သွင်ဝၼ်းထပ်းၵၼ်မႃးၼႆႉ သိုၵ်းၶၢင် KIA ယိုဝ်းသိုၵ်းမၢၼ်ႈ ၼႂ်းၸႄႈဝဵင်းၵူတ်ႉၶၢႆ မိူင်းတႆးပွတ်းႁွင်ႇႁၢဝ်ႈႁႅင်း၊ ပၢင်တိုၵ်း ပဵၼ်လၢႆတီႈ လၢႆၵမ်းထပ်းၵၼ်။
မိူဝ်ႈၼႆႉ ဝၼ်းတီႈ 27/5/2021 ယၢမ်းၵၢင်ဝၼ်း မွၵ်ႈ 11 မူင်း ၶွင်ႇသီႇသိုၵ်းမၢၼ်ႈ တင်း သိုၵ်းၶၢင် KIA ပဵၼ်ပၢင်တိုၵ်းၵၼ် တီႈႁိမ်းဝၢၼ်ႈၵွင်းလိူၼ် ၾၢႆႇၼိူဝ်ဝၢၼ်ႈၼမ်ႉသႃႇ ၼႂ်းၵႄႈ တႃႈမိူင်းငႅၼ်းလႄႈ မိူင်းၸီး ၼႂ်းၸႄႈ ဝဵင်းၵူတ်ႉၶၢႆ ၸႄႈတွၼ်ႈမူႇၸေႊ ၸိုင်ႈတႆး ပွတ်းႁွင်ႇ သွင်ၾၢႆႇ ပဵၼ်ပၢင်တိုၵ်းၵၼ် ႁၢဝ်ႈႁႅင်း ။
ၵူၼ်းၵူတ်ႉၶၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၾၢႆႇသိုၵ်းၶၢင် ပဵၼ်တပ်ႉၵွင် မၢႆ 2 ၾၢႆႇတႂ်ႈတပ်ႉၸုမ်း 10 ၶဝ်မူၵ်းပႂ်ႉယိုဝ်းသိုၵ်းမၢၼ်ႈတီႈႁိမ်းတၢင်းၽႄသေ သွင်ၾၢႆႇ လႆႈပဵၼ်ပၢင်တိုၵ်းၵၼ် ႁၢဝ်ႈႁႅင်းၶႃႈ”- ဝႃႈၼႆ။
မိူဝ်ႈဝႃး ဝၼ်းတီႈ 26 ၼၼ်ႉၵေႃႈ သိုၵ်းၶၢင် KIA ႁႅၼ်းသိုၵ်းလူမ်ႇတိုၵ်း သိုၵ်းမၢၼ်ႈ တီႈၵွင်းမုင်ႈသႃႇ (ရှုခင်းသာ) ၼိူဝ်ႈတၢင်း လူင် လႃႈသဵဝ်ႈ – ၵူတ်ႉၶၢႆ – မူႇၸေႊ လႄႈ ရူတ်ႉၵႃး တၢင်ႇၵုၼ်ႇ တၢင်ႇၵူၼ်း လႆႈၵိုတ်းယင်ႉၵႂႃႇ ၵမ်းၼိုင်ႈ ၊ ဝၼ်းမိူဝ်ႈၼႆႉ တႄႉ ၵႂႃႇမႃး လႆႈၶိုၼ်းယဝ်ႉဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ