ၵူၼ်းၶၢႆၽၵ်းၼႂ်းၵၢတ်ႇဝဵင်းၼမ်ႉၶမ်းၵေႃႉၼိုင်ႈ ၺႃးၸုမ်းယိပ်းၵွင်ႈၸုမ်းၼိုင်ႈၶဝ်ႈတီႉထိုင်ႁိူၼ်းသေဢဝ်ၵႂႃႇလႆႈ 3 ဝၼ်းယဝ်ႉယင်းပႆႇပွႆႇမႃးၶိုၼ်းလႄႈ ပီႈၼွင်ႉၵူၼ်းႁိူၼ်းဢွၼ်ၵၼ်မႆႈၸႂ် ၊ ၵူၼ်းႁၼ်တႂ်ႈတႃႈတႄႉဝႃႈပဵၼ်သိုၵ်း TNLA ။
ဝၼ်းတီႈ 15/6/2021 ယၢမ်းၵၢင်ၶမ်ႈ မွၵ်ႈ 9 မူင်း ပႃႈၶမ်းဢီႇ ဢႃယု မွၵ်ႈ 50 ပၢႆ ၵူၼ်းဝၢၼ်ႈပွၵ်ႉတႂ်ႈ ၸႄႈဝဵင်း ၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ထုၵ်ႇၸုမ်းယိပ်းၵွင်ႈၵၢင်ႇ ၸုမ်းၼိုင်ႈ ဢဵၼ်ႁႅင်း မွၵ်ႈ 10 ၵေႃႉ ၶဝ်ႈတီႉၺွပ်း မၼ်းၼၢင်း ၽႅဝ်ၼႂ်းႁိူၼ်းယေး၊ လႆႈၶၢဝ်းတၢင်း 3 ဝၼ်းပႃးမိူဝ်ႈၼႆႉယဝ်ႉယင်းပႆႇပွႆႇပွၵ်ႈႁိူၼ်းၶိုၼ်း ဝႃႈၼႆ။
ပီႈၼွင်ႉၸမ်ၸႂ်ပႃႈၶမ်းဢီႇ လၢတ်ႈတီႈၽူႈတွႆႇႁွၵ်ႈဝႃႈ – “မၼ်းၶၢႆၽၵ်းသုၵ်းၼႂ်းၵၢတ်ႇၵူၺ်း။ မၼ်းဢမ်ႇၵဵဝ်ႇၶွင်ႈ တင်းၸုမ်းယိပ်းၵွင်ႈၵၢင်ႇတီႈလႂ်ၸုမ်းလႂ်။ ႁဵတ်းသင်သမ်ႉမႃးတီႉၺွပ်းမၼ်း ၵႂႃႇ။ ဢဝ်ၵႂႃႇဝႆႉလႂ်ၵေႃႈဢမ်ႇႁူႉ ဢမ်ႇတိတ်းတေႃႇမႃးတၢင်းႁိူၼ်းသေဢိတ်းလႄႈဢွၼ်ၵၼ်မႆႈၸႂ်ယူႇဢေႃႈ ။လႆႈသၢမ်ဝၼ်းမိူဝ်ႈၼႆႉယဝ်ႉလူး ”- ဝႃႈၼႆ။
ၵူၼ်းဝၢၼ်ႈပွၵ်ႉတႂ်ႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ သိုၵ်းလွႆ TNLA မႃးၺွပ်း ပႃႈၶမ်းဢီႇထိုင်ႁိူၼ်း။ ပႃႈၶမ်းဢီႇလႅၼ်ႈၶဝ်ႈၵႂႃႇမူၵ်းၼႂ်းႁိူၼ်းပီႈၼွင်ႉတၢင်းၼႃႈႁိူၼ်းၶဝ်ၼၼ်ႉလႄႈ သိုၵ်း TNLA လမ်းၸွမ်းၶဝ်ႈၵႂႃႇတီႉ ၺွပ်း ဢဝ်မၼ်းၼၢင်း ထိုင်ၼႂ်းႁိူၼ်းၼၼ်ႉ – ဝႃႈၼႆ။
ၸုမ်းသိုၵ်းၼၼ်ႉ ဢဵၼ်ႁႅင်းမီးမွၵ်ႈ 10 ၵေႃႉၼႆႉ ၶီႈရူတ်ႉၶိူင်ႈမႃးမွၵ်ႈ 5 လမ်း ၊ ၵူၼ်းမိူင်းၼမ်ႉၶမ်းဝႃႈ လႅပ်ႈတေပဵၼ်လွင်ႈၵဵပ်းၶွၼ်ႇယွႆႈယႅမ်းၵူၺ်းဝႃႈၼႆ။
လွင်ႈၼႆႉၵူၼ်းၼုမ်ႇတဢၢင်းၵေႃႈလၢတ်ႈဝႃႈ မႅၼ်ႈတႄႉၼႆယူႇ။ ၵူၺ်းၵႃႈ ၽူႈၶၢၼ်ပၢၵ်ႇ ၾၢႆႇပွင်ႇၶၢဝ်ႇသိုၵ်း TNLA ၸဝ်ႈႁၢၼ်မၢႆးဢၢႆႈၵျေႃႇတႄႉလၢတ်ႈတီႈၽူႈတွႆႇႁွၵ်ႈဝႃႈ – ၵဵဝ်ႇၵပ်းလွင်ႈၼႆႉ ႁဝ်းၶႃႈပႆႇလႆႈငိၼ်းႁူဝ်ယွႆႈမၼ်း- ဝႃႈၼႆ။
တႄႇဢဝ် ႁူဝ်ပီ 2021 ၼႆႉမႃး ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း မိူၼ်ၼင်ႇ သိုၵ်းၶၢင် KIA သိုၵ်းတဢၢင်း TNLA ၸိူဝ်းၼႆႉ ၵဵပ်းၶွၼ်ႇၵူၼ်းမိူင်း ၼႂ်းၸႄႈဝဵင်းၼမ်ႉၶမ်းမႃး ႁၢဝ်ႈႁႅင်း ဢမ်ႇဝႃႈ ႁၢၼ်ႉၶၢႆၶူဝ်းၵုၼ်ႇ/ ၶွင်ၵိၼ် ႁၢၼ်ႉလဵၵ်ႉ/ ယႂ်ႇ ၸိူဝ်းၼႆႉ ဢမ်ႇၵိုတ်း ၵဵပ်းမူတ်း ၼႆယဝ်ႉ။
ယွၼ်ႉတၢင်းပဵၼ်ၶူဝ်ႊဝိတ်ႉ 19 ၵေႃႈပိူင်ၼိုင်ႈ၊ လွင်ႈၾင်ႇမိူင်းၶႄႇ ဢိုတ်းပိၵ်ႉၽၵ်းတူၵေႃႈပိူင် ၼိုင်ႈ ၊ လွင်ႈၵၢၼ်မိူင်းယၢမ်းလဵဝ် ၵေႃႈပိူင်ၼိုင်ႈသေ ၵၢၼ်ငၢၼ်းဢမ်ႇပဵၼ် ၵူၼ်းမိူင်းထူပ်းတၢင်းယၢပ်ႇၽိုတ်ႇၵိၼ်း ၸႂ်လိူဝ် ႁႅင်း ၊ သမ်ႉပၢႆၺႃး ၸုမ်းယိပ်းၵွင်ႈၵၢင်ႇ တဵၵ်းၵဵပ်းၶွၼ်ႇထႅင်ႈ ဢမ်ႇယွၼ်ႇယၢၼ်းပၼ်ၵူၼ်းမိူင်းပိုၼ်ႉတီႈသေဢိတ်း ၵူၼ်းၼမ်ႉၶမ်းပွင်ႉၶၢင်းၼင်ႇၼႆ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ