ၾႃႉၽႃႇသႂ်ႇ ဢွၼ်ႇၸၢႆးၼုမ်ႇ ၼမ်ႉလၼ်ႈ 2 ၵေႃႉ ၽွင်းတိုၵ်ႉႁဵတ်းႁႆႈ မၢတ်ႇ 1 တၢႆ 1 ဝႃႈၼႆ။
မိူဝ်ႈဝႃး ဝၼ်းတီႈ 24/5/2021 ယၢမ်းဝၢႆးဝၼ်း မွၵ်ႈ 4 မူင်းၼၼ်ႉ ၾႃႉၽႃႇသႂ်ႇ ဢွၼ်ႇၸၢႆးၼုမ်ႇ 2 ၵေႃႉ ၽွင်းတိုၵ်ႉႁဵတ်းႁႆႈ သူၼ်ယူႇ တီႈထုင်ႉၼမ်ႉလၼ်ႈ ၸႄႈဝဵင်းသီႇပေႃႉ ၸိုင်ႈတႆး ပွတ်းႁွင်ႇ ၼႆယဝ်ႉ။
“မိူဝ်ႈၽွင်းႁဝ်းၶႃႈ ၵႂႃႇႁပ်ႉဢဝ် ဢွၼ်ႇၸၢႆး 2 ၵေႃႉ ထုၵ်ႇၾႃႉၽႃႇသႂ်ႇၼၼ်ႉ တေဢဝ်မႃးတီႈႁူင်းယႃၼမ်ႉလၼ်ႈ တႃႇၵေႃႉ ၼိုင်ႈယွၼ်ႉဝႃႈ မၢတ်ႇၸဵပ်းႁၢဝ်ႈႁႅင်းသေ လႆႈလူႉသဵင်ၸွမ်းတၢင်း။ ၵေႃႉလူႉသဵင်ႈၼၼ်ႉတႄႉ လႆႈပူၼ်ႉၶၢပ်ႈတူဝ် ၽဝ်မိူဝ်ႈ ၼႆႉၶႃႈ”- ၸုမ်းၸွႆႈထႅမ်တူင်ႇဝူင်း သီႇပေႃႉ/ ဖြူစင်နှလုံးသား လူမှုကူညီရေး အသင်း ၵေႃႉၼိုင်ႈလၢတ်ႈ။
မိူဝ်ႈဝႃး ဝၼ်းတီႈ 24 ယၢမ်းႁူဝ်ၶမ်ႈ မွၵ်ႈ 5 မူင်းၼႆႉ ၾူၼ်လူင်လူမ်းလူင် ၽတ်ႉႁၢဝ်ႈႁႅင်းသေ တူၼ်ႈမႆႈယႂ်ႇလူင် ႁၢၵ်းလူမ့်ပဵၼ်လၢႆတူၼ်ႈ။ ပဝ်ႇပတ်ႉ ၵွၵ်းဢဝ်လင်ၶႃးမုင်းႁိူၼ်း ၽႃႁိူၼ်း ၵူၼ်းဝၢၼ်ႈ ပွၵ်ႉ 8 ၸႄႈဝဵင်းၼမ်ႉတူႈ လူႉၵွႆ ၸွမ်းပဵၼ်လၢႆလင် ယၢမ်းလဵဝ် ယူႇတီႈၽူႈမီးပုၼ်ႈၽွၼ်း ၼႂ်းၼမ်ႉတူႈ တိုၵ်ႉၵဵပ်းသဵၼ်ႈမၢႆလွင်ႈလူႉသုမ်းမၼ်းယူႇ ဝႃႈၼႆ။
ၼွၵ်ႈလိူဝ်ၼၼ်ႉ မိူဝ်ႈဝႃး ဝၼ်းတီႈ 24 ယၢမ်းၵၢင်ၼႂ်ၸဝ်ႉ မွၵ်ႈ 1 မူင်းၼၼ်ႉ ၾႃႉၽႃႇသႂ်ႇ တီႈထၢတ်ႈသူႇလႃႇမုၼိ တီႈလွႆ ႁိၼ်သႅင် ပွၵ်ႉ 3 ၸႄႈဝဵင်းၵျွၵ်ႉမႄး ထီးထၢတ်ႈလႆႈပူတ်းၶၢတ်ႇယၢတ်ႇတူၵ်းလူႉၵွႆ ၼႆယဝ်ႉ။
မိူဝ်ႈဝၼ်းတီႈ 18 ပူၼ်ႉမႃးၼႆႉၵေႃႈ ၾႃႉၽႃႇသႂ်ႇ တီႈထၢတ်ႈၵဵင်းလိူၼ် ၸႄႈဝဵင်းၵေးသီးလႄႈ ထၢတ်ႇၼႂ်းဢိူင်ႇပၢင်မီ ၸႄႈဝဵင်းၵၢတ်ႇလေႃႉ သူႇၼိုင်ႈ ၸိုင်ႈတႆးပွတ်းၸၢၼ်း ၺႃးၾႃႉၽႃႇမိူၼ်ၵၼ်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ