မိူဝ်ႈၼႆႉ ဝၼ်းတီႈ 2/6/2021 ယၢမ်းၵၢင်ၼႂ် မွၵ်ႈ 8 မူင်းပၢႆ မၢၵ်ႇတႅၵ်ႇတီႈၽၵ်းတူၶဝ်ႈႁူင်းႁဵၼ်းၸၼ်ႉသုင် မၢႆ 3 ဢၼ်မီး ၾၢႆႇၼႃႈတပ်ႉၵွင်လူင် (အမြောက်တပ်) ၼႂ်းၸႄႈဝဵင်းၵျွၵ်ႉမႄး ၸိုင်ႈတႆး ပွတ်းႁွင်ႇ။
ၵူၼ်း ၵျွၵ်ႉမႄး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၼႆႉ ယၢမ်းၵၢင်ၼႂ် ၵူၼ်းမိူင်းထူပ်းႁၼ် ႁေႃႇႁွႆႈဝႆႉတီႈၽၵ်းတူႁူင်းႁဵၼ်းသေ ၼႅတ်ႈၵႂႃႇႁွင်ႉၽူႈမီးပုၼ်ႈၽွၼ်းၶဝ် မႃးတူၺ်း။ ပဵၼ်ႁေႃႇမၢၵ်ႇလႄႈ ၶဝ်ႁိပ်ႈတွႆႇတႅၵ်ႇပႅတ်ႈ ”- ဝႃႈၼႆ။
မိူဝ်ႈဝႃး ဝၼ်းတီႈ 1/6/2021 ၶွင်ႇသီႇသိုၵ်းမၢၼ်ႈ ၸီႉသင်ႇ ႁႂ်ႈပိုတ်ႇႁူင်းႁဵၼ်း ၵူႈတီႈ ၼႂ်းမိူင်း ႁူမ်ႈတုမ်ပတ်းပိုၼ်ႉ ။ တီႈႁူင်းႁဵၼ်းၸၼ်ႉသုင်မၢႆ 3 ၵျွၵ်ႉမႄးၼႆႉၵေႃႈ လႆႈပိုတ်ႇႁူင်းႁဵၼ်း။ ႁူင်းႁဵၼ်း ၸၼ်ႉသုင်မၢႆ 3 ၼႆႉ တင်ႈဝႆႉႁိမ်းႁူင်းယႃ ၵျွၵ်ႉမႄးတင်း ႁိမ်းတပ်ႉသိုၵ်းမၢၼ်ႈလႄႈ ၵမ်ႈၼမ် လုၵ်ႈႁဵၼ်းဢၼ်မႃးၶိုၼ်ႈႁဵၼ်းၵေႃႈ ပဵၼ် လုၵ်ႈလၢင်းတပ်ႉသိုၵ်း ၽူႈႁၢပ်ႇၵၢၼ်လူင်ပွင်ၸိုင်ႈ ၸိူဝ်းယူႇႁိမ်းႁွမ်းၼၼ်ႉ။
“ႁူင်းႁဵၼ်းၼၼ်ႉ မၼ်းပဵၼ်ႁူင်းႁဵၼ်းတပ်ႉသိုၵ်းမၢၼ်ႈ ဝုၼ်ႇထၢၼ်းၶဝ် ၵမ်ႈၼမ် ဢဝ်လုၵ်ႈလၢင်း ၶဝ်ၵႂႃႇၶိုၼ်ႈ။ ၵမ်ႈၼမ် ၵူၼ်းမိူင်းတႄႉ ပႆႇဢဝ်လုၵ်ႈလၢင်းၽႂ်ၵႂႃႇသူင်ႇႁူင်းႁဵၼ်းၶႃႈ တီႈၵျွၵ်းမႄးၼႆႉ။ ယွၼ်ႉမၢၵ်ႇတႅၵ်ႇၸိူင်ႉၼႆယဝ်ႉသေ ႁူင်းႁဵၼ်းၼႆႉ လႅပ်ႈတေပႆႇႁတ်းပိုတ်ႇယဝ်ႉၶႃႈမိူဝ်ႈၼႆႉ”- ဝႃႈၼႆ။
လွင်ႈၼႆႉ ပဵၼ်ၼမ်ႉမိုဝ်းၽႂ် ၸုမ်းလႂ် ၵေႃႉလႂ် ႁဵတ်းဢၼ်ဝႃႈၼၼ်ႉ ဢမ်ႇပႆႇႁူႉ။ ၵူၺ်းၵႃႈ သဵၼ်ႈတၢင်းၵႂႃႇမႃး ၼႃႈႁူင်းႁဵၼ်းတႄႉ သိုၵ်းမၢၼ်ႈပိၵ်ႉႁၢမ်ႈၵူၼ်းၵႂႃႇမႃးဝႆႉယဝ်ႉဝႃႈၼႆ။
မိူၼ်ၼၼ်ၼင်ႇၵဝ်ႇ မိူဝ်ႈၼႆႉ ဝၼ်းတီႈ 2/6/2021 ယၢမ်းၵၢင်ၼႂ် မွၵ်ႈ 4 မူင်း မၢၵ်ႇတႅၵ်ႇ တီႈ ဝဵင်းတၢင်ႉယၢၼ်း လုၵ်ႈၼိုင်ႈ ၼင်ႇၵဝ်ႇ။
