ၼႂ်းလိူၼ်မေႊၼႆႉၵူၺ်း ၾႃႉၽႃႇသႂ်ႇ ထၢတ်ႈ/ ၵွင်းမူး ပဵၼ်လၢႆသူႇ တၢင်းမိူင်းတႆး ပွတ်းႁွင်ႇလႄႈ ပွတ်းၸၢၼ်း ၸိူဝ်းၼႆႉ။

မိူဝ်ႈၼႆႉ ဝၼ်းတီႈ 24/5/2021 ယၢမ်းၵၢင်ၼႂ်ၸဝ်ႉ မွၵ်ႈ 1 မူင်း ၾႃႉၽႃႇသႂ်ႇ တီႈထၢတ်ႈ/ ၵွင်းမူး သူႇလႃႇမုၼိ တီႈပွၵ်ႉ 3  လွႆႁိၼ်သႅင် ဢၼ်မီးၾၢႆႇဢွၵ်ႇဝဵင်းၵျွၵ်ႉမႄး ၸိုင်ႈတႆး ပွတ်းႁွင်ႇၼၼ်ႉ ထီးၵွင်းမူး ပုတ်းၶၢတ်ႇယၢတ်ႇ တူၵ်းသူႇလိၼ်လူႉၵွႆ ၼႆ ယဝ်ႉ။

ၽူႈတူင်ႉၼိုင် ၼႂ်းတူင်ႇဝူင်းၵူၼ်း ၵျွၵ်ႉမႄး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ၾႃႉၽႃႇသႂ်ႇ တီႈၵွင်းမူး သူႇလႃႇမုၼိ တီႈၵျွၵ်ႉမႄး။ ယွၼ်ႉဝႃႈ ၵွင်းမူးႁဝ်းၶႃႈၼၼ်ႉယူႇဝႆႉတီႈသုင်ဝႆႉၶႃႈဢေႃႈ။ မိူဝ်ႈဝႃးၼႆႉ ၵၢင် ၶိုၼ်းလိုၵ်းၼၼ်ႉ ၾူၼ်ၵေႃႈတူၵ်းယူႇ ၵူၺ်းၵႃႈ ဢမ်ႇပေႃးႁႅင်းၵႃႈႁိုဝ်။ ၽိူဝ်ႇမိူဝ်ႈၼႆႉ မိူင်းလႅင်းမႃးၵေႃႈ ထီးၵွင်းမူး ႁဝ်းၶႃႈ လႆႈပုတ်းၶၢတ်ႇယၢတ်ႇတူၵ်း လူႉၵွႆၼႆႉၶႃႈယဝ်ႉ”- ဝႃႈၼႆ။

ၾႃႉၽႃႇၵွင်းမူးပွၵ်ႈၼႆႉဢမ်ႇ တုမ်ႉတိူဝ်ႉ ၵူၼ်းႁိမ်းႁွမ်း ၊ ဢမ်ႇမီးလွင်ႈမၢတ်ႇၸဵပ်းလူႉတၢႆ ၼႆယဝ်ႉ။

ၼႂ်းလိူၼ်မေႊၼႆႉၵူၺ်း ၾႃႉၽႃႇသႂ်ႇ ထၢတ်ႈ/ ၵွင်းမူး ၼႂ်းမိူင်းတႆး ဢမ်ႇယွမ်း 3 သူႇယဝ်ႉ။ မိူဝ်ႈဝၼ်းတီႈ 18/5/2021 ယၢမ်း ၵၢင်ဝၼ်းတဵင်ႈၼၼ်ႉၵေႃႈ ၾႃႉၽႃႇသႂ်ႇ ထၢတ်ႈမူၺ်ႇတေႃႇတိုင်ၶမ်း/ ၵဵင်းလိူၼ် ၼႂ်းဢိူင်ႇၵဵင်းလိူၼ် ၸႄႈဝဵင်းၵေးသီး ၸႄႈ တွၼ်ႈလွႆလႅမ် ၸိုင်ႈတႆး ပွတ်းၸၢၼ်း သူႇၼိုင်ႈ။

လိူဝ်ၼၼ်ႉ ၼႂ်းဝၼ်းတီႈ 18 ယၢမ်းဝၢႆးဝၼ်း 1 မူင်းၶိုင်ႈ ၾႃႉၽႃႇသႂ်ႇထၢတ်ႈ မူၺ်ႇတေႃႇ ဢၼ်မီးၼႂ်းဢိူင်ႇပၢင်မီ ၸႄႈဝဵင်း ၵၢတ်ႇလေႃႉ ၸႄႈတွၼ်ႈတူၼ်ႈတီး ထီးထၢတ်ႇပုတ်းၶၢတ်ႇယၢတ်ႇတူၵ်းလိၼ်မိူၼ်ၵၼ်။