ၾႆးမႆႈရူတ်ႉၵႃး သွင်လမ်း ၺႃးၾႆးၽဝ်ၼႂ်းၵႄႈမၢၼ်ႈတႃႇလူင် – ၶူဝ်ၼမ်ႉပေႃႈ ၼႂ်းၸႄႈဝဵင်းမူႇၸေႊ ပဵၼ်ရူတ်ႉၵႃးၽႂ်သေ ပဵၼ်ၼမ်ႉမိုဝ်း ၸုမ်းလႂ် ၽဝ် ဢမ်ႇႁူႉဝႃႈၼႆ။
CJ/ ရူတ်ႉၵႃး သွင်လမ်းၺႃးၽဝ်ၼႂ်းၵႄႈမၢၼ်ႈတႃလူင် – ၼမ်ႉပေႃႈ မူႇၸေႊ 23/5/2021
မိူဝ်ႈဝႃး ဝၼ်း တီႈ 23/5/2021 ယၢမ်းၵၢင်ၶိုၼ်းလိုၵ်းမွၵ်ႈ 11 မူင်း ရူတ်ႉၵႃး သွင်လမ်း ၾႆးမႆႈဝႆႉ တီႈႁိမ်းမၢၼ်ႈတႃႈ လူင် တၢင်းၽႄၼမ်ႉၽႃ ၼႂ်းၵႄႈ မၢၼ်ႈတႃႈလူင် – ၶူဝ်ၼမ်ႉပေႃႈ ၸႄႈဝဵင်းမူႇၸေႊ ၸိုင်ႈတႆး ပွတ်းႁွင်ႇ ၼႆယဝ်ႉ။
ၸဝ်ႈၵႃး ဢၼ်ႁၼ်တေႃႇၼႃႈတၼ်းတႃ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ပဵၼ်ၵႃးသွင်လမ်း ႁၼ်ၾႆးမႆႈဝႆႉ။ ၵူၺ်းၵႃႈ ပဵၼ်ၵႃးၽႂ်တမႉ ဢမ်ႇလႆႈႁူႉၶႃႈ ႁဝ်းၶႃႈ ၵႂႃႇထၢမ်တူၺ်းၵူၼ်းၸိူဝ်းယူႇႁိမ်းႁွမ်း ၸိူဝ်းၼၼ်ႉၵေႃႈ ၶဝ်ဢမ်ႇလႆႈႁူႉၼႆၶႃႈ။ လႆႈႁၼ်ၾႆးမႆႈၵႃးဝႆႉၸိူင်ႉၼႆႉၵူၺ်းၼႆၶႃႈ”- ဝႃႈၼႆ။
ဢွင်ႈတီႈတီႈၾႆးမႆႈ ရူတ်ႉၵႃး သွင်လမ်းၼၼ်ႉ ပဵၼ်တီႈသိုၵ်းၶၢင်တူင်ႉၼိုင် ယူႇသဝ်းဝႆႉ။ ၾၢႆႇၼိုင်ႈပဵၼ်ဢွင်ႈတီႈတီႈၶဝ်ၵႆႉၵဵပ်းၶွၼ်ႇ ၸဝ်ႈရူတ်ႉၵႃးလူင်တၢင်ႇၵုၼ်ႇ ၶိုၼ်ႈလူင်း ၵူၼ်းမိူင်းပိုၼ်ႉတီႈမူႇၸေႊ လၢတ်ႈ ၼႄၼင်ႇၼႆ။
မိူဝ်ႈႁၢင်ပီ 2020 ၼၼ်ႉၵေႃႈ ရူတ်ႉၵႃး ၵူၼ်းမိူင်းလမ်းၼိုင်ႈ ၺႃးၽဝ်ၵေႃႈပဵၼ်တီႈႁိမ်းၼၼ်ႉယဝ်ႉ ၵမ်းၼိုင်ႈ။
မိူဝ်ႈဝႃး ဝၼ်းတီႈ 23/5/2021 ယၢမ်းၵၢင်ၼႂ် မွၵ်ႈ 4.48 မူင်း ထိုင် 6 မူင်းပၢႆ ၶွင်ႇသီႇသိုၵ်းမၢၼ်ႈ ႁူမ်ႈတင်းပျီႇတူႉၸိတ်ႉမဵဝ်ႉမ လႄႈ တင်းသိုၵ်းၶၢင် ပဵၼ်ပၢင်တိုၵ်းၵၼ် ႁၢဝ်ႈႁႅင်း တီႈပၢင်ႇလူင်ၵဝ်ႇ – ပၢင်ႇလူင်မႂ်ႇ ၼႂ်းပွၵ်ႉၵွင်းမူးတူင်ႈ ၸႄႈဝဵင်းမူႇၸေႊ ရူတ်ႉၵႃး ၵူၼ်းမိူင်းလူႉၵွႆၸွမ်း ဢမ်ႇယွမ်း 5 လမ်း။ ႁိူၼ်းယေး ၵူၼ်းဝၢၼ်ႈ ၸိူဝ်းၼႆႉ လႆႈလူႉ ၵွႆၸွမ်းထႅင်ႈပဵၼ်လၢႆလင် ၼႆ ယဝ်ႉ။
ၵူၼ်းပွၵ်ႉၵွင်းမူးတူင်ႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝႃး ၶဝ်သွင်ၾၢႆႇၼၼ်ႉ ပဵၼ်ပၢင်တိုၵ်းၵၼ် ႁၢဝ်ႈႁႅင်း ၶႃႈဢေႃႈ။ ရူတ်ႉၵႃးၵူၼ်းမိူင်း ႁိူၼ်းယေး ၸိူဝ်းၼႆႉ လူႉၵွႆၸွမ်းတင်းၼမ်ၶႃႈ။ ဝၢႆးသေ ပၢင်တိုၵ်းယဝ်ႉၵႂႃႇၼၼ်ႉ ၵူၼ်းမိူင်း ၸိူဝ် ယူႇႁိမ်းႁွမ်းၼၼ်ႉ တေၶဝ်ႈၵႂႃႇတူၺ်း ဢွင်ႈတီႈပိူင်ပဵၼ်မၼ်းၼၼ်ႉ သိုၵ်းမၢၼ်ႈ ႁၢမ်ႈဢမ်ႇပၼ်ၶဝ်ႈတူၺ်းၶႃႈ မိူဝ်ႈဝႃးၼႆႉ။ ရူတ်ႉၵႃးလူႉၵွႆၸွမ်းတႄႉ ဢမ်ႇယွမ်း 5 လမ်းၶႃႈ။ ယဝ်ႉၵေႃႈ ႁိူၼ်းယေး ၵူၼ်းဝၢၼ်ႈထႅင်ႈ ပဵၼ်လၢႆ လင်းၶႃႈ ဢေႃႈ”- ဝႃႈၼႆ။
ထႅင်ႈၾၢႆႇၼိုင်ႈၵေႃႈ ၼႂ်းပၢင်တိုၵ်းတင်းသွင်ၾၢႆႇတီႈပွၵ်ႉၵွင်းမူးတူင်ႈၼၼ်ႉ တင်းသွင်ၾၢႆႇမီးလွင်ႈလူႉတၢႆ မၢတ်ႇၸဵပ်း ၼင်ႇၵၼ် ၵူၼ်းမိူင်းပိုၼ်ႉတီႈလၢတ်ႈ။
