမ်ႈၼႂ်းမၼ်းၶႃႈ” – ဝႃႈၼႆ။

ပၼ်ႁႃ လွင်ႈတီႈလိၼ်ၼႆႉ ၵူၼ်းဝၢၼ်ႈႁွင်ႇတင်း ၶွမ်ႊပၼီႊႁူင်ပင်း လႆႈၽိတ်းထဵင်ၵၼ်မႃး ႁိမ်ၵၼ်မႃး တေႃႇထိုင်ယၢမ်း လဵဝ် ၵူၺ်းၵႃႈ ဢမ်ႇမီးၸုမ်းလႂ် မူႇလႂ် ၶဝ်ႈၵႄႈ ၸွႆႈသင်ပၼ်။  ၶွင်ႇသီႇသိုၵ်းမၢၼ်ႈ မိူၵ်ႈမႂ်ႈတႄႉ ၶဝ်ႈႁူမ်ႈၸွႆႈတင်း ၾၢႆႇၶွမ်ႊပၼီႊ ဝႃႈၼႆ။  

လွင်ႈပၼ်ႁႃတီႈလိၼ်ၼႆႉ မိူဝ်ႈပီ 1998-1999 မိူဝ်ႈပၢၼ်သိုၵ်းၽွင်းငမ်းဝၢၼ်ႈမိူင်းၼၼ်ႉ ၶဝ်ဢထမ်ႇမတဵၵ်းဢဝ်လၢႆတီႈ လိၼ်ၵူၼ်းဝၢၼ်ႈ ၼႂ်းဢိူင်ႇ ႁွင်ႈလိုၵ်ႉ ၸႄႈဝဵင်းတႃႈၶီႈလဵၵ်း တႃႇ 100 ဢေႊၶိူဝ်ႊ။ ပၼ်ၶွမ်ႊပၼီႊႁူင်ပင်းၸႂ်ႉ ဢဝ်ႁဵတ်းႁူင်းၸၢၵ်ႈ ထူင်ယၢင် တႃႇ 20 ဢေႊၶိူဝ်ႊ။ ၵမ်းၼႆႉ ၵိုတ်းထႅင်ႈ 80 ဢေႊၶိူဝ်ႊၼၼ်ႉ ၸဝ်ႈၶွင်သူၼ်ႁႆႈၼႃႈ ၶိုၼ်း ၽုၵ်ႇသွမ်ႈၵိၼ်ၼႂ်းမၼ်းမႃး ၶိုၼ်း။

မိူဝ်ႈပီ 2018 ၼၼ်ႉ ယူႇတီႈၻွၵ်ႊတိူဝ်ႊလိၼ်းထုတ်ႉ ၸွမ်ၽွင်းလူင် မိူင်းတႆးလၢတ်ႈဝႃႈ တီႈလိၼ်သူၼ်ႁႆႈၼႃး ၵူၼ်းမိူင်း ဢၼ်ထုၵ်ႇႁုပ်ႈယိုတ်းဢဝ်ၵႂႃႇၼၼ်ႉ သင်ဝႃႈ ဢမ်ႇၽုၵ်ႇသွမ်ႈသင်ၼႆ ပၼ်ၶိုၼ်းၸဝ်ႈၶွင်တီႈလိၼ်ၶိုၼ်းၼႆသေ ၵူၼ်း ဝၢၼ်ႈၶိုၼ်ႈလုမ်းတြႃး တေႃႇသူႈ ဢွင်ႇပေႉမႃးယဝ်ႉသေတႃႉ ၶွမ်ႊပၼီႊ ဢမ်ႇယွမ်းပၼ်ၶိုၼ်း။ ၵူၼ်းမိူင်းသမ်ႉတုၵ်းယွၼ်း မႃးၶိူဝ်းယႂ်းထိုင်တီႈၶွမ်ႊပၼီႊဢဝ်ႁႅင်းပလိၵ်ႈလႄႈသိုၵ်းမႃးလွမ်ႉႁူဝ်ႉဢဝ်မိူဝ်ႈႁူဝ်လိူၼ်ၼႆႉ။