တၢင်းမိူင်းတႆးပွတ်းႁွင်ႇ ၸႄႈဝဵင်းမိူင်းယႆၼၼ်ႉ ၾၢႆႇပၢႆးယူႇလီ ၶွင်ႇသီႇသိုၵ်းမၢၼ်ႈ ၵူတ်ႇထတ်းႁူပ်ႉႁၼ် ၵူၼ်းမိူင်း ၼႂ်းၸႄႈဝဵင်းမိူင်းယႆ တိတ်းၸပ်း ၸိူဝ်ႉမႅင်းၶူဝ်ႊဝိတ်ႉ 19 သွင်ၵေႃႉ ဝႃႈၼႆ။
ဝၼ်းတီႈ 16/6/2021 ၼႆႉၵူၼ်းမိူင်းယႆ သွင်ၵေႃႉ တေၵႂႃႇယႃတူဝ် တီႈဝဵင်းလိူဝ်ႇ(မၼ်းတလေး)ၼႆသေ ၽႅဝ်ထိုင်တီႈၵဵၵ်ႉၵူတ်ႇထတ်းတၢင်းပဵၼ်ၶူဝ်ႊဝိတ်ႉ 19 ၊ ၾၢႆႇပၢႆးယူႇလီ လႆႈၵူတ်ႇထတ်း ႁူပ်ႉႁၼ်ၸိူဝ်ႉမႅင်း ၶူဝ်ႊဝိတ်ႉ 19 လႄႈ လႆႈဢဝ်တူဝ်ၶဝ်သွင်ၵေႃႉ သူင်ႇယူတ်းယႃတူဝ်တီႈ ႁူင်းယႃလူင်ဝဵင်းမိူင်းယႆ။
ၵူၼ်းပိုၼ်ႉတီႈ မိူင်းယႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၶႃပေႃႈလုၵ်ႈ တေၵႂႃႇယူတ်းယႃႈတူဝ် တၢင်းမၼ်းတလေးဝႃႇ၊ ၽိူဝ်ႇတီႈၵဵၵ်ႉၵူတ်ႇထတ်း သမ်ႉဢွၵ်ႇ Positive ၼၼ်ႉၼႃႇ။ ဢမ်ႇလႆႈၵႂႃႇ မၼ်းတလေးသေ လႆႈယႃ ၶူဝ်ႊဝိတ်ႉယူႇတီႈမိူင်းယႆၼႆႉယိုင်”– ဝႃႈၼႆ။
ယွၼ်ႉသွင်ၵေႃႉ ပေႃႈလုၵ်ႈ ၸပ်းတၢင်းပဵၼ်ၶူဝ်းဝိတ်ႉလႄႈ ႁိူၼ်းယေးၶဝ် လႆႈသိတ်ႇလၢင်ႉယႃ ႁၢမ်ႈၵူၼ်းၶဝ်ႈဢွၵ်ႇ၊ ၵူၼ်းယူႇ ႁိမ်းၵိၼ်ၸမ်ၵေႃႈ ၵူဝ်ၸပ်းတၢင်းပဵၼ်လႄႈ ၵုမ်းၵၵ်းတူဝ်ဝႆႉ ႁင်းၽႂ်ႁင်းမၼ်းယူႇလႆႈႁူႉၼင်ႇၼႆ။
တၢင်းပဵၼ်ၶူဝ်ႊဝိတ်ႉ ၽႄႈၶိုၼ်းႁွပ်ႈထိသၢမ် ၼႆႉ ၼႂ်းမိူင်းတႆး လၢႆလၢႆ ၸပ်းတၢင်းပဵၼ်ၶူဝ်းဝိတ်ႉ 19 ။ ဢၼ်ၸပ်းၼမ်လိူဝ်ပိူၼ်ႈ ပဵၼ်တီႈဝဵင်းလႃႈသဵဝ်ႈ၊ ၶၢဝ်းတၢင်း 14-15 ဝၼ်းၼႆႉ မီးၵူၼ်းၸပ်း ၶူဝ်ႊဝိတ်ႉ 80 ပၢႆယဝ်ႉ။
