မိူဝ်ႈၼႆႉ ဝၼ်းတီႈ 16/6/2021 ယၢမ်းၵၢင်ၼႂ် တီႈဝဵင်းၼမ်ႉလၼ်ႈ ၸႄႈဝဵင်းသီႇပေႃႉ ၸိုင်ႈတႆး ပွတ်းႁွင်ႇ ၵူတ်ႇထတ်းႁၼ် ၵူၼ်းတိတ်းၸပ်းၸိူဝ်ႉမႅင်း တၢင်းပဵၼ်ၶူဝ်ႊဝိတ်ႉ 19 ထႅင်ႈ 4 ၵေႃႉ ၼႆယဝ်ႉ။
ၸုမ်းၸွႆႈထႅမ်တူင်ႇဝူင်းၵူၼ်း ၼမ်ႉလၼ်ႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ တီႈၼမ်ႉလၼ်ႈ ထူပ်းႁၼ် ၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ 19 ႁဝ်းၶႃႈ လႆႈၵႂႃႇႁပ်ႉတီႈႁိူၼ်းၶဝ်သေ မႃးယူတ်းယႃ တီႈႁူင်းယႃ ၼမ်ႉလၼ်ႈ ယဝ်ႉ”- ဝႃႈၼႆ။
မိူဝ်ႈတႄႇမၼ်း ၵူၼ်းဝၢၼ်ႈၵေႃႉၼိုင်ႈ ဢမ်ႇယူႇလီၼႆသေ ပႃးၸွမ်းၵူၼ်းသူင်ႇၵေႃႉၼိုင်ႈ ဢွၼ်ၵၼ်မႃးၼႄမေႃ တီႈႁူင်း ယႃၼမ်ႉလၼ်ႈသေ ဢဝ် RDT Test Kit ၵူတ်ႇထတ်းသေ ထူပ်းႁၼ်ၸိူဝ်ႉၸပ်းၸိူဝ်ႉမႅင်းတၢင်းပဵၼ် ၶူဝ်ႊဝိတ်ႉ 19 တင်း 2 ၵေႃႉ ဝႃႈၼႆ။
ၼွၵ်ႈလိူဝ်ၼၼ်ႉ ယူႇတီႈၽူႈမီးပုၼ်ႈၽွၼ်းၶဝ် ဢဝ် RDT Test Kit သေ ၸွမ်းၵႂႃႇၵူတ်ႇထတ်းတီႈမုင်ႈႁေႃႁိူၼ်း ၵူၼ်းသွင် ၵေႃႉၼၼ်ႉထႅင်ႈ 7 ၵေႃႉ။ ၼႂ်းၼၼ်ႉ ထူပ်းႁၼ်ထႅင်ႈ 2 ၵေႃႉ။ တႃႇၵူၼ်း 2 ၵေႃႉၼႆႉၵေႃႈ လႆႈႁပ်ႉမႃးယူတ်းယႃတူဝ်ဝႆႉ တီႈ ႁူင်းယႃၼမ်ႉလၼ်ႈယဝ်ႉ ဝႃႈၼႆ။
ယၢမ်းလဵဝ် တီႈဝဵင်းၼမ်ႉလၼ်ႈၼႆႉ ၵူတ်ႇထတ်းႁၼ် ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 တင်းမူတ်း မီး 8 ၵေႃႉ ပႃး မိူဝ်ႈၼႆႉ။ ၼႂ်းၼၼ်ႉ လူႉတၢႆ ၵေႃႉၼိုင်ႈ ဝႃႈၼႆ။
မိူဝ်ႈၼႆႉ ဝၼ်းတီႈ 16 တီႈၸႄႈဝဵင်းၼမ်ႉတူႈၵေႃႈ ၵူတ်ႇထတ်းႁၼ် ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 တင်းမူတ်း 3 ၵေႃႉ ။ ၵူၼ်းၼႂ်းၸိုင်ႈတႆးပွတ်းႁွင်ႇ ဢၼ်တိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 ၸုပ်ႈၼႆႉမီး 60 ပၢႆယဝ်ႉလႆႈႁူႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ