ဝၼ်းတီႈ 30/09/2025 ဝၼ်းဢင်းၵၢၼ်း ယၢမ်းၵၢင်ၼႂ်မွၵ်ႈ 5 မူင်း ၾႃႉၽႃႇ ၾႆးမႆႈႁိူၼ်းလင်ၼိုင်ႈ ၼႂ်းဢိူင်ႇ ငႃးၽႄႇၶျွင်း (ငါးဖယ်ချောင်း) ၼႂ်းၼွင်ႁၢႆးယႃႈ ၸႄႈဝဵင်းယွင်ႁူၺ်ႈ ၸိုင်ႈတႆးပွတ်းၸၢၼ်း၊ ပဵၼ်ႁိူၼ်း ဢူးဝိၼ်းမွင်ႇ လႄႈ တေႃႇမႃႇလႃႇ မီးၾၢႆႇတူၵ်းၼွင်ႁၢႆးယႃႈ။

ၽွင်းမိူဝ်ႈၾႃႉၽႃႇၼၼ်ႉ တီႈႁိူၼ်းဢမ်ႇမီးၽႂ်လႄႈ ၵူၼ်းမၢတ်ႇၸဵပ်းလူႉတၢႆဢမ်ႇမီးသေတႃႉ ၾႆးမႆႈႁိူၼ်းလူႉသုမ်းၵႂႃႇတင်းလင် ယၢပ်ႇၽိုတ်ႇတႃႇတေပူၵ်းပွင်ႁိူၼ်းယေးၶိုၼ်း ဝႃႈၼႆ။

ၾူၼ်လူမ်းၼႆႉၽတ်ႉပဝ်ႇႁႅင်းၸဵမ်မိူဝ်ႈဝၼ်းတီႈ 29/09/2025 ယၢမ်းၵၢင်ၶမ်ႈ။ ႁဵတ်းႁႂ်ႈႁၢင်ႈၼူၵ်ႉႁၢင်းသႃႇၶမ်း ဢၼ်ပၵ်းဝႆႉ ႁိမ်းဝၢၼ်ႈၵုင်းလိၼ်လႅင် ၵၢင်ၼွင်ၼၼ်ႉ လူမ်ႉၸူမ်။ ၼၼ်ႉၵေႃႈထိုင်ယၢမ်းၵၢင်ၼႂ်ဝၼ်းတီႈ 30/09/2025 ၵူၼ်းဝၢၼ်ႈၼႂ်းၼွင် ၸင်ႇဢွၼ်ၵၼ်ၸွႆႈဢဝ်ဢွၵ်ႇၶိုၼ်ႈမႃးပၵ်းဝႆႉၶိုၼ်း။ ႁၢင်ႈၼူၵ်ႉႁၢင်းသႃႇၶမ်းၼၼ်ႉ ပၵ်းဝႆႉၸဵမ်မိူဝ်ႈ ပီ 1966 ယဝ်ႉ။ တေႃႇထိုင်ယၢမ်းလဵဝ် ႁိုင်ၼၢၼ်းမႃးၶၢဝ်းတၢင်း 60 ပီယဝ်ႉ။ ၵူၼ်းပိုၼ်ႉတီႈတႄႉဢွၼ်ၵၼ်ယုမ်ႇယမ်ဝႃႈ – ႁၢင်ႈၼူၵ်ႉႁၢင်းသႃႇၶမ်းထိုင်တီႈၸူမ်ၼွင်ၼႆႉပဵၼ်ၼိမိၵ်ႈဢမ်ႇလီၼႆသေ ဢွၼ်ၵၼ်ပဵၼ်ၸႂ်ဢမ်ႇလီ။ ၵမ်ႈၽွင်ႈတႄႉလၢတ်ႈဝႃႈ ပဵၼ်ယွၼ်ႉၽေးၽႅၼ်ႇလိၼ်ဝႆ ၽေးၼမ်ႉထူမ်ႈလႄႈ သဝ်လၵ်းႁၢင်းသႃႇၶမ်းလႆႈလူမ်ႉၸူမ် -ၼႆၵေႃႈမီး။

ၼႂ်းၵႄႈၽေးၾူၼ်လူမ်း ၽေးၼမ်ႉသိုၵ်းမၢၼ်ႈတိုၵ်ႉသင်ႇၵူၼ်းဝၢၼ်ႈၸတ်း ပွႆးၽြႃးၸၢမ်ၵဝ်ႈတွၼ်ႈဝႆႉယူႇၼႂ်းၼွင်ႁၢႆးယႃႈ။ ၽြႃးၸၢမ်ၵဝ်ႈတွၼ်ႈလူင်းမိူင်း ယင်းပႆႇထိုင်ၶိုၼ်းဝတ်ႉဝႃးတီႈယူႇ။ ဝၼ်းတီႈ 9/10/2025 ၸင်ႇတေထိုင်ၶိုၼ်းတီႈၵျွင်းၵၢင်ၼွင် လႆႈႁူႉၼင်ႇၼႆ။

ပူၼ်ႉမႃးႁူဝ်လိူၼ်သႅပ်ႊထႅမ်ႊပိူဝ်ႊၼၼ်ႉၵေႃႈ ၾႃႉၽႃႇ ႁိမ်းဝၢၼ်ႈသွင်းပျွင်း ၸႄႈဝဵင်းပွင်လွင်း ထၢတ်ႈၵွင်းမူးယၢတ်ႇတူၵ်း။

ၼႂ်းႁၢင်လိူၼ်ၼႆႉ ယွၼ်ႉလူမ်းလႅင်ႉဢၼ်ၽတ်ႉထွင်းယူႇၼွၵ်ႈမိူင်းသေ ၼႂ်းမိူင်းတႆး ၾူၼ်လူမ်းၸၢင်ႈတူၵ်းၼမ်၊ ၸၢင်ႈပဵၼ်ၾႃႉၽႃႇ လိၼ်ၵူၼ်ႇ ၼမ်ႉထူမ်ႈလႄႈ ႁႂ်ႈၾၢင်ႉၵၼ်ယူႇသဝ်းၵႂႃႇမႃးၼႆ ၽူႈမီးပုၼ်ႈၽွၼ်းၾၢႆႇလၢမ်းၶၢတ်ႈၾိင်ႈၾႃႉၾူၼ်လူမ်း ပိုၼ်ၽၢဝ်ႇပၼ်ၾၢင်ႉဝႆႉ ၼင်ႇၼႆ။