မၢၵ်ႇတႅၵ်ႇတီႈႁိမ်းၼၢႆႉၵလၢပ်ႉ ႁၢၼ်ႉၵိၼ်ၵျေႃႇသိူဝ်းမူၼ်ႈၵၢင်ၶိုၼ်း ၵျီးမျၢတ်ႉတေႃးသူၺ်ႇမျိၼ်း ၼႂ်းၸႄႈဝဵင်းတႃႈၶီႈလဵၵ်း ၸိုင်ႈတႆး ပွတ်းဢွၵ်ႇၶူင်း မီးလွင်ႈပိုတ်းယိုဝ်းၵၼ် သေ မၢၵ်ႇတႅၵ်ႇ 2 လုၵ်ႈထပ်းၵၼ် ဝႃႈၼႆ။
မိူဝ်ႈဝႃး ဝၼ်းတီႈ 6/6/2021 ယၢမ်းၵၢင်ၶမ်ႈမွၵ်ႈ 8 မူင်းၶိုင်ႈၼႆႉ မၢၵ်ႇတႅၵ်ႇတီႈ ၵျီးမျၢတ်ႉတေႃးသူၺ်ႇမျိၼ်း (King Horse Fly Pub 6888) ႁိမ်းၵၢတ်ႇသူၺ်ႇမျေႇတႃႇယႃႇ ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း 2 လုၵ်ႈထပ်းၵၼ် ၼႆယဝ်ႉ။
ၵူၼ်းပိုၼ်ႉတီႈ တႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ – “ၵွၼ်ႇမၢၵ်ႇတေတႅၵ်ႇၼၼ်ႉ မီးလွင်ႈပိုတ်းယိုတ်းၵၼ် မွၵ်ႈ 2-3 ၵမ်းၼႆႉ။ ဝၢႆးၼၼ်ႉယဝ်ႉ မၢၵ်ႇၸင်ႇတႅၵ်ႇတီႈၼႃႈၽၵ်းတူၶဝ်ႈဢွၵ်ႇၵလၢပ်ႉ ၵျီးမျၢတ်ႉတေႃးသူၺ်ႇမျိၼ်း ၼၼ်ႉ 2 လုၵ်ႈ”- ဝႃႈၼႆ။
ၼႂ်းၸႄႈဝဵင်းတႃႈၶီႈလဵၵ်းၼႆႉ ၵေႃႈသိုၵ်းမၢၼ်ႈ ပိုၼ်ၽၢဝ်ႇဢမ်ႇလႆႈဢွၵ်ႇႁိူၼ်းယၢမ်းၵၢင်ၶိုၼ်းၼႆသေတႃႉ မိူၼ်ၼင်ႇ ႁူင်းၵိၼ်ၵျေႃႇ သိူဝ်းမူၼ်ႈၵၢင်ၶိုၼ်း ၵျီးမျၢတ်ႉတေႃးသူၺ်ႇမျိၼ်း (King Horse Fly Pub 6888) ၼၼ်ႉ တႄႉသမ်ႉလႆႈၶႂၢင်ႉပိုတ်ႇယူႇ ၵူၼ်းတႃႈၶီႈလဵၵ်းလၢတ်ႈၼင်ႇၼႆ။
ၽွင်းမၢၵ်ႇတႅၵ်ႇၼၼ်ႉ သိုၵ်းမၢၼ်ႈလႄႈပလိၵ်ႈမၢၼ်ႈ ဢမ်ႇၵႂႃႇၵူတ်ႇထတ်းတီႈႁၢၼ်ႉၼၼ်ႉၵမ်းလဵဝ် ၊ ၵွပ်ႈၼႆ ပဵၼ်ပၼ်ႁႃသင် ပဵၼ်ၼမ်ႉမိုဝ်းၽႂ်ၵေႃႈဢမ်ႇႁူႉဝႃႈၼႆ။
ပူၼ်ႉမႃး မိူဝ်ႈဝၼ်းတီႈ 25/5/2021 ယၢမ်းၵၢင်ၶမ်ႈ မွၵ်ႈ 9 မူင်းၼၼ်ႉၵေႃႈ မၢၵ်ႇတႅၵ်ႇလုၵ်ႈၼိုင်ႈ ၼႂ်းဝၢင်း ၵျီးမျၢတ်ႉတေႃးသူၺ်ႇမျိၼ်း ၼႆႉၵူၺ်း ဝႃႈၼႆ။
