ၵူၼ်းမိူင်းမၢၼ်ႈ ဢၼ်ပူၼ်ႉတူတ်ႈတၢမ်ႇၶွၵ်ႈမိူင်းထႆး 109 ၵေႃႉ ဢၼ်ပလိၵ်ႈထႆး၊ၸဝ်ႈၼႃႈတီႈထႆးမႄႈသၢႆ သူင်ႇတူဝ်ၸူး ၸဝ်ႈၼႃႈတီႈၾင်ႇမိူင်းမၢၼ်ႈ တႃႈၶီႈလဵၵ်းၶိုၼ်းၼၼ်ႉ ၾၢႆႇပၢႆးယူႇလီ ၵူတ်ႇထတ်း ထူပ်းႁၼ် တၢင်းပဵၼ်ၶူဝ်ႊဝိတ်ႉ 7 ၵေႃႉဝႃႈၼႆ။
ဝၼ်းတီႈ 1/6/2021 ၼႆႉ ၾၢႆႇထႆးဢဝ်ၵူၼ်းမိူင်းမၢၼ်ႈ 109 ၵေႃႉ ဢၼ်ပူၼ်ႉတူတ်ႈတၢမ်ႇၶွၵ်ႈမိူင်းထႆး သူင်ႇၸူး ၾင်ႇမိူင်းမၢၼ်ႈ ။ ၵူၼ်းၸိူဝ်းၼႆႉ ပဵၼ်ၵူၼ်းၸိူဝ်းဢၼ်ၺႃးပလိၵ်ႈထႆးတီႉဝႆႉတီႈၵဵတ်ႉ/လၢၼ်ႇ မႄႈၸၼ်း ၸႄႈဝဵင်းၵဵင်းႁႆး၊ တင်းမူတ်းမီး 155 ၵေႃႉ။ တႃႇထႅင်ႈ 40 ၵေႃႉသမ်ႉ ပဵၼ်ၵူၼ်းၸိူဝ်းၺႃး တူတ်ႈတၢမ်ႇမၢႆမီႈ 505 ဝႆႉ လႆႈႁူႉၼင်ႇၼႆ။
ၸဝ်ႈၼႃႈတီႈထႆးဢၼ်ဢမ်ႇၶႂ်ႈဢွၵ်ႇၸိုဝ်ႈၵေႃႉၼိုင်ႈလၢတ်ႈဝႃႈ – “ၵူၼ်းၸိူဝ်းၺႃးတီႉၸိူဝ်းၼႆႉ ၵမ်ႈၽွင်ႈပဵၼ်ၵူၼ်းလၵ်ႉၶဝ်ႈမိူင်း၊ ၵမ်ႈၽွင်ႈပဵၼ်ၵူၼ်းၸိူဝ်းဝႂ်ႁဵတ်းၵၢၼ်မူတ်းဢႃႇယု၊ ၵမ်ႈၼမ်တႄႉပဵၼ်ၵူၼ်းၸိူဝ်းၺႃးတူတ်ႈတၢမ်ႇၶွၵ်ႈယဝ်ႉသေပူၼ်ႉလွတ်ႈဢွၵ်ႇမႃးၶိုၼ်း။ သဵၼ်ႈမၢႆဢၼ်လႆႈၶိုၼ်းသူင်ႇတူဝ်ပၼ်ၾၢႆႇမိူင်းမၢၼ်ႈၼႂ်ၼႆႉ မွၵ်ႈ 9 မူင်းတႄႉ ပဵၼ်ၸၢႆး 67 ၵေႃႉလႄႈ ယိင်း 42 ၵေႃႉ။ ၼႂ်းၼၼ်ႉထူပ်းႁၼ်တၢင်းပဵၼ်ၶူဝ်ႊဝိတ်ႉ ၸၢႆး 6 ၵေႃႉလႄႈ ယိင်း 1 ၵေႃႉ” -ဝႃႈၼႆ။
ၸၢႆးၼေႃႇ ၽူႈၸွႆႈထႅမ်ႁႅင်းၵၢၼ်ယၢၼ်မိူင်းလၢတ်ႈဝႃႈ− “တင်ႈတႄႇ သိုၵ်းမၢၼ်ႈယိုတ်းမိူင်း ၼႂ်းမိူင်းႁူမ်ႈတုမ်မႃး ၵူၼ်းမိူင်းမၢၼ်ႈဢၼ်လၵ်ႉပၢႆႈၶဝ်ႈမိူင်းထႆးၵေႃႈၼမ်မႃးၵူႈမိုဝ်ႉၵူႈဝၼ်း။ ဢၼ်ၺႃးၺွပ်းၸွမ်းလႅၼ်လိၼ်ၵေႃႈ မီးၵူႈဝၼ်း။ တင်းၾၢႆႇထႆးၵေႃႈ ဢွၵ်ႇလိၵ်ႈထႅင်ႈဝႃႈ ႁႂ်ႈၽဵဝ်ႈပႅတ်ႈႁႅင်းၵၢၼ်ဢၼ်ဢမ်ႇပဵၼ်တၢင်းၵၢၼ်။ ၵွပ်ႈၼၼ်လႄႈ ၾၢင်ႉတူဝ်ၵႂႃႇမႃးယူႇသဝ်းၽွင်ႈ ”-ဝႃႈၼႆ။
ယွၼ်ႉတင်းပဵၼ်ၶူဝ်ႊဝိတ်ႉ 19 ၽႄႈလၢမ်ႈလႄႈ လႅၼ်လိၼ်ထႆး−မၢၼ်ႈ လႆႈပိၵ်ႉဢိုတ်းၽၵ်းတူလႅၼ်လိၼ်မႃးၸဵမ်မိူဝ်ႈ ဝၼ်းထီႉ 23 လိူၼ် March ပီ 2020 ၼၼ်ႉတေႃႇထိုင်ယၢမ်းလဵဝ်။ ၼင်ႇႁိုဝ်တေဢမ်ႇမီး ၵူၼ်းလၵ်ႉလွမ်ၶဝ်ႈမိူင်း ၸွမ်းလႅၼ်လိၼ် ၼၼ်ႉ ၾၢႆႇထႆးလႆႈ တမ်းဝၢင်းလွင်ႈႁူမ်ႇလူမ်ႈ ၼႅၼ်ႈၼႃ မႃးသေတႃႉ ၼႂ်းဝူင်ႈဝၢင်ႈၼႆႉယွၼ်ႉငဝ်းလၢႆးၵၢၼ်မိူင်းမိူင်းမၢၼ်ႈလႄႈ ၵူၼ်းမိူင်းႁူမ်တုမ် ဢၼ်လၵ်ႉလွမ်ၶဝ်ႈမိူင်းထႆးၵေႃႈတိုၵ်ႉမီးယူႇၵူႈဝၼ်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ